Sa tekivu tale e dua na ilakolako vakavunau i Jisu e Kalili ni vakavulica oti ga na veivosoti ena vale i Saimoni na Farisi. Qo na ikarua ni yabaki ni nona cakacaka vakaitalatala, eratou tomani koya na le 12 na yapositolo, kei na so na yalewa era “vakabulai mai na kedra mate, era vakabulai tale ga mai na nodra curumi yalo velavela.” (Luke 8:2) E maliwai ira qori o Meri Makitala, Susana, kei Joana e iliuliu ni vale i Tui Eroti Anitipasa o watina.

E vakavu veivosaki vakalevu na cakacaka i Jisu nira sa kilai koya e levu. Kena ivakaraitaki, vakabula o Jisu e dua na tagane e curumi timoni, mataboko, e galu tale ga. Sa sega tale ni curumi timoni, sa rai qai vosa rawa. Dua na ka nodra kurabui na lewenivanua, era kaya: “Sega ni o koya ga qo na Luvei Tevita?”​—Maciu 12:23.

Eratou sega ni kana rawa o Jisu kei na nona tisaipeli nira sa soqoni yani na ilala levu ena vale eratou tiko kina. E levu era sega ni vakabauta ni o Jisu e “Luvei Tevita” a yalataki ni na yaco mai. Eso mada ga na vunivola kei na Farisi era lako vakayawa sara mai Jerusalemi, era sega ni mai rogoci Jisu se tokoni koya. Era kaya vei ira na lewenivanua: “E curumi koya o Pielisipupi” e cakacaka vata kei na nodra “iliuliu na timoni.” (Marika 3:22) Nira rogoca qori na weka i Jisu, era lako yani mera vesuki koya. Na vuna?

Eratou sega mada ga ni vakabauta na taci Jisu ni o koya na Luve ni Kalou. (Joni 7:5) Eratou sega ni vakabauta ni vakavuna o Jisu nodra ue na lewenivanua, ni veicalati sara qori kei na ka eratou kilai koya kina ni ratou se susu vata voli mai Nasareci. Eratou nanuma ni dua na ka sa leqa vua, eratou kaya: “Sa leqa nona vakasama.”​—Marika 3:21.

 E kilai vakacava ni lasu qori? E se qai vakabula ga o Jisu e dua na tagane e curumi timoni, sa rai qai vosa tale. E sega ni dua e vakalasuya rawa qori. Era saga na vunivola kei na Farisi mera vakarogorogocataki Jisu ena nodra beitaki koya vakailasu. Era kaya: “O ka qo e vakasavi ira na timoni ena kaukaua i Pielisipupi, na nodra iliuliu na timoni.”​—Maciu 12:24.

Ni kila o Jisu na ka era veinanuyaka na vunivola kei na Farisi, e kaya vei ira: “Na matanitu e tawase vakataki koya ena rusa, na koro kece se vale e tawase ena bale. Ke vakasavi Setani tale ga o Setani, sa na qai tawase vakataki koya, ena qai dei vakaevei na nona matanitu?”​—Maciu 12:25, 26.

E dina na vakasama qori! Era kila na Farisi ni so tale ga na Jiu era dau vakasavi ira na timoni. (Cakacaka 19:13) E taroga sara o Jisu: “Keu vakasava na timoni ena yaca i Pielisipupi, na yaca i cei ga era vakasava tiko kina na timoni na luvemudou?” E laurai e keri ni rawa ni tukuni tale vei ira na ka era beitaki Jisu tiko kina. Sa qai tomana o Jisu nona ivakamacala: “Ia keu vakasavi ira na timoni ena kaukaua ni yalo ni Kalou, dou sa calata dina na Matanitu ni Kalou.”​—Maciu 12:27, 28.

Me vakaraitaka o Jisu ni kaukaua vei Setani ena nona vakasavi ira na timoni, e kaya: “Ena curu vakacava e dua ina vale ni tamata qaqa me qai kauta na nona iyau, ke sega ni vesuka mada e liu na tamata qaqa? Qo ga na sala ena qai taura rawa kina na nona iyau. O koya e sega ni tovata kei au e saqati au, o koya e sega ni sosoqoni vata kei au, e vu ni veitawasei.” (Maciu 12:29, 30) Nodra tusaqati Jisu na vunivola kei na Farisi e ivakadinadina nira mata i Setani. Era tawasei ira na lewenivanua mai vua na Luve ni Kalou, e tokoni koya tiko o Jiova.

E vakasalataki ira o Jisu na dauveitusaqati i Setani: “E rawa ni vosoti na ka kece ga era cakava na luve ni tamata, se mani cava na nodra ivalavala ca se nodra vosa veibeci. Ia o koya e vosabeca na yalo tabu ena sega sara ga ni vosoti, ni okati ya me nona ivalavala ca me tawamudu.” (Marika 3:28, 29) Qori e tukuni ira tale ga era kaya ni vakavuna o Setani na veika e vakadinadinataki ni cakava na yalo tabu ni Kalou!