Raica sara na lewena

Raica na lewenivola

 ITALANOA 92

Vakaturi Ira na Mate o Jisu

Vakaturi Ira na Mate o Jisu

E YABAKI 12 na goneyalewa oqori. E taura tiko na ligana o Jisu rau qai tu voleka na nona itubutubu. O kila se cava erau marautaka tiko? Meda raica mada.

E turaga kilai na tama i koya na goneyalewa oqo. Na yacana o Jairo. Dua na siga a tauvimate na luvena qai davo tiko ga ena nona loga. Ia e sega ni bula vinaka rawa. Erau taqaya vakalevu o Jairo kei na watina ni kena irairai e sa na mate na luvedrau goneyalewa duabau. Mani lai vaqarai Jisu mai o Jairo. Sa rogoca oti na nona dau veivakabulai.

E kunei Jisu o Jairo ena dua na vanua era bini tu kina na tamata. E curu yani ena kedra maliwa, cuva e yava i Jisu qai kerei koya: ‘E tauvimate bibi sara na luvequ yalewa. Yalovinaka, mai vakabulai koya.’ E tukuna vua o Jisu ni na lako yani.

Ni rau taubale tiko, era drigiti rau yani na lewe vuqa. Vakasauri ga sa tu vakadua o Jisu qai taroga, ‘O cei e tarai au?’ E vakila o koya ni lako tani mai vua na kaukaua ena gauna e tarai kina. Ia o cei beka a tarai koya? Oya e dua na yalewa sa tauvimate tu ena 12 na yabaki. A torovi Jisu yani, tara nona isulu, mani bula sara kina!

E lomavakacegu o Jairo ni sa raica na kena rawarawa vei Jisu me vakabula e dua. Ia a talai yani e dua me lai kaya vei Jairo: ‘Kua ni qai vakaogai Jisu, sa mate na luvemu yalewa.’ E rogoca vinaka na itukutuku oya o Jisu qai kaya vei Jairo: ‘Kua ni taqaya, ena bula na luvemu.’

Ni rau sa yaco yani ina vale i Jairo, era sa veitagicaki tiko o ira na tiko e kea. E kaya o Jisu: ‘Dou kua ni tagi. E sega ni mate o koya e moce ga.’ Ia era dredrevaki Jisu, nira kila ni sa mate oti na gone.

Sa qai kauti rau na itubutubu ni gone o Jisu kei na tolu na yapositolo ina vanua e davo tiko mai kina na gone. E taura cake na ligana qai kaya: ‘Tucake!’ E bula tale mai, me vaka ga o raica tiko oqori. Sa tucake qai veilakoyaki! Oqo na vuna e rau marau tiko kina vakalevu o tamana kei tinana.

Oqo e sega ni qai imatai ni tamata e vakatura mai na mate o Jisu. Na imatai e kaya na iVolatabu na luvena e dua na yada ena koro o Neini. E tarava o Lasarusa, na gane i Meri kei Marica. Ni sa na veiliutaki o Jisu me nona tui digitaki na Kalou, ena qai vakatura e levu era sa mate tu. Sa na dua dina na ka marautaki oya, se vakaevei?