Ni uasivi o Jisu, e sega ni sotava e levu na ka e rarawataka se leqataka na kawatamata. Ia dua na ka nona lomani ira na lewenivanua. E dau yalorawarawa ni vukei ira, e dau cakava mada ga na ka e rairai nanumi ni sega ni dodonu me caka. Io, na yalololoma e uqeti koya me dauveivukei. Raica na kena ivakaraitaki ena Wase 32, 37, 57, 99.

E rawarawa nodra torovi Jisu na qase kei na gone ni sega ni dau vakaraitaka ni sa rui osooso se ni dua na ka o koya. Era marautaka nodra veimaliwai kei Jisu nira kila ni kauaitaki ira dina. Raica na Wase 25, 27, 95.

E masu wasoma, vagumatua tale ga o Jisu vei Tamana, se mani tiko taudua se tiko kei na so tale na dausokalou dina. Levu tale na ituvaki e dau masu kina, sega ni gauna ga ni kana. A masu me vakavinavinakataki Tamana, vakalagilagi koya, me kerea tale ga nona veidusimaki ni bera ni vakatulewataka eso na ka bibi. Raica na kena ivakaraitaki ena Wase 24, 34, 91, 122, 123.

E dau vakuai koya o Jisu ena vukudra eso tale ena gauna mada ga e rawa ni vakacegu kina se cakava eso tale na ka e marautaka. E sega ni dau nanumi koya ga. E laiva vei keda e keri e dua na ivakarau meda vakatotomuria vinaka. Raica na ivakarau qori ena Wase 19, 41, 52.

Sega ni vakavulica ga o Jisu ni bibi na veivosoti, e vakaraitaka sara ga qori ena nona dauveivosoti ni veimaliwai voli kei ratou nona tisaipeli kei ira eso tale. Vakasamataka vakatitobu na ivakaraitaki ena Wase 26, 40, 64, 85, 131.

Sa parofisaitaki oti tu nira na sega ni ciqoma na Mesaia e levu na Jiu, era na vakamatei koya tale ga na kena meca. A rawa sara ga ni cakacaka vakalailai ga o Jisu ena vukudra na lewenivanua. Ia dua na ka nona gumatua ni tokona na sokalou dina. E ivakaraitaki ni gugumatua vei ira kece nona imuri ke ra sega ni kauaitaki se tusaqati. Raica na Wase 16, 72, 103.

Levu na ka e uasivi keda kina o Jisu,me vaka na kilaka kei na vuku. Na uasivi ni yagona kei na nona vakasama e cakava rawa kina na veika e sega ni rawata tale e dua e bula donuya nona gauna. Ia e dau veiqaravi ena yalomalumalumu. Raica na ka o rawa ni vulica vua ena Wase 10, 62, 66, 94, 116.

E vosovoso tu ga o Jisu nira sega ni vakatotomuria nona ivakaraitaki se cakava na ka e tukuna na nona yapositolo kei na so tale. E vosovoso ni taleva na veika sa vakavulici ira oti kina me vakavolekati ira vei Jiova. Raica na ivakaraitaki ni vosovoso i Jisu ena Wase 74, 98, 118, 135.