Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 99

Vakabula na Mataboko o Jisu, Vukei Sakiusa Tale Ga

Vakabula na Mataboko o Jisu, Vukei Sakiusa Tale Ga

MACIU 20:29-34 MARIKA 10:46-52 LUKE 18:35–19:10

  • VAKABULA O JISU NA MATABOKO E JERIKO

  • VEIVUTUNI O SAKIUSA

Oti e dua na siga nodra biubiu mai Jerusalemi, sa qai yaco i Jeriko o Jisu kei ira na tomani koya ena ilakolako ya. E rawa ni tukuni ni rua na Jeriko, na koro makawa e rauta ni dua veimama na kilomita mai na koro vou e tara donuya nodra veiliutaki na kai Roma. Ni biubiu o Jisu kei ira na ilala levu mai na dua vei rau na koro qori mera gole ina koro kadua, erau rogoca sara na maue e rua na daukerekere mataboko. E dua vei rau o Patimeo.

Ni rau rogoca ni tavali o Jisu, erau kailavaka sara o Patimeo kei na nona itokani: “Turaga, Luvei Tevita, ni lomani keirau!” (Maciu 20:30) Era karaci rau eso vei ira na ilala levu me rau tiko lo, ia sa qai tubu cake ga na domodrau. E tu vakadua o Jisu qai taroga se o cei e kaila ya. Era golevi rau na daukerekere o ira na tomani Jisu tiko ra qai kaya vei dua vei rau: “Kua ni leqa, tucake, sa kacivi iko tiko o Jisu.” (Marika 10:49) Sega ni bera nona luvata nona isulu e sau, e tucake qai lako vei Jisu.

E taroga o Jisu: “Na cava drau vinakata meu cakava vei kemudrau?” Erau vakamamasu ruarua na mataboko: “Turaga, me rai na matai keirau.” (Maciu 20:32, 33) Ena levu ni nona lomani rau, e tara o Jisu na matadrau qai kaya vei dua vei rau: “Lako, sa vakabulai iko nomu vakabauta.” (Marika 10:52) Erau mani rai na daukerekere mataboko rau qai vakalagilagia na Kalou. Nira raica na lewenivanua na veika e yaco, era vakacaucautaka tale ga na Kalou. Erau muri Jisu sara na mataboko rau sa vakabulai.

Ni takosovi Jeriko tiko o Jisu, era tabili yani e dua na ilala levu nira via raici koya a vakabulai rau na mataboko. Nira veidrigidrigi na lewenivanua, eso era sega ni raici Jisu rawa kina. Dua vei ira qori o Sakiusa, na nodra iliuliu na daukumuni ivakacavacava e Jeriko kei na veivanua volekata. E sega ni raica rawa na ka e yaco tiko ni turaga lekaleka. Sa qai cici i liu o Sakiusa, lai kabata e dua na vunilolo ena tutunisala ena muria yani o Jisu. E raica vinaka tu na ka kece o Sakiusa mai na vanua e kaba toka kina. Ni voleka yani o Jisu qai raica ni kaba toka e vunikau o Sakiusa, e kaya: “Sakiusa, siro mai vakatotolo, au na tiko e nomu vale nikua.” (Luke 19:5) E siro o Sakiusa qai vakusakusa i nona vale me lai waraki nona vulagi dokai.

Era vosavosa na lewenivanua nira raica na veika e yaco. Era nanuma ni sega ni dodonu me gade o Jisu vua e dua era vakatoka me ivalavala ca. E vutuniyau o Sakiusa ena nona taura vakatawadodonu na ilavo ni ivakacavacava e dau kumuna.

Ni yaco yani o Jisu ena vale i Sakiusa, era kudruvaka na lewenivanua: “Kemudou! E lai tiko ena vale ni tamata ivalavala ca.” Ia e raica o Jisu  ni rawa ni veivutuni o Sakiusa. A yaco dina qori, ni tucake o Sakiusa qai kaya vei Jisu: “Au na solia e veimama na noqu iyau vei ira na dravudravua, Turaga. Au na sauma lesu tale ga vakava na ka au taura vakatawadodonu.”​—Luke 19:7, 8.

E totoka na sala e vakadinadinataka kina o Sakiusa nona veivutuni dina! Sa rairai cakacakataka rawa mai na nona ivolatukutuku ni ivakacavacava na levu ni nona dinau vei ira eso na Jiu, qai yalataka me sauma lesu vakava. Na ka e via sauma lesu qori e lailai tale na ka e vakaroti ena lawa. (Lako Yani 22:1; Vunau ni Soro 6:2-5) E yalataka tale ga o Sakiusa me solia e veimama ni nona iyau vei ira na dravudravua.

E marautaka o Jisu nona vakaraitaka o Sakiusa ni veivutuni dina, mani kaya vua: “Sa yaco na bula ena vale qo nikua, ni luvei Eparama tale ga o koya. Ni lako mai na Luve ni tamata me vakasaqara na ka e yali, me vakabulai ira tale ga.”​—Luke 19:9, 10.

E se qai vakabibitaka toka ga o Jisu e dua na ka e “yali” ena nona vosa vakatautauvata me baleta na gone a yali tu. (Luke 15:11-24) Ia qo sa dua sara na ivakaraitaki bula ni nona kune e dua e rawa ni tukuni ni a yali tu. Era na rairai vosataki Jisu na iliuliu ni lotu kei na nodra imuri ra qai vakalewai koya ni kauaitaki ira era vakataki Sakiusa. Ia e sega ni cegu o Jisu na vaqarai ira na luvei Eparama era yali tu, me rawa nira vakalesui mai.