Raica sara na lewena

Raica na lewenivola

 WASE 47

Bula Tale na Goneyalewa

Bula Tale na Goneyalewa

E raica o Jairo na nona vakabula o Jisu na yalewa e lako tu ga vua na dra. Kena ibalebale e rawa ni vukei luvena yalewa tale ga o Jisu, ia ‘sa na rairai mate qo.’ (Maciu 9:18) Vakacava e se rawa ni caka e dua na ka vua na goneyalewa qori?

Rau se veivosaki tiko o Jisu kei na marama a vakabula, sa ra yaco yani eso na tagane mai na vale i Jairo qai tukuni vua: “Sa mate na luvemu!” Era kaya tale: “Cava mo vakaogai qasenivuli tale kina?”​—Marika 5:35.

Sa itukutuku rarawataki dina! E dokai vakalevu o Jairo ena nona yasayasa, ia qo sa sega ni cakava rawa e dua na ka ni sa mate na luvena duabauga. E rogoca na veitalanoa o Jisu, e vuki vei Jairo qai vakayaloqaqataki koya ni kaya: “Kua ni lomaleqa, mo vakaraitaka ga na vakabauta.”​—Marika 5:36.

E mani tomani Jairo o Jisu ina nona vale. Ni rau yaco yani, erau raica nira ue na tiko e vale. Era osi qai veitagicaki ena levu ni nodra rarawa. E curu i loma o Jisu qai kurabuitaki nona tukuna: “E sega ni mate na gone, e moce ga.” (Marika 5:39) Era dredrevaki Jisu o ira na rogoca qori, nira kila ni sa mate dina o goneyalewa. Ia ena vakaraitaka o Jisu ena kaukaua e solia vua na Kalou ni rawa ni vakabulai tale e dua sa mate, me vaka ga nona rawa ni vakayadrati e dua e mocelutu.

Sa qai vakatalai ira kece i tuba o Jisu, vakavo ga o Pita, Jemesa, Joni, kei rau na itubutubu nei goneyalewa. Eratou tomani Jisu na le lima qori ina vanua e davo tiko kina o goneyalewa. E taura cake na ligana, sa qai kaya o Jisu: “‘Talica kumi,’ e kena ibalebale: ‘Goneyalewa, au tukuna vei iko, “tucake!”’” (Marika 5:41) E tucake sara na goneyalewa qai veilakoyaki. Sa wacava nodrau marau o Jairo kei watina! E tukuna o Jisu me vakani o goneyalewa me vakadeitaka ni sa bula dina.

Me vaka ga e cakava o Jisu vei ira eso a vakabula e liu, e vakaroti rau na itubutubu nei goneyalewa me rau kua ni talanoataka na ka e cakava. Kena seva ni rau lai talanoa ena “vanua kece” na itubutubu kei ira eso tale. (Maciu 9:26) Eda na cakava tale ga ya ke vakaturi e dua na wekada. Eda na talanoataka ena levu ni noda marau. Qori na ikarua ni veivakaturi i Jisu e volatukutukutaki.