Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 24

Tete na Vunau i Jisu e Kalili

Tete na Vunau i Jisu e Kalili

MACIU 4:23-25 MARIKA 1:35-39 LUKE 4:42, 43

  • SIKOVI KALILI O JISU KEI NA VA NA TISAIPELI

  • ROGO NONA VUNAU KEI NA CAKAMANA

E ogaoga sara o Jisu kei ratou na va nona tisaipeli ena nodratou tiko voli e Kapenaumi. Era kauta yani vei Jisu na nodra tauvimate na kai Kapenaumi ena yakavi. Levu ga na gauna e vakaogai koya o Jisu ena veika me baleti ira eso tale.

E duri ena matakacaca ni se buto o Jisu qai curu duadua i tuba. E raica sara e dua na vanua lala me masu kina vei Tamana. Ia sega ni dede sa vaqarai koya yani o “Saimoni kei na so tale” nira kidava ni yali, de dua e liutaka na vaqaqara qori o Pita ni a tiko voli mai nona vale o Jisu.​—Marika 1:36; Luke 4:38.

Ni ratou kunei Jisu, e kaya o Pita: “Era vaqarai kemuni na lewenikoro kece.” (Marika 1:37) Era vinakata na kai Kapenaumi me tiko ga e kea o Jisu. Era marautaka vakalevu na veika sa vakayacora, era mani via “tarovi koya me kua ni lako.” (Luke 4:42) Ia vakacava a lako mai vuravura o Jisu me mai veivakabulai ga vakacakamana? O Kapenaumi duadua ga na vanua me cakacaka kina? Na cava na rai nei Jisu?

E kaya o Jisu vei ratou na nona tisaipeli: “Tou lako ina dua tale na vanua, ina veikoro voleka meu lai vunau tale ga kina, qo na vu ni noqu lako mai.” E kaya tale ga o Jisu vei ira era vinakata me tiko ga e Kapenaumi: “E dodonu meu tukuna tale ga na itukutuku vinaka ni Matanitu ni Kalou ena koro tale eso, ni qo na ka au talai mai kina.”​—Marika 1:38; Luke 4:43.

Io, na vuna bibi e lako mai kina e vuravura o Jisu me vunautaka na Matanitu ni Kalou. Na Matanitu qori ena vakarokorokotaka na yaca i Tamana qai walia vakadua na leqa kece ni kawatamata. E vakadinadinataki ena veivakabulai vakacakamana i Jisu ni talai koya mai na Kalou. A cakava tale ga ena vica na senitiuri yani e liu o Mosese na veika veivakurabuitaki, me vakadeitaka kina ni o koya e italai ni Kalou.​—Lako Yani 4:1-9, 30, 31.

E mani biuti Kapenaumi o Jisu me lai vunau ena korolevu tale eso, ratou qai tomani koya na va nona tisaipeli. O ratou na le va qori o Pita kei Adriu na tacina, o Joni kei Jemesa na tacina. Eratou sureti ena macawa yani e liu me ratou isevu ni tisaipeli i Jisu.

E vuavuaivinaka nodratou cakacaka vakavunau e Kalili o Jisu kei ratou na va nona tisaipeli! E yaco sara ina veivanua yawa na itukutuku kei Jisu. “E kuruseta na vanua taucoko o Siria na kena irogorogo,” lai yaco sara ena yasayasa e tiko kina e tini na korolevu e vakatokai me Tikapoli qai dewa ina tai adua ni Joritani. (Maciu 4:24, 25) Dua na ilala levu mai na veivanua qori kei Jutia era muri Jisu kei ratou na nona tisaipeli. Era kau yani vua e levu era via vakabulai qai vakayacora o Jisu na ka era vinakata. E vakabulai ira na tauvimate, e vakasava tale ga na timoni vei ira na curumi yalo velavela.