An Ikaduha nga Libro han mga Cronicas 26:1-23

  • Hi Uzias, hadi han Juda (1-5)

  • Mga pakiggirra ni Uzias (6-15)

  • Uzias nagkaada hin liprosi (16-21)

  • Kamatayon ni Uzias (22, 23)

26  Katapos, ginkuha han ngatanan nga katawohan han Juda hi Uzias+ nga 16 anyos, ngan ginhimo hiya nga hadi kasaliwan han iya tatay nga hi Amazias.+  Iya gintukod utro an Elot+ ngan iginbalik ito ha Juda katapos iglubong an hadi* kaupod han iya mga kaapoy-apoyan.+  Nagin hadi hi Uzias+ han 16 anyos hiya, ngan nagmando hiya hin 52 ka tuig ha Jerusalem. An ngaran han iya nanay amo hi Jecolias nga taga-Jerusalem.+  Padayon nga ginbuhat niya an husto ha pagkita ni Jehova, sugad han ginbuhat