Raica sara na lewena

Raica na lewenivola

 WASE 96

Vakamacala Vua e Dua na iLiuliu Gone Vutuniyau

Vakamacala Vua e Dua na iLiuliu Gone Vutuniyau

MACIU 19:16-30 MARIKA 10:17-31 LUKE 18:18-30

  • VIA KILA E DUA NA TAGANE VUTUNIYAU NA BULA TAWAMUDU

Ni takosovi Peria tiko o Jisu ena nona ilakolako i Jerusalemi, a cicivi koya yani e dua na tagane vutuniyau qai tekiduru e matana. Na tagane qo e ‘dua vei ira na iliuliu,’ de dua e veiqaravi vakaivakatawa ni valenilotu se lewe ni Sanadrini. E tarogi Jisu sara: “Qasenivuli Vinaka, na cava meu cakava meu bula tawamudu kina?”​—Luke 8:41; 18:18; 24:20.

E sauma o Jisu: “Na cava o tukuna kina niu vinaka? Sega tale ni dua e vinaka, na Kalou ga.” De dua e vakayagataka na tagane ya na “vinaka” me icavuti ni veidokai, me vaka ga era dau cakava na rapai. E qasenivuli vinaka o Jisu, ia e vakaraitaka vua na tagane ke vakayagataki na “Vinaka” me icavuti, e dodonu me vagolei ga vua na Kalou.

E vakasalataki cauravou o Jisu: “Ke o vinakata gona mo bula, e dodonu mo muria tiko ga na ivunau.” E taroga sara o cauravou: “Na ivunau cava?” E vakamacalataka sara o Jisu e lima na ivakaro ena iVunau e Tini, me baleta na laba, veibutakoci, butako, bubului lasu, kei na nodra rokovi na itubutubu. Oti e qai cavuta e dua na ivakaro e bibi cake: “Mo lomana na kainomu me vaka nomu lomani iko.”​—Maciu 19:17-19.

E tukuna o cauravou: “Au sa cakava kece tiko qori, na cava tale se vo?” (Maciu 19:20) De dua e nanuma o tagane ni se lekata tiko eso na itovo vinaka se gadrevi me cakava e dua na ka vakatubuqoroqoro me bula tawamudu kina. Ni rogoca o Jisu nona kerekere, “dua na ka nona lomani koya.” (Marika 10:21) Ia e dua na ka e vakataotaki koya tiko.

E lomana vakalevu nona iyau na tagane ya mani kaya o Jisu: “E dua na ka o se sega ni cakava: Lai volitaka na ka kece e tu vei iko, solia na kena ilavo vei ira na dravudravua, o na qai vakaiyau mai lomalagi, oti mo mai muri au.” Io, e rawa ni  wasea o tagane nona ilavo vei ira na dravudravua nira sega ni rawa ni sauma lesu, oti me qai tisaipeli i Jisu. E lomani koya sara ga o Jisu ni raica nona gole ena rarawa. Ni “levu sara na nona iyau” qai lomana vakalevu qori, e vakamatabokotaki kina ena iyau dina. (Marika 10:21, 22) E kaya o Jisu: “Ena dredre sara vei ira na vakailavo mera curu ina Matanitu ni Kalou!”​—Luke 18:24.

Eratou kurabuitaka na tisaipeli na vosa qori i Jisu kei na ka e kaya tarava: “Ena rawarawa cake vua na kameli me curuma na matanicula, ena dredre vua na vutuniyau me curu ina Matanitu ni Kalou.” Eratou mani taroga: “Ena dua e bula rawa?” Vakacava e dredre dina me vakabulai e dua? E raici ratou o Jisu qai kaya: “Na ka e dredre vua na tamata e rawarawa vua na Kalou.”​—Luke 18:25-27.

E vakaraitaka sara o Pita ni duidui na nodratou digidigi mai na ka e digia na tagane vutuniyau ya, e kaya: “Raica! Keitou sa biuta na ka kece me keitou muri kemuni, na cava ena qai neitou?” E vakamacalataka sara o Jisu na yaga ni nodratou vakatulewa donu: “Ni sa na vakavoui na ka kece ena gauna sa na dabe kina na Luve ni tamata ena nona idabedabe vakaturaga, o kemudou na dau muri au dou na qai dabe tale ga ena idabedabe vakatui e 12, mo dou lewa na yavusa e 12 kei Isireli.”​—Maciu 19:27, 28.

E vakasamataka tiko o Jisu ni sa na vakavoui na vuravura qo ena gauna se bera mai me vaka na were o Iteni. Ena vakaicovitaki o Pita kei na so tale na tisaipeli mera liutaka kei Jisu na vuravura parataisi. Na icovi qori e uasivia na ka kece era na vakuai ira kina!

Era na qai marautaka nona tisaipeli eso na veivakalougatataki ena gauna se bera mai, ia era na marautaka rawa tale ga eso ena gauna qo . E kaya o Jisu: “E sega ni dua e biuta na vale se watina, se tacina, se nona itubutubu, se luvena ena vuku ni Matanitu ni Kalou me na sega ni vakalevutaki tale vua ena gauna qo, ena bula tawamudu tale ga ena gauna se bera mai.”​—Luke 18:29, 30.

Io, se vanua cava era na lakova nona tisaipeli, era tu na tacidra vakayalo era talei cake vei ira na weka vakayago. Ka ni rarawa ni sa na rairai calata na tagane vutuniyau na veivakalougatataki qori kei na icovi ni bula ena Matanitu vakalomalagi.

E tomana o Jisu: “E levu era liu era na muri, o ira na muri era na liu.” (Maciu 19:30) Na cava e vakaibalebaletaka?

E maliwai ira na “liu” na tagane vutuniyau, ni dua vei ira na iliuliu ni Jiu. Ni dau muria tale ga na ivakaro ni Kalou, e levu na ka e rawa ni yaga kina qai lesi vua e levu na itavi. Ia e vakaliuca ena nona bula na iyau. E duidui sara qori vei ira na tauvanua, era vakabauta ni dina na ivakavuvuli i Jisu qai veidusimaki ina bula. E rawa ni tukuni nira “muri,” ia qo era sa “liu.” Era rai vakanamata mera lai veiliutaki vata kei Jisu mai lomalagi ra qai liutaka na vuravura Parataisi.