Ni ratou yaco i Peciseita o Jisu kei na nona tisaipeli, era kauta yani vua na lewenivanua e dua na mataboko ra qai vakamasuti Jisu me tarai koya me bula.

E tubera na liga i mataboko o Jisu ina ibili. Ni kasivita oti na matana, e tarogi koya o Jisu: “O bau raica e dua na ka?” E kaya na tagane: “Au raici ira na tamata, ia era vaka na irairai ni vunikau era taubale voli.” (Marika 8:23, 24) Sa qai rai vinaka ni tabaka tale na matana e ligana o Jisu. E tukuna vua me lako i vale, me kua ga ni curu i lomanikoro.

Eratou gole sara o Jisu kei na nona tisaipeli ina vualiku, ena yasayasa o Sisaria Filipai. Ena rairai vica vata na siga na ilakolako qori baleta e rauta ni 40 na kilomita na yawa ni vanua me ratou lakova. Na vanua e toka kina na koro e rauta ni 350 na mita na kena cere mai waitui, qai rawa ni laurai mai kea na Ulunivanua o Erimoni.

Ni toso tiko na ilakolako, e lako taudua o Jisu me lai masu. Sa vo toka ga e ciwa se tini na vula ni bera nona mate, qai kauaitaki ratou na nona tisaipeli. Era sa sega ni muri koya e levu, eso tale era rairai veilecayaki se vakanuinuikara. De dua era veinanuyaka na vuna e cata kina nodra via buli koya na lewenivanua me tui, kei na vuna e sega ni vakaraitaka kina e dua na ivakatakilakila me vakadeitaka se o cei dina o koya.

Ni ratou yaco yani na tisaipeli ena vanua e masu tiko kina, e taroga o Jisu: “Na cava era tukuna eso me baleta na Luve ni tamata?” Eratou kaya: “Eso era kaya ni o Joni na Dauveipapitaisotaki, eso tale era kaya ni o Ilaija, eso era kaya ni o Jeremaia se dua vei ira na parofita.” Era nanuma na lewenivanua ni o Jisu e dua vei ira na parofita qori, sa vakabulai mai na mate. Ni via kila o Jisu nodratou rai, e tarogi ratou nona tisaipeli: “Vakacava o kemudou, cava dou nanuma?” E sauma totolo sara o Pita: “O kemuni na Karisito, na Luve ni Kalou bula.”—Maciu 16:13-16.

E kaya o Jisu ni dodonu me marautaka o Pita nona vakatakila qori vua na Kalou, e tomana: “Au tukuna tale ga vei iko Pita, au na tara na noqu ivavakoso ena delanivatu qo, ena sega ni vakamalumalumutaka rawa na matamata kei iBulubulu.” E tukuna tiko e keri o Jisu ni na tara sara ga o koya na ivavakoso, qai sega ni rawa ni vakamalumalumutaki ira na lewena na ibulubulu ke ra yalodina tiko ga nira se bula voli e vuravura. E yalataka sara vei Pita: “Au na solia vei iko na ki ni Matanitu vakalomalagi.”—Maciu 16:18, 19.

Sega ni kena ibalebale qori ni vakaliuci Pita o Jisu se me liu ena kedratou maliwa na yapositolo, e sega tale ga ni digitaki koya o Jisu me yavu ni ivavakoso. O Jisu ga na vatu ena tara kina na nona ivavakoso. (1 Korinica 3:11; Efeso 2:20) Ia ena soli vei Pita e tolu na ki, qai ka dokai me vakayagataka ya me dolava kina na sala mera curu vakailawalawa kina eso ina Matanitu vakalomalagi.

 Ena vakayagataka o Pita na imatai ni ki ena Penitiko 33 G.V. me vakaraitaka vei ira na Jiu era veivutuni kei ira na tavuki mera Jiu na ka mera cakava mera vakabulai kina. Ena vakayagataka na ikarua ni ki me dolava kina na sala vei ira na kai Samaria era vakabauta, mera curu ina Matanitu ni Kalou. Ena 36 G.V., ena vakayagataka na ikatolu ni ki me dolava na sala vei ira na veimatanitu tawacili, me vakataki Konilio kei na so tale.—Cakacaka 2:37, 38; 8:14-17; 10:44-48.

Eratou lomaleqa na yapositolo i Jisu ena nona tukuna ni sa vakarau vakararawataki qai vakamatei e Jerusalemi. A sega ni kila o Pita ni na vakaturi ina bula vakalomalagi o Jisu, e mani kauti koya vakatikitiki qai vunauca: “Me kua ni va qori nomuni rai Turaga, ena sega sara ni yaco qori vei kemuni.” E vakanadaku o Jisu qai sauma: “Lako tani i dakuqu, Setani! O iko na dau veivakatarabetaki, ni sega ni tiko vei iko na vakasama ni Kalou, na vakasama ga vakatamata.”—Maciu 16:22, 23.

Sa qai kacivi ira na yapositolo kei na so tale o Jisu, e vakamacalataka vei ira ni sega ni rawarawa vua e dua me nona imuri. E kaya: “Ke dua e via muri au, me kua tale ni muria na lomana, me colata ga na nona kaunirarawa qai muri au tiko ga. Ni o koya e via maroroya na nona bula ena vakayalia, ia o koya e vakayalia na nona bula ena vukuqu kei na itukutuku vinaka, ena maroroya.”—Marika 8:34, 35.

Kena ibalebale ke vinakata e dua na imuri i Jisu nona veivakadonui, ena vinakati me yaloqaqa qai vakuai koya. E tukuna o Jisu: “O koya ena maduataki au kei na noqu vosa ena itabatamata dauveibutakoci qai valavala ca qo, ena maduataki koya tale ga na Luve ni tamata ni lako mai ena lagilagi i Tamana kei ira na agilosi savasava.” (Marika 8:38) Io, ni lako mai o Jisu “ena qai saumi ira yadua na tamata me vaka na nodra ivalavala.”—Maciu 16:27.