Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 3

Sucu o Koya me Caramaka na Sala

Sucu o Koya me Caramaka na Sala

LUKE 1:57-79

  • SUCU QAI VAKAYACANI O JONI NA DAUVEIPAPITAISOTAKI

  • PAROFISAITAKA O SAKARAIA NA ITAVI NEI JONI

Sa vakarau vakasucu o Ilisapeci. A vula tolu nona tiko kei koya na wekana o Meri. Ia qo sa na vakamoce me lesu ena ilakolako balavu ina vualiku ni veidelana kei Jutia, ina nona koro o Nasareci. Ono na vula tarava, ena vakasucuma tale ga o koya e dua na gonetagane.

Oti ga vakalailai nona biubiu o Meri, sa vakasucu sara o Ilisapeci. E marau o Ilisapeci ni vakasucu vinaka rau qai bulabula vakaveitinani! Ni vakaraitaka na luvena vei ira na wekana kei ira era yasayasa vata, era marau tale ga.

E vakaroti ira na Isireli na Kalou me cilivi qai vakayacani na gonetagane ena ikawalu ni siga ni nona sucu. (Vunau ni Soro 12:2, 3) Era nanuma eso me rau veiyacani na gone kei tamana o Sakaraia. Ia e kaya o Ilisapeci: “Sega! Ena yacana o Joni.” (Luke 1:60) Nanuma tiko, ni a tukuna na agilosi o Keperieli me yaca ni gone o Joni.

Era kudruvaka na weka kei ira era yasayasa vata: “Sega ni dua na wekamu e yacana o Joni.” (Luke 1:61) Era qai vosa vagalu mera tarogi Sakaraia se cava e vinakata me yaca i luvena. E kerea sara o Sakaraia e dua na tikinikau raraba, qai vola kina: “Na yacana o Joni.”​—Luke 1:63.

E veivakurabuitaki ni sa vosa rawa tale o Sakaraia. O se rairai nanuma tiko ni a sega tu ni vosa ni sega ni vakabauta na vosa ni agilosi ni na vakasucuma e dua na gonetagane o Ilisapeci. Era kurabui kece ena nodrau yasayasa ni sa vosa rawa tale o Sakaraia ra qai kaya: “Sa na wacava na gonelailai qo ni sa qase.” (Luke 1:66) Era kila ni veidusimaki na Kalou ena nona vakayacani o Joni.

E sobuti Sakaraia na yalo tabu qai kaya: “Me vakacaucautaki o Jiova na nodra Kalou na Isireli, ni nanumi ira na nona tamata qai vakabulai ira. E vakatubura ena vuvale i Tevita na nona dauveiqaravi e dua na ileu me vakabulai keda.” (Luke 1: 68, 69) Na ‘ileu me veivakabulai’ e vakaibalebaletaki vua na Turaga o Jisu, sa vakarau sucu. Ena vuku i Jisu, e kaya o Sakaraia ni Kalou ena “solia vei keda na itavi marautaki meda doudou ena noda veiqaravi tabu, ni vakabulai keda oti mai na ligadra na meca, meda yalododonu da qai yalodina vua ena veisiga kece ni noda bula.”​—Luke 1:74, 75.

E parofisaitaka o Sakaraia me baleta na luvena tagane: “O iko na gonelailai, o na vakatokai mo parofita i koya e Cecere Duadua, o na liu mo vakarautaka na sala i Jiova, mo kacivaka vei ira na nona tamata na itukutuku ni veivakabulai e yavutaki ena vosoti ni nodra ivalavala ca, e vu mai na loloma levu ni noda Kalou. Na loloma levu qo eda na raica kina na rarama mai cake e vaka na rarama ni kida ni mataka, me vakararamataki ira na tiko ena butobuto kei na iyaloyalo ni mate, me dusimaka na noda ilakolako ina sala ni bula vakacegu.” (Luke 1:76-79) E veivakayaloqaqataki dina na parofisai qori.

Sa yaco o Meri ena nona koro o Nasareci, se sega tiko ni vakawati. Na cava ena yaco ni kilai na nona bukete?