Raica sara na lewena

Raica na lewenivola

WASE 139

Parataisi na Vuravura Qai Vakacavara o Jisu Nona iTavi

Parataisi na Vuravura Qai Vakacavara o Jisu Nona iTavi

1 KORINICA 15:24-28

  • LEWAI NA SIPI KEI NA ME

  • LEVU ERA NA MARAUTAKA NA PARATAISI E VURAVURA

  • VAKADEITAKA O JISU NI O KOYA NA SALA, NA DINA, NA BULA

Ni papitaiso oti ga o Jisu, e saga sara e dua na meca me tawayalodina ni bera mada ga ni tekivu nona cakacaka vakaitalatala. E saga vakavica na Tevoro me temaki Jisu. E tukuna e muri o Jisu me baleta na vunica: “Sa lako tiko mai na turaga ni vuravura qo. E sega ni dua na nona kaukaua vei au.”—Joni 14:30.

E raivotutaka na yapositolo o Joni na ka ena yaco vua “na gata levu, na gata makawa, e vakatokai na Tevoro se o Setani.” Na meca kaukaua qori ni kawatamata ena kolotaki sobu mai lomalagi, “e cudru vakalevu, ni kila tiko ni sa lekaleka nona gauna.” (Vakatakila 12:9, 12) Oya na vuna eda vakabauta kina na lotu vaKarisito nida sa donuya tu na ‘gauna lekaleka’ qori, sa voleka tale ga me biu ena qara e sega ni vakabotona na “gata levu, na gata makawa.” Ena vesu me 1,000 na yabaki ni veiliutaki tiko o Jisu ena Matanitu ni Kalou.—Vakatakila 20:1, 2.

Na cava ena yaco tiko e vuravura ena loma ni gauna qori? O cei era na bula kina? Ena vakacava tu na bula? E tukuna o Jisu na kena isau. Ena nona vosa vakatautauvata ni sipi kei na me, a vakamatatataka na ka ena yacovi ira era vaka na sipi era tokoni ira na taci Jisu qai caka vinaka vei ira. E tukuna tale ga na ka ena yacovi ira era sega ni cakava qori, o ira era vaka na me. E tukuna o Jisu: “O ira qo [na me] era na muduki vakadua, ia o ira na yalododonu [na sipi] era na bula tawamudu.”—Maciu 25:46.

Qori eda kila rawa kina na ibalebale ni vosa i Jisu vua na daubasulawa a vako tikivi koya. A sega ni cavuta vua o Jisu na icovi a yalataka vei ratou na nona yapositolo yalodina, me ratou veiliutaki vata e lomalagi ena Matanitu ni Kalou. A yalataka ga o Jisu vua na daubasulawa sa veivutuni: “Au tukuna vakadodonu vei iko nikua, daru na tiko vata mai Parataisi.” (Luke 23:43) Io, ena rawa ni bula na turaga qori ena Parataisi se dua na basenikau rairai vinaka. Kena ibalebale, o ira era vaka na sipi nikua ra qai “bula tawamudu,” era na tiko tale ga ena Parataisi qori.

Qori e salavata kei na ka e vakamacalataka na yapositolo o Joni me baleta na ituvaki kei vuravura ena gauna se bera mai. E tukuna: “E sa tiko vei ira na tamata na vale ni Kalou, ena tiko vata kei ira o koya, era na nona tamata. Na Kalou ena tiko vata kei ira. Ena qusia tani tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa oti na veika e dau yaco e liu.”—Vakatakila 21:3, 4.

Ena vakaturi na daubasulawa me rawa ni marautaka na bula ena Parataisi. Ia ena sega ni vakaturi ga o koya. A vakamatatataka qori o Jisu ena nona kaya: “Sa voleka mai na gauna mera rogoca kina na domona o ira kece na tu ena ibulubulu nanumi mera tucake mai. O ira na cakava na ka vinaka era na vakaturi mera bula, kei ira na cakava na ka ca era na vakaturi mera lewai.”—Joni 5:28, 29.

Vakacava o ratou na yapositolo yalodina kei na so tale e yalani ga na kedra iwiliwili ra qai lai bula kei Jisu e lomalagi? E kaya na iVolatabu: “Era na bete ni Kalou kei Karisito, era na veiliutaki vakatui vata kei koya me 1,000 na yabaki.” (Vakatakila 20:6) Era na veiliutaki kei Karisito na tagane kei na yalewa era bula e vuravura ena dua na gauna. Macala ga nira na yalololoma qai veinanumi nira liutaka mai lomalagi na vuravura.—Vakatakila 5:10.

Sa na qai vakayagataka o Jisu nona isoro ni veivoli mera sereki kina na kawatamata e vuravura mai na veivakabobulataki ni ivalavala ca. Ena nodra veitokoni na tacina lumuti, era na vukei ira na kawatamata mera bula uasivi. Io, era na marautaka na kawatamata na bula a nakita taumada na Kalou ni tukuna vei Atama kei Ivi me rau vakaluveni me vakatawai o vuravura. Sa na sega tale ga na mate, na revurevu ni ivalavala ca i Atama!

Ni sa vakayacora kece qori o Jisu me vaka e vinakata o Jiova, ena qai solia lesu vei Tamana na Matanitu kei ira na kawatamata uasivi ena icavacava ni Duanaudolu na Yabaki ni nona Veiliutaki. E vola na yapositolo o Paula me baleta na ivakaraitaki vakasakiti qori ni yalomalumalumu i Jisu: “Ni sa na vakamalumalumutaki na ka kece vua, ena qai vakamalumalumutaki koya tale ga na Luvena vei koya a vakamalumalumutaka na ka kece vua, me rawa ni ka kece ga na Kalou vei ira na tamata kece.”—1 Korinica 15:28.

Macala gona ni lesi vei Jisu e dua na itavi bibi me vakayacori kina na inaki lagilagi ni Kalou. Ni vakayacori tiko me tawamudu na inaki qori, ena vakayacora kece o Jisu na ka e tukuna me baleti koya: “O yau na sala, na dina, kei na bula.”—Joni 14:6.