Raica sara na lewena

Na Cava na Veivakaturi?

Na Cava na Veivakaturi?

Kena isau vakaivolatabu

Na vakadewa ni “veivakaturi” ena iVolatabu e yavutaki ena vosa vaKirisi na a·nasta·sis, e kena ibalebale, “basika tale” se “tucake tale.” Qori e dusia na nona sa vakaturi mai na mate e dua, qai vakalesui vua na bula a tu kina e liu.​—1 Korinica 15:12, 13.

E sega ni laurai na vosa “veivakaturi” ena iVolatabu vakaIperiu e vakatokai na Veiyalayalati Makawa, ia e tiko kina na kena ivakavuvuli. Kena ivakaraitaki, e yalataka na Kalou vua na parofita o Osea: “Au na sereki ira mai na kaukaua ni iBulubulu, au na vakabulai ira mai na mate.”​—Osea 13:14; Jope 14:13-​15; Aisea 26:19; Taniela 12:​2, 13.

Era na vakaturi e vei na tamata? Eso era na vakaturi mera lai bula e lomalagi ra qai veiliutaki vakatui kei Karisito. (2 Korinica 5:1; Vakatakila 5:​9, 10) E vakatoka qori na iVolatabu me “imatai ni veivakaturi” kei na “veivakaturi taumada.” Na rua na malanivosa qori e vakaraitaka ni na dua tale na veivakaturi. (Vakatakila 20:6; Filipai 3:​11) Qori nodra vakaturi mera bula ena vuravura qo ra qai vakila tale na iwase levu ni tamata na bula marautaki.​—Same 37:29.

Era na vakaturi vakacava? Na Kalou e solia vei Jisu na kaukaua me vakaturi ira na mate. (Joni 11:25) O Jisu ena vakaturi “ira kece na tu ena ibulubulu nanumi,” ena vakalesuya tale vei ira na kedra ituvaki dina, nodra itovo, kei na ivakarau ni nodra vakasama. (Joni 5:​28, 29) Era na vakaturi ena yago vakayalo o ira na lai bula e lomalagi, ia o ira na vakaturi ena yago vakayago era na bula ena vuravura qo era na uasivi qai bulabula vakayago.​—Aisea 33:24; 35:​5, 6; 1 Korinica 15:42-​44, 50.

O cei ena vakaturi? E kaya na iVolatabu “nira na vakaturi mai na yalododonu kei ira na sega ni yalododonu.” (Cakacaka 24:15) Era okati mera yalododonu na tamata yalodina vakataki Noa, Sera, kei Eparama. (Vakatekivu 6:9; Iperiu 11:11; Jemesa 2:​21) Era okati mera sega ni yalododonu o ira na se bera ni vulica se sega ni kila na ivakatagedegede ni Kalou.

Ia o ira na daucaka ca qai torosobu nodra ivakarau ni bula era na sega ni vakaturi. Era na vakarusai vakadua ena gauna era mate kina, e sega nodra inuinui ni bula tale.​—Maciu 23:33; Iperiu 10:26, 27.

Ena yaco ninaica na veivakaturi? E parofisaitaka na iVolatabu ni na yaco na veivakaturi e lomalagi donuya nona tiko na Karisito, a tauyavu qori ena 1914. (1 Korinica 15:21-​23) Ena vakayacori na veivakaturi e vuravura qo ena loma ni Duanaudolu na Yabaki Nona Veiliutaki o Jisu Karisito, sa na qai vukici na vuravura me parataisi.​—Luke 23:43; Vakatakila 20:​6, 12, 13.

Na cava meda vakabauta kina na veivakaturi? E vakamacalataka na iVolatabu e ciwa na veivakaturi ra qai vakadinadinataka sara ga e levu na kena vakayacori. (1 Tui 17:17-​24; 2 Tui 4:​32-​37; 13:20, 21; Luke 7:​11-​17; 8:​40-​56; Joni 11:38-​44; Cakacaka 9:​36-​42; Cakacaka 20:​7-​12; 1 Korinica 15:​3-6) E vakatubuqoroqoro nona vakaturi Lasarusa o Jisu ni sa mate tu me va na siga. A mani vakayacora o Jisu na cakamana e matadra na ilala levu. (Joni 11:39, 42) O ira mada ga na meca i Jisu era vakadinata na ka e yaco qori, ra mani bosea mera vakamatei Jisu kei Lasarusa.​—Joni 11:47, 53; 12:​9-​11.

E vakaraitaka na iVolatabu ni tiko vua na Kalou na kaukaua, e vinakata tale ga me vakaturi ira na mate. E nanuma vinaka tu na kedra itukutuku matailalai, era na vakaturi mai ena nona kaukaua. (Jope 37:23; Maciu 10:30; Luke 20:37, 38) E rawa vua na Kalou me vakaturi ira na mate, qori na ka e vinakata! E kaya na Kalou me baleta na veivakaturi ena gauna se bera mai: “Oni na vinakata vakalevu na cakacaka ni ligamuni.”​—Jope 14:15.

Rai cala me baleta na veivakaturi

Ka era kaya e levu: Na veivakaturi nodrau duavata tale na yalo kei na yago.

Kena dina: E vakavuvulitaka na iVolatabu ni mate na tamata e sega ni lai bula tale tiko ina dua na vanua, se me bula tiko na yalona. (Dauvunau 9:5, 10) Koya gona na gauna e vakaturi kina e dua, e sega ni duavata tale kei na yalona; sa na tamata bula ga.

Ka era kaya e levu: Eso era na vakaturi qai vakarusai.

Kena dina: E kaya na iVolatabu o “ira na cakava na ka ca era na vakaturi mera lewai.” (Joni 5:​29) E yavutaki nodra lewai ena ka era na cakava ni oti nodra vakaturi. E kaya o Jisu: ‘Era na rogoca  . . na mate na domo ni Luve ni Kalou, o ira ga na rogoca era na bula.’ (Joni 5:​25) O ira ga era ‘rogoca’ qai muria na ka era vulica ena gauna era sa vakaturi kina, ena volai na yacadra ena “ivolavivigi ni bula.”​—Vakatakila 20:12, 13.

Ka era kaya e levu: Ena vakaturi ga ena yago e tu kina e liu ni bera nona mate.

Kena dina: Ni mate na tamata sa na vuca na yagona.—Dauvunau 3:​19, 20.