Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 32

Cava e Vakatarai ena Siga ni Vakacecegu?

Cava e Vakatarai ena Siga ni Vakacecegu?

MACIU 12:9-14 MARIKA 3:1-6 LUKE 6:6-11

  • VEIVAKABULAI ENA SIGA NI VAKACECEGU

A veisiko o Jisu ena dua tale na Siga ni Vakacecegu, rairai ena valenilotu e Kalili. E raica e kea e dua na tagane e mate na ligana imatau. (Luke 6:6) Era vakaraici Jisu matua toka na vunivola kei na Farisi. Sa qai kilai nodra inaki nira taroga: “E tara na veivakabulai ena Siga ni Vakacecegu?”​—Maciu 12:10.

Era vakabauta na iliuliu ni lotu vakaJiu ni vakatarai ga na veivakabulai ena Siga ni Vakacecegu ke leqataki na nona bula e dua. Kena ibalebale e sega ni vakatarai me vakadodonutaki na sui se vadretitaki na qiovuki ena Siga ni Vakacecegu, na ituvaki va qori e sega ni leqataki kina na bula. Era sega ni vakatarogi Jisu na vunivola kei na Farisi nira kauaitaka dina na tagane e mate na ligana. Era vaqara tiko ga e dua na yavu mera beitaki Jisu kina.

Ia e kila o Jisu na ka ca era veinanuyaka. E kila tale ga ni sa sivia tale nodra vakatatabu me baleta na Siga ni Vakacecegu qai sega ni vakaivolatabu nodra rai me baleta na cakacaka e beci kina na siga ya. (Lako Yani 20:8-10) E cala na kena vakalewai na veika vinaka e cakava. Sa qai vakaraitaka vei ira o Jisu e dua na ka vakatubuqoroqoro ni tukuna vua na tagane e mate na ligana: “Mai tucake mada e loma donu.”​—Marika 3:3.

Sa qai tukuna o Jisu vei ira na vunivola kei na Farisi: “O cei vei kemudou e dua ga nona sipi qai lutu na sipi qori ina qara ena Siga ni Vakacecegu, ena sega ni lai vueta mai?” (Maciu 12:11) E ivurevure ni ilavo na sipi, era na sega kina ni biuta tu ena qara me yacova na siga tarava, de mate ena loma ni gauna qori ra qai sega ni rawailavo. E kaya tale ga na iVolatabu: “Na tamata yalododonu e maroroya na nona manumanu.”​—Vosa Vakaibalebale 12:10.

Sa qai tomana o Jisu: “E macala tu ga ni uasivia na sipi na tamata! O koya gona, e tara me caka na ka vinaka ena Siga ni Vakacecegu.” (Maciu 12:12) A sega kina ni beca o Jisu na Siga ni Vakacecegu ni vakabula na tagane e mate na ligana. Era sega ni tukuna rawa e dua na ka na iliuliu ni lotu ni dina na vosa i Jisu, e ivakaraitaki ni yalololoma.

E veiraiyaki o Jisu, e cudru qai rarawataka nodra rai cala. E kaya sara vua na tagane: “Dodoka mai na ligamu.” (Maciu 12:13) E dodoka na ligana, mani vinaka tale na ligana a mate tu. Dua na ka nona marau na tagane ya, ia vakacava o ira na via nakicataki Jisu?

Era sega ni marautaka ni sa vinaka tale na ligana na tagane, ia era lai bosea sara “kei ira na ito i Eroti mera vakamatei [Jisu].” (Marika 3:6) Era rairai wili ena ilawalawa vakapolitiki qori na lewe ni ilawalawa vakalotu na Setoki. Era dau veisevaki na Setoki kei na Farisi, ia qo era sa duavata mera saqati Jisu.