Vola o Joni 12:1-50

  • Livia o Meri na waiwai e yavai Jisu (1-11)

  • Curu vakaturaga o Jisu (12-19)

  • Tukuna o Jisu na nona mate (20-37)

  • Vakayacori na parofisai nira sega ni vakabauta na Jiu (38-43)

  • Lako mai o Jisu me vakabulai vuravura (44-50)

12  E yaco yani i Pecani o Jisu ni vo e ono na siga me vakayacori na Lakosivia, e tiko ena koro qo o Lasarusa,+ na turaga e vakatura mai na mate o Jisu.  Era mani vakarautaka e kea na kena ivakayakavi. E vakarau kakana o Marica,+ ia o Lasarusa e dua vei ira na kanavata* tiko kei koya.  E qai kauta mai o Meri e dua na paudi* na waiwai boivinaka, e vakaisaluaki ena narita* dina, e saulevu, e livia ena yava i Jisu qai vakamamacataka ena drauniuluna. E curuoso e vale na iboi ni waiwai.+  Ia e qai kaya o Jutasa Isikarioti,+ e dua vei ratou na nona tisaipeli, e vakarau soli Jisu yani:  “Na cava e sega ni volitaki kina na waiwai boivinaka qori ena 300 na dinari* me qai soli vei ira na dravudravua?”  E sega ni tukuna ya ni kauaitaki ira dina na dravudravua, e baleta ga ni daubutako, e dau maroroya na kato ni lavo qai dau butakoca na ilavo e biu kina.  E qai kaya o Jisu: “Dou laivi koya, ni sa muria tiko na kena ivalavala me vakarautaka kina na noqu bulu.+  Nira dau tiko vata ga kei kemudou na dravudravua,+ ia au na sega ni tiko vata kei kemudou e veigauna.”+  Era qai kila e levu sara na Jiu ni sa tiko e kea o koya. Era mani lako yani mera lai raici Jisu, ia era via raici Lasarusa tale ga o koya e vakatura mai na mate.+ 10  Era sa qai bosea na iliuliu ni bete mera vakamatei Lasarusa tale ga, 11  ni levu na Jiu era lako i kea era sa lai vakabauti Jisu ena vukuna.+ 12  Ena siga e tarava, nira rogoca na ilala levu era lako ina soqo ni sa lako tiko yani i Jerusalemi o Jisu. 13  Era mani taura na taba ni niuniu ra qai lai tavaki koya. Era kailavaka: “Keimami masulaka me vakabulai! Me kalougata o koya e lako mai ena yaca i Jiova,*+ na Tui Isireli!”+ 14  Ni raica o Jisu e dua na luve ni asa, e vodoka sara,+ me vaka ga e volai: 15  “Kua ni rere, goneyalewa ni Saioni. Raica! Sa lako tiko mai na nomu tui, e vodo tiko mai ena dua na luve ni asa.”+ 16  Eratou a sega mada ni kila na nona tisaipeli na ibalebale ni ka kece qo, ia ni vakalagilagi oti o Jisu,+ eratou qai liaca ni sa volai oti tu na veika me baleti koya kei na ka era cakava vua.+ 17  O ira na ilala levu era tiko ni kacivi Lasarusa o Jisu mai na ibulubulu*+ qai vakaturi koya mai na mate, era tukuni koya tiko ga.+ 18  Qo na vuna era lai tavaki koya tale ga kina na ilala levu nira rogoca nona cakamana. 19  Era mani veikayaka na Farisi: “Raica! E sega ni dua na ka eda cakava rawa. Era sa muri koya na kai vuravura kece.”+ 20  Eso na kai Kirisi era maliwai ira na lako ina soqo mera lai sokalou. 21  Era mani lako vei Filipi,+ e kai Peciseita mai Kalili, era kerea vua: “Kemuni, keitou via raici Jisu.” 22  E lako o Filipi lai tukuna vei Adriu. Erau qai lako o Adriu kei Filipi me rau lai tukuna vei Jisu. 23  E qai kaya vei rau o Jisu: “Sa yaco mai na gauna me vakalagilagi kina na Luve ni tamata.+ 24  Au tukuna vakadodonu sara vei kemudrau, ke lutu ina qele e dua na vua ni witi qai sega ni mate, ena dua tiko ga na vua ni witi, ia ke mate+ ena qai vua vakalevu. 25  O koya e lomana nona bula ena vakayalia, ia o koya e cata nona bula+ ena vuravura qo ena maroroya me rawata kina na bula tawamudu.