Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 11

Caramaka na Sala o Joni na Dauveipapitaisotaki

Caramaka na Sala o Joni na Dauveipapitaisotaki

MACIU 3:1-12 MARIKA 1:1-8 LUKE 3:1-18 JONI 1:6-8, 15-28

  • VUNAU QAI VEIPAPITAISOTAKI O JONI

  • SEGA NI PAPITAISO KECE

Sa oti toka e rauta ni 17 na yabaki mai na gauna a vakatarogi ira voli kina na ivakavuvuli ena valenisoro o Jisu ni se yabaki 12. Qo sa vulaitubutubu ni yabaki 29 G.V. E levu era veitalanoataki Joni na wekai Jisu, e vunau voli ena yasana kece ena tokalau ni Uciwai na Joritani.

E qoroi o Joni ena kena irairai kei na nona vosa. E caka mai na vuti ni kameli na nona isulu, na ivau ni tolona mai na leca. Na kena kakana na vodre kei na denioni ni veikau. Na cava e dau kacivaka? “Ni veivutuni, sa voleka na Matanitu vakalomalagi.”​—Maciu 3:2.

E uqeti ira na vakarorogo na itukutuku i Joni. Era liaca e levu ni dodonu mera veivutuni, mera veisautaka nodra rai kei na itovo qai vakanadakuya nodra ivakarau ni bula e liu. Era tabili yani vei Joni “na kai Jerusalemi, o ira kece mai Jutia, kei ira kece ena yasayasa vakaJoritani.” (Maciu 3:5) Levu vei ira qori era veivutuni. Era mani papitaiso, era tabadromuci ena uciwai na Joritani. Na vuna?

Nodra papitaisotaki na lewenivanua e ivakatakilakila se ivakadinadina ni nodra veivutunitaka mai vu ni lomadra nodra beca na veiyalayalati ena Lawa ni Kalou. (Cakacaka 19:4) Ia eso era sega ni cakava qori. Kena ivakaraitaki, nira gole yani eso na iliuliu ni lotu, na Farisi kei na Setoki, e vakatokai ira o Joni mera “kawa ni gata batigaga.” E kaya: “Ni vuataka na vua ni veivutuni. Ni kua ni kaya, ‘E tamai keimami o Eparama.’ Au kaya vei kemuni ni rawa vua na Kalou me vakatubura na luvei Eparama mai na veivatu qo. Sa toka na matau ena ruku ni vunikau. Na kau kece e sega ni vuataka na vua vinaka, ena ta laivi me kolotaki ina bukawaqa.”​—Maciu 3:7-10.

Ni kauaitaki vakalevu o Joni, veiuqeti nona itukutuku, qai papitaisotaki ira e levu, era talai kina na bete kei na Livai mera lai tarogi koya: “O cei o iko?”

E tukuna vakadodonu o Joni: “Au sega ni Karisito.”

Era mani taroga: “O cei ga o iko, o Ilaija?”

E kaya: “Sega.”

Era taroga: “O iko na parofita?,” oya na parofita levu a tukuna o Mosese ni na lako mai.​—Vakarua 18:15, 18.

E kaya o Joni: “Sega!”

Era cikevi koya: “O cei ga o iko? Tukuna mai me keimami lai tukuna vei ira na talai keimami mai. Vakamacalataki iko mada.” E kaya o Joni: “O yau ga na domo e kacivaka tiko ena vanua talasiga, ‘Ni vakadodonutaka na sala i Jiova,’ me vaka e tukuna na parofita o Aisea.”​—Joni 1:19-23.

Era taroga tale: “Na cava ga o veipapitaisotaki kina ni o sega ni Karisito, se o Ilaija, se parofita?” E sauma o Joni: “Au veipapitaisotaki ena wai. E maliwai kemuni tiko e dua oni sega ni kila. E muri au mai o koya.”​—Joni 1:25-27.

E kila o Joni ni caramaka tiko na sala ena nona vakarautaka na lomadra na lewenivanua mera ciqoma na Mesaia e parofisaitaki ni na basika, ena Tui tale ga. E kaya o Joni me baleti koya qori: “O koya e muri au mai e kaukaua sara vei au, e sega mada ga ni ganiti au meu luvata nona ivava.” (Maciu 3:11) E kaya mada ga o Joni: “O koya e muri au mai e uasivi au ni a bula e liu vei au.”​—Joni 1:15.

E veiganiti gona na itukutuku i Joni: “Ni veivutuni, sa voleka na Matanitu vakalomalagi.” (Maciu 3:2) Qori e vakaraitaka e matanalevu ni sa vakarau tekivu nona cakacaka vakaitalatala na Tui i Jiova, o Jisu Karisito.