Raica sara na lewena

Raica na lewenivola

 WASE 40

Bibi na Veivosoti

Bibi na Veivosoti

LUKE 7:36-50

  • LIVIA NA YALEWA IVALAVALA CA E YAVA I JISU NA WAIWAI

  • NA ITALANOA E VULICI KINA NA VEIVOSOTI

E duidui na nodra rai na lewenivanua ena ka e tukuna kei na ka e cakava o Jisu, ni vakatau ena ivakarau ni lomadra. E vakadinadinataki qori ena dua na vale e Kalili. A sureti Jisu ina dua na kanavata e dua na Farisi o Saimoni, ni via raici koya e cakava tiko na cakacaka veivakurabuitaki. Me vaka ga nona sureti ena so na gauna me kana vata kei ira na daukumuni ivakacavacava kei ira na ivalavala ca, e ciqoma o Jisu na veisureti i Saimoni ni kila e rawa ni vunau kina vei ira na gole yani.

Ia e sega ni vakayacori vei Jisu na ivakarau vakayalololoma e dau caka vei ira na vulagi. E kena ivakarau me vui na yavadra na vulagi ena wai batabata ni dau duka qai katakata nira taubaletaka na gaunisala kuvu e Palesitaina. Era dau reguci mera kidavaki kina. E ivakaraitaki tale ga ni yalololoma kei na veikauaitaki me lumu ena waiwai na drauniuludra. Ni sega ni caka kece qori vei Jisu, vakacava e marautaki nona tiko ena kanavata?

Nira dabe na vulagi mera kana, e curu lo yani e dua na yalewa a sega ni sureti. E kilai ni “yalewa ivalavala ca ena koro.” (Luke 7:37) Eda ivalavala ca kece, ia na yalewa qo e cakava tiko na ka vakasisila, de dua e saqamua. Rairai sa rogoca oti na veivakavulici i Jisu kei na nona sureti ‘ira kece era bikai ena icolacola bibi mera lako mai vua mera vakacegui.’ (Maciu 11:28, 29) E via raici Jisu sara ga ni tarai koya nona vosa kei na ka e cakava.

E tekiduru o yalewa, e tuturu na wainimatana ena yava i Jisu qai vakamamacataka ena drauniuluna. E reguca na yavana qai livia kina eso na waiwai boivinaka e kauta tiko yani. E sega ni taleitaka qori o Saimoni, e kaya e lomana: “Ke parofita dina o ka qo, ena kila se o cei e tarai koya tiko, e yalewa vakacava tale ga, ni yalewa ivalavala ca.”​—Luke 7:39.

Ni kila na nanuma i Saimoni, e qai kaya o Jisu: “Saimoni, au via tukuna vei iko e dua na ka.” E kaya o Saimoni: “Ni tukuna mai, Qasenivuli!” E tomana o Jisu: “Rau dinau tu vua e dua na turaga e le rua, e dua e dinautaka e 500 na dinari, e dua e 50. Ni rau sega ni sauma rawa na nodrau dinau, e vosoti rau ruarua. O cei vei rau qo ena lomani koya vakalevu?” De dua me rawa ga nona isaunitaro, a kaya o Saimoni: “Au vakabauta o koya e levu nona dinau.”​—Luke 7:40-43.

E duavata kei na isaunitaro qori o Jisu. E mani raici yalewa o Jisu qai kaya vei Saimoni: “O sa raica na yalewa qo? Niu curu mai nomu vale, o sega ni vakarautaka na wai me vui kina na yavaqu. Ia na yalewa qo e vakasuasuataka na yavaqu ena wainimatana qai vakamamacataka ena drauniuluna. O sega ni bau reguci au, ia na yalewa qo e sega ni cegu nona reguca na yavaqu mai na gauna au curu mai kina. O sega ni livia e uluqu na waiwai, ia na yalewa qo e livia e yavaqu na waiwai boivinaka.” E raica o Jisu ni ka e cakava ya o yalewa e ivakaraitaki ni nona veivutunitaka dina nona ivalavala dukadukali. Sa qai tinia o Jisu ena nona kaya: “Sa vosoti e levu na nona ivalavala ca ena ka e cakava qo, ni loloma vakalevu. Ia e vosoti vakalailai o koya e loloma vakalailai.”​—Luke 7:44-47.

E sega ni raica vakamamada o Jisu na ivalavala dukadukali. Ia e vakaraitaka nona veinanumi kei na nona kilai ira vinaka era ivalavala ca bibi, era veivutuni qai qara na veivakacegui i Karisito. E lomavakacegu dina o yalewa ena nona kaya o Jisu: “Sa vosoti na nomu ivalavala ca. . . . E vakabulai iko na nomu vakabauta, lako ena vakacegu.”​​—Luke 7: 48, 50.