+ 26  Ke dua e via qarava na veika e baleti au, me muri au, na vanua au tiko kina ena tiko tale ga kina na noqu dauveiqaravi.+ O koya e qaravi au, ena rokovi koya o Tamaqu. 27  Au sa rarawa sara ga,+ na cava meu kaya? Tamaqu, ni vakabulai au ena gauna qo.+ Ia qo na vuna au lako mai kina ena gauna qo. 28  Tamaqu, moni vakalagilagia na yacamuni.” E qai rogo mai e dua na domo+ mai lomalagi: “Au sa vakalagilagia oti, au na vakalagilagia tale.”+ 29  Era rogoca na vosa ya na ilala levu era tu e kea ra qai kaya ni kurukuru. Era kaya eso tale: “E vosa vua e dua na agilosi.” 30  E sauma o Jisu: “E sega ni rogo mai na domo ya ena vukuqu, ena vukumuni ga. 31  E sa lewai tiko na vuravura qo, ena biu laivi+ na turaga ni vuravura qo.+ 32  Ia o yau, keu laveti cake mai vuravura,+ era na galeleti au na matatamata kece.” 33  E tukuna qo me kilai kina na sala ena vakarau mate kina.+ 34  Era qai kaya vua na ilala levu: “Keimami rogoca ena Lawa ni na tiko ga me tawamudu na Karisito.+ Ia o qai tukuna vakacava ni na laveti cake na Luve ni tamata?+ O cei na Luve ni tamata qo?” 35  E mani tukuna vei ira o Jisu: “Ena tiko vakalekaleka kei kemuni na rarama. Ni lako ni se tiko kei kemuni na rarama me kua ni rawai kemuni na butobuto, o koya e lako ena butobuto e sega ni kila na vanua e lako tiko kina.+ 36  Ni vakaraitaka ni oni vakabauta na rarama moni luve ni rarama, ni se tiko vei kemuni na rarama.”+ Ni cavuta oti qo o Jisu, e biubiu sara qai lai vuni mera kua ni raici koya. 37  Nira raica e levu nona cakamana, era sega tiko ga ni vakabauti koya, 38  e vakayacori kina na vosa ni parofita o Aisea ni kaya: “I Jiova,* o cei me vakabauta na ka edaru rogoca?*+ Me baleta na liga i Jiova,* e sa vakatakilai vei cei?”+ 39  Ya na vuna era sega ni vakabauta kina, ni a kaya o Aisea: 40  “E vakamatabokotaka na matadra, e vakaukauataka na lomadra, me kua kina ni rai na matadra se kila na lomadra ra qai saumaki mai meu vakabulai ira.”+ 41  E tukuna o Aisea na veika qo me baleti Karisito ni a raica nona lagilagi.+ 42  Era mani vakabauti koya e levu na nodra iliuliu.+ Ia era sega ga ni tukuni koya ena vukudra na Farisi de ra vakatalai mai na nodra valenilotu,+ 43  ni bibi vei ira na veivakadonui ni tamata, sega soti na veivakadonui ni Kalou.+ 44  E qai kacivaka o Jisu: “O koya e vakabauti au, e sega ni vakabauti au ga, e vakabauti koya tale ga e talai au mai,+ 45  o koya e raici au e raici koya tale ga e talai au mai.+ 46  Au lako mai vuravura meu kena rarama,+ mera kua kina ni tiko ga ena butobuto o ira kece era vakabauti au.+ 47  Ia ke dua e rogoca noqu vosa qai sega ni muria, au sega ni lewai koya, niu sega ni lako mai meu lewai vuravura meu vakabulai vuravura ga.+ 48  O koya e beci au qai sega ni rogoca noqu vosa, e tiko e dua me lewai koya. Na vosa au cavuta ena qai lewai koya ena iotioti ni siga. 49  Niu sega ni vosa vakataki au ga, ia o Tamaqu e talai au mai e vakaroti au ena ka meu tukuna kei na ka meu vakavulica.+ 50  Au kila tale ga ni nona ivakaro e vu ni bula tawamudu.+ O koya gona, au tukuna ga na veika e tukuna vei au o Tamaqu.”+

iVakamacala e ra

Se “dabe tiko ena teveli.”
Oya na paudi ni Roma, rauta ni 327 na karamu (11.5 na onisi). Raica na iKuri B14.
Waiwai talei e rairai caka mai na dua na kau boivinaka e dau kune ena veitokaitua na Himalaya.
Raica na iKuri B14.
Raica na iKuri A5.
Se “ibulubulu nanumi.”
Raica na iKuri A5.
Se “nodaru itukutuku.”
Raica na iKuri A5.