An Ikaduha nga Libro han mga Cronicas 35:1-27
35 Hi Josias nagsaurog hin Paskua+ para kan Jehova ha Jerusalem, ngan gin-ihaw* nira an halad para ha Paskua+ han ika-14 ka adlaw han siyahan nga bulan.+
2 Gintuinan niya an mga saserdote ha ira mga buruhaton ngan gin-aghat hira nga tumanon an ira mga buruhaton ha balay ni Jehova.+
3 Katapos, nagsiring hiya ha mga Levita, ha mga instruktor ha bug-os nga Israel,+ ha mga baraan para kan Jehova: “Ibutang an baraan nga Arka ha balay nga gintukod ni Solomon nga anak ni David nga hadi han Israel;+ diri na niyo ito papas-anon.+ Yana pagserbi kan Jehova nga iyo Dios ngan ha Israel nga iya katawohan.
4 Ngan andama an iyo kalugaringon uyon ha iyo mga panimalay* uyon ha iyo mga grupo, sunda niyo an iginsurat ni Hadi David+ han Israel ngan ni Solomon nga iya anak.+
5 Tindog ha baraan nga lugar uyon ha grupo han mga panimalay* han iyo kabugtoan, an iba pa han katawohan,* nga may katugbang nga grupo han panimalay* han mga Levita.
6 Ihawa an halad para ha Paskua+ ngan baraana an iyo kalugaringon ngan pag-andam para ha iyo kabugtoan ha pagtuman han pulong ni Jehova pinaagi kan Moises.”
7 Hi Josias nag-amot hin mga panon para ha katawohan, nati nga mga karnero nga lalakí ngan nati nga mga kanding nga lalakí, sugad nga mga halad para ha Paskua para ha ngatanan nga nakada, an kadamuon hito ngatanan 30,000, sugad man 3,000 nga baka. Tikang ini ha mga panag-iya han hadi.+
8 Nag-amot liwat an iya mga prinsipe sugad nga boluntaryo nga halad para ha katawohan, ha mga saserdote, ngan ha mga Levita. Hira Hilkias,+ Zacarias, ngan Jehiel, nga mga lider ha balay han tinuod nga Dios, naghatag ha mga saserdote hin 2,600 nga halad para ha Paskua ngan 300 nga baka.
9 Hi Conanias ngan an iya kabugtoan nga hira Semaias ngan Netanel, pati hira Hasabias, Jeiel, ngan Jozabad, nga mga lider han mga Levita, nag-amot ha mga Levita hin 5,000 nga halad para ha Paskua ngan 500 nga baka.
10 Natapos an pagpangandam, ngan an mga saserdote tinindog ha ira mga pwesto ngan an mga Levita uyon ha ira mga grupo,+ sugad han iginsugo han hadi.
11 Ira gin-ihaw an mga halad para ha Paskua,+ ngan iginwisik han mga saserdote an dugo nga ira nakarawat tikang ha ira,+ samtang gin-aanitan han mga Levita an mga hayop.+
12 Sunod, ira gin-andam an mga halad nga sinunog basi bahin-bahinon ito ha iba pa han katawohan, nga gin-grupo uyon ha panimalay,* basi maihalad ito kan Jehova sugad han iginsurat ha libro ni Moises; ngan ito liwat an ira ginbuhat ha mga baka.
13 Ira ginluto* ha kalayo an halad para ha Paskua uyon ha nahiaraan;+ ngan an baraan nga mga halad ira ginluto ha mga daba, mga kaldero, ngan mga karaha, katapos hito, ira dayon gindara ito ha ngatanan nga iba pa nga tawo.
14 Katapos, nangandam hira para ha ira kalugaringon ngan para ha mga saserdote, kay an mga saserdote nga katulinan ni Aaron, naghinalad han mga halad nga sinunog ngan han mga tambok tubtob ha gab-i, salit an mga Levita nangandam para ha ira kalugaringon ngan para ha mga saserdote nga katulinan ni Aaron.
15 Ngan an mga parakanta, nga mga anak nga lalaki ni Asap,+ aada ha ira mga pwesto uyon ha sugo nira David,+ Asap,+ Heman, ngan ni Jedutun+ nga parasumat hin bisyon ha hadi; ngan an mga parabantay han ganghaan aada ha iba-iba nga ganghaan.+ Diri na kinahanglan nga bumaya hira ha ira buruhaton kay an ira kabugtoan nga mga Levita nangandam para ha ira.
16 Hito nga adlaw natapos hira pag-andam han ngatanan nga ginkikinahanglan ni Jehova ha ira ha pagsaurog han Paskua+ ngan ha paghalad han mga halad nga sinunog ha halaran ni Jehova, uyon ha iginsugo ni Hadi Josias.+
17 An mga Israelita nga presente, nagsaurog han Paskua hito nga panahon ngan han Piyesta han Tinapay nga Waray Libadura ha sulod hin pito ka adlaw.+
18 Waray pa gud Paskua nga ginsaurog hin sugad hito ha Israel tikang pa ha panahon ni Samuel nga propeta; ngan waray pa liwat bisan hin-o han iba nga hadi ha Israel an nagsaurog han Paskua pariho han pagsaurog ni Josias,+ han mga saserdote, han mga Levita, han bug-os nga Juda ngan Israel nga nakada, ngan han mga umurukoy ha Jerusalem.
19 Ini nga Paskua ginsaurog ha ika-18 ka tuig han paghadi ni Josias.
20 Katapos hini ngatanan, han igin-andam na ni Josias an templo,* hi Hadi Neco+ han Ehipto sinulong basi makiggirra didto ha Carkemis nga hirani ha Eufrates. Ngan hi Josias kinadto basi atubangon hiya.+
21 Salit nagsugo hiya hin mga mensahero ngadto ha iya, nga nasiring: “Ano an imo labot hini, O hadi han Juda? Waray ako kumanhi basi makig-away ha imo yana nga adlaw, lugod kinanhi ako basi makig-away ha iba nga nasud, ngan an Dios nasiring nga kinahanglan ako magdagmit. Para ha imo kaopayan, ayaw kontraha an Dios nga kaupod ko, kay kon buhaton mo ito bubungkagon ka niya.”
22 Pero hi Josias waray umatras tikang ha iya, lugod nagpakunokuno hiya+ basi makig-away ha iya ngan waray hiya mamati ha mga pulong ni Neco, nga tikang ha baba han Dios. Salit kinadto hiya basi makiggirra didto ha Kapatagan han Megido.+
23 Ngan ginpana han mga parapamana hi Hadi Josias, ngan an hadi nagsiring ha iya mga surugoon: “Igawas ako dinhi, kay nasamaran ako hin grabe.”
24 Salit iginhaw-as hiya han iya mga surugoon ha karuwahe ngan iginsakay hiya ha iya ikaduha nga pan-girra nga karuwahe ngan gindara hiya ha Jerusalem. Ngan namatay hiya ngan iginlubong ha lubnganan han iya mga kaapoy-apoyan,+ ngan an bug-os nga Juda ngan Jerusalem nagtaguminatay kan Josias.
25 Ngan hi Jeremias+ nagkanta hin kanta ha pagtaguminatay para kan Josias, ngan an ngatanan nga lalaki ngan babaye nga parakanta+ padayon nga nagkanta mahitungod kan Josias ha ira mga kanta nga masurub-on* tubtob hini nga adlaw; ngan nagdesisyon nga kakantahon ito ha Israel, ngan iginsurat ito kaupod han mga kanta nga masurub-on.
26 Mahitungod han iba pa nga bahin han kasaysayan ni Josias ngan han iya mga buhat tungod han maunungon nga gugma, ha pagsunod han nakasurat ha Balaud ni Jehova,
27 ngan han iya ginbuhat, tikang ha tinikangan tubtob ha kataposan, iginsurat ito ha Libro han mga Hadi han Israel ngan han Juda.+
