An Ikaduha nga Libro han mga Cronicas 10:1-19
-
Pagrebelde han Israel kan Rehoboam (1-19)
10 Hi Rehoboam kinadto ha Sikem,+ kay an bug-os nga Israel kinadto ha Sikem basi himoon hiya nga hadi.+
2 Pakabati gud hito ni Jeroboam+ nga anak nga lalaki ni Nebat (nakadto pa hiya ha Ehipto kay pinalagiw hiya tungod kan Hadi Solomon),+ binalik hi Jeroboam tikang ha Ehipto.
3 Katapos, ira iginpatawag hiya, ngan hi Jeroboam ngan an bug-os nga Israel kinadto kan Rehoboam ngan nagsiring:
4 “Ginpakurian kami han imo tatay ha pagpas-an han amon yugo.+ Pero kon imo pasayunon an makuri nga pagpatrabaho han imo tatay ngan imo pagaanon an mabug-at* nga yugo nga iya iginpapas-an ha amon, magsiserbi kami ha imo.”
5 Salit nagsiring hiya ha ira: “Balik kamo ha akon paglabay hin tulo ka adlaw.” Amo nga nagkalakat an katawohan.+
6 Katapos, hi Hadi Rehoboam nangaro hin sagdon ha lagas nga kalalakin-an* nga nagserbi ha iya tatay nga hi Solomon han buhi pa. Hiya nagsiring: “Ano an iyo maisasagdon kon paonan-o ko babatunon ini nga katawohan?”
7 Binaton hira ha iya: “Kon magin maopay ka hini nga katawohan ngan mapalipay mo hira ngan bumaton ka hin pabor ha ira, magigin surugoon mo pirme hira.”
8 Pero iginsalikway niya an sagdon ha iya han lagas nga kalalakin-an,* ngan nangaro hiya hin sagdon ha batan-on nga kalalakin-an nga kadungan-dungan niya ngan mga kabulig na niya yana.+
9 Nagpakiana hiya ha ira: “Ano an iyo maisasagdon kon paonan-o kita mabaton hini nga katawohan nga nagsiring ha akon, ‘Pagaana an yugo nga iginpapas-an ha amon han imo tatay’?”
10 An batan-on nga kalalakin-an nga iya kadungan-dungan nagsiring ha iya: “Ini an imo igyayakan ha katawohan nga nagsiring ha imo, ‘Ginpabug-at han imo tatay an amon yugo, pero sadang mo ito pagaanon para ha amon’; ini an imo igsusumat ha ira, ‘An akon kamuyingking magigin mas madakmol pa kay han baliatang han akon tatay.
11 Ginpapas-an kamo han akon tatay hin mabug-at nga yugo, pero dudugangan ko an iyo yugo. Ginsirotan kamo han akon tatay pinaagi hin mga latigo, pero bubuhaton ko ito pinaagi hin mga latigo nga may magtarom nga mga kataposan.’”
12 Hi Jeroboam ngan an ngatanan nga katawohan kinadto kan Rehoboam ha ikatulo ka adlaw, sugad han ginsiring han hadi: “Balik kamo ha akon ha ikatulo ka adlaw.”+
13 Pero an hadi mapintas nga binaton ha ira. Sugad hito iginsalikway ni Hadi Rehoboam an sagdon han lagas nga kalalakin-an.*
14 Nagyakan hiya ha ira sumala ha sagdon han batan-on nga kalalakin-an, nga nasiring: “Mas pabubug-aton ko an iyo yugo, ngan dudugangan ko pa ito. Ginsirotan kamo han akon tatay pinaagi hin mga latigo, pero bubuhaton ko ito pinaagi hin mga latigo nga may magtarom nga mga kataposan.”
15 Salit an hadi waray mamati ha katawohan, kay an tinuod nga Dios an nagpahinabo hini,+ basi matuman an pulong ni Jehova kan Jeroboam nga anak ni Nebat nga iya ginyakan pinaagi kan Ahias+ nga Shilonita.
16 An hadi diniri pagpamati ha bug-os nga Israel, salit an katawohan binaton ha hadi: “May-ada ba kami malon kan David? Waray kami panurundon ha anak ni Jesse. An kada tagsa bumalik ha iyo mga dios, O Israel! Yana panginanoa an imo kalugaringon nga panimalay, O David.”+ Ngan nanguli an ngatanan nga Israelita ha ira mga balay.*+
17 Pero hi Rehoboam padayon nga naghadi ha mga Israelita nga naukoy ha mga syudad han Juda.+
18 Katapos, ginsugo ni Hadi Rehoboam hi Hadoram,+ nga nagdudumara ha mga gin-obligar nga magtrabaho para ha hadi, pero ginbato hiya han mga Israelita tubtob nga namatay. Nakahimo pagsakay hi Hadi Rehoboam ha iya karuwahe basi pumalagiw ngadto ha Jerusalem.+
19 Ngan an mga Israelita nagrebelde ha panimalay ni David tubtob hini nga adlaw.
