Raica sara na lewena

Raica na lewenivola

WASE 83

Veisureti ena Kanavata

Veisureti ena Kanavata

LUKE 14:7-24

  • BIBI NA YALOMALUMALUMU

  • ERA VAKAIULUBALE NA SURETI

E se tiko voli ga o Jisu ena nona vale na Farisi ni vakabula oti na tagane e vuvuce tu na yagona. E raica o Jisu nira digia tiko eso tale na vulagi na idabedabe e cake ena gauna ni kana, e vakavulica sara ena gauna qori na bibi ni yalomalumalumu.

E kaya: “Ni dua e sureti iko ena kana magiti ni vakamau, kua ni lai dabe ena vanua dokai. De muri mai e dua tale e sureti e dokai cake vei iko. Ena qai lako mai o koya e sureti kemudrau qai kaya vei iko, ‘Me toka i keri o koya qo.’ O na qai lako ena madua ni o sa na lai tiko sara mai ra.”—Luke 14:8, 9.

E tomana o Jisu ena nona kaya: “Ia ni o sureti, mo dabe sara mai ra. Ni lako mai o koya e sureti iko ena qai kaya, ‘Noqu itau, lako sara i cake.’ O na qai dokai e matadra kece na sureti.” E sega ni okati ga qori me itovo vinaka. E vakamacalataka o Jisu: “Ni o koya e vakacerecerei koya ena vakamalumalumutaki, o koya e vakamalumalumutaki koya ena vakacerecerei.” (Luke 14:10, 11) Io, e uqeti ira tiko na vakarorogo mera bucina na yalomalumalumu.

Sa qai vakavulica o Jisu na Farisi a sureti koya ena ka me cakava me vakadonuya kina na Kalou na ivakayakavi e vakarautaka. “Ni o vakarautaka na ivakasigalevu se ivakayakavi, kua ni kacivi ira nomu itokani, se tacimu, se wekamu, se o ira na vutuniyau oni veitikivi. De ra qai sureti iko tale ena dua na gauna mera sauma kina na nomu veisureti. Ia ni o vakarautaka na magiti, sureti ira na dravudravua, na lokiloki, na gera, kei na mataboko. O na marau ni sega vei ira na ka mera sauma vei iko.”—Luke 14:12-14.

E kena ivakarau ga meda sureti ira noda itokani, wekada se o ira eda tiko veitikivi ena kanavata. E sega ni vakacala tale ga qori o Jisu. E vakabibitaka ga ni vu ni veivakalougatataki na vakarautaki ni kakana vei ira na vakaloloma, me vakataki ira na dravudravua, lokiloki, se mataboko. E vakamacalataka sara o Jisu vua e veisureti: “O na qai saumi nira sa vakaturi na yalododonu.” E tokona qori e dua vei ira na sureti qai kaya: “E marau o koya ena kana ena Matanitu ni Kalou.” (Luke 14:15) E kila na tagane qori ni ka dokai dina me kanavata kei na Kalou e dua. Ia e sega ni va qori nodra rai eso tale me vaka e vakaraitaka o Jisu ena vosa vakatautauvata e tarava:

“E vakarautaka e dua na magiti levu e dua na turaga, qai sureta e levu mera lai vakayagataka. E qai tala nona dauveiqaravi me lai tukuna vei ira na sureti, ‘Ni lako mai, sa vakarau tu na ka kece.’ Ia era vakaiulubale kece. E kaya vua na kena imatai, ‘Au se qai volia ga e dua na were, meu se lai raica mada, au kerea meu vosoti.’ E kaya e dua tale, ‘Au volia e tini na bulumakau, au na via lai raica mada, au kerea meu vosoti.’ E kaya tale e dua, ‘Au se qai vakawati ga, au na sega kina ni rawa yani.’”—Luke 14:16-20

Era iulubale lokiloki kece qori! Ni dua e volia na were se manumanu, ena vakaraica vinaka mada eliu ni bera ni volia, e sega ni gadrevi kina me lai raica tale. Na ikatolu ni tagane e sa vakamau oti, e sega ni dodonu me vakasuka na veisureti bibi ya. Dua na ka nona cudru na turaga, mani kaya vua nona dauveiqaravi:

“Lako yani vakatotolo ina tolonisala lelevu kei na tolonisala lalai ena koro, mo kauti ira mai na dravudravua, na lokiloki, na mataboko, kei na gera.” A vakayacora qori na dauveiqaravi, ia e se lala ga na vale. E qai kaya na turaga vua na dauveiqaravi: “Lako yani ina gaunisala lelevu kei na sala lalai, uqeti ira mera lako mai, me tawa vinaka sara noqu vale. Au kaya vei kemudou, e sega ni dua vei ira na sureti e liu ena tovolea na ivakayakavi au vakarautaka.”—Luke 14:21-24.

Na ka e tukuna qori o Jisu e vakaraitaka vinaka nona vakayagataki Jisu Karisito na Kalou o Jiova me sureti ira era na veiliutaki ena Matanitu vakalomalagi. Era a sureti taumada na Jiu, vakabibi o ira na iliuliu ni lotu. Levu era sega ni ciqoma na veisureti qori ena gauna ni nona cakacaka vakaitalatala o Jisu. Ia era na sureti eso tale. Sa qai vakamatatataka o Jisu ni na vagolei na ikarua ni veisureti vei ira na Jiu yalomalumalumu kei ira na tavuki mera Jiu. Na ikatolu ni veisureti e baleti ira era kaya na Jiu nira tawasavasava ena mata ni Kalou.—Cakacaka 10:28-48.

Io, na ka e tukuna o Jisu e vakadeitaka na ka e kaya e dua vei ira na sureti: “E marau o koya ena kana ena Matanitu ni Kalou.”