Raica sara na lewena

Raica na lewenivola

 WASE 82

Cakacaka Vakaitalatala i Jisu e Peria

Cakacaka Vakaitalatala i Jisu e Peria

LUKE 13:22–14:6

  • VEIUQETI MERA CURU INA KATUBA QIQO

  • ENA MATE O JISU E JERUSALEMI

Sa veivakavulici qai veivakabulai tiko mai o Jisu e Jutia kei Jerusalemi. E takosova sara na Uciwai na Joritani me vunau ena veikoro lelevu ena yasayasa o Peria. Oti ga qori sa na lesu i Jerusalemi.

Ni se tiko e Peria, a tarogi koya e dua na tagane: “Turaga, era na le lailai ga na vakabulai?” De dua sa dau rogoca voli na tagane qo nodra veiletitaka na iliuliu ni lotu e levu se lailai era na vakabulai. E sega ni sauma vakadodonu o Jisu nona taro, e vakamacalataka ga na ka me cakava e dua me vakabulai. E kaya: “Ni saga ena nomuni igu kece moni curu ina katuba qiqo.” Io, e vinakati na sasaga qai vakamacalataka o Jisu na vuna e bibi kina qori: “Au kaya vei kemuni, e levu era na via curu kina ia era na sega ni rawata.”—Luke 13:23, 24.

Me vakabibitaka o Jisu ni vinakati na sasaga, e tukuna: “Ni sa tucake na itaukeinivale me lokataka na katuba, oni na qai duri tu e tuba moni tukituki oni na qai kaya, ‘Turaga, ni dola mada.’ . . . Ia ena kaya vei kemuni, ‘Au sega ni kila se oni lako mai vei. Ni lako tani, o kemuni na daucaka ca!’”—Luke 13:25-27.

Qori na ka ena sotava o koya e bera, e lewa ga na gauna e yaco yani kina qai loka vua na katuba. Ke gauna cala mada ga vua, a dodonu ga me totolo yani. Era va sara ga qori na ilala levu era rawa ni vakila na yaga ni veivakavulici i Jisu. Ia era sega ni via vakaliuca na sokalou dina ena nodra bula. A talai mai o Jisu ena vukudra, ia era sega ni ciqoma na isolisoli e vakarautaka na Kalou me rawati kina na bula. E kaya o Jisu nira na kolotaki i tuba era na ‘tagi qai katibati.’ Ia o ira mai na veimatanitu ena “vualiku kei na ceva” era na “dabe ena teveli ena Matanitu ni Kalou.”—Luke 13:28, 29.

E kaya o Jisu: “O ira na muri [me vakataki ira na sega ni Jiu kei ira na Jiu era dau vakalolomataki] era na liu, o ira na liu [ira na Jiu era dokai ena lotu era dau dokadokataka nira kawa i Eparama] era na muri.” (Luke 13:30) Ni tukuni vei ira na Jiu dokadoka nira na “muri,” kena ibalebale era na sega ni rawata na Matanitu ni Kalou.

Era lako vei Jisu eso na Farisi ra qai vakasalataki koya: “Lako tani i ke, e via vakamatei iko tiko o Eroti [Anitipasa].” De dua a bukana sara ga qori o Tui Eroti me rawa ni biubiu o Jisu. A rairai leqataka o Eroti de na baci vakaitavi ena nona vakamatei e dua tale na parofita ni Kalou me vaka ga a cakava vei Joni na Dauveipapitaisotaki. Sa qai tukuna vei ira na Farisi o Jisu: “Lai tukuna vua na fokisi qori, ‘Raica! Au vakasavi ira tiko na timoni, au veivakabulai tale ga nikua, vaka tale ga kina nimataka. Ena qai oti ena ikatolu ni siga.’” (Luke 13:31, 32) Ni kacivi Eroti me “fokisi,” de dua a vakaibalebaletaka tiko o Jisu na nona qaseqase  kei na nona dau lawaki na manumanu qori. Ia ena sega ni rawai o Jisu ena ilawaki, ena sega tale ga ni rawa ni vakusai koya o Eroti se dua tale me cakava na itavi e lesi koya kina o Tamana. Ena cakava ga qori ena gauna lokuci ni Kalou.

E gole sara o Jisu e Jerusalemi. Na vuna? E kaya o Jisu: “Ni sega ni vakatarai me mai vakamatei na parofita ena taudaku kei Jerusalemi.” (Luke 13:33) E sega ni parofisaitaki ena iVolatabu ni na mate na Mesaia ena koro ya, cava ga e kaya kina o Jisu ni na vakamatei e kea? Baleta ni koroturaga o Jerusalemi ra qai tiko kina na 71 na lewe ni Sanadrini, nodra mataveilewai levu na Jiu. Era lewai e keri o ira na beitaki nira parofita vakailasu, e dau cabori tale ga kina na isoro manumanu. E kila gona o Jisu ni na sega ni rawa ni vakamatei ena dua tale na vanua.

E kaya tale o Jisu: “Jerusalemi, Jerusalemi, o koya na dau vakamatei ira na parofita, o vakaviriki ira tale ga era talai yani vei iko—sa vakavica noqu via kumuni ira vata na luvemu me vaka na tinanitoa ni ovici ira na luvena! Ia oni besetaka. Raica! Sa biu tu vei kemuni na vale qo.” (Luke 13:34, 35) Era na sotava na Jiu na ca ni nodra cata na Luve ni Kalou!

Ni bera ni yaco i Jerusalemi o Jisu, a sureti koya e dua vei ira nodra iliuliu na Farisi me rau lai kanavata e nona vale ena Siga ni Vakacecegu. Era wanonovi Jisu matua na sureti yani nira via raica se cava ena cakava vua na tagane e vuvuce tu na yagona. Mani tarogi ira na kila vinaka na Lawa kei ira na Farisi o Jisu: “E tara na veivakabulai ena Siga ni Vakacecegu se sega?”—Luke 14:3.

Sega ni dua e vosa. E vakabula na tagane o Jisu qai tarogi ira: “O cei vei kemuni, ke lutu na luvena tagane se bulumakau ina toevu ena Siga ni Vakacecegu me sega ni dreta mai vakatotolo?” (Luke 14:5) Era baci sega ni kaya rawa e dua na ka ena matata ni nona ivakamacala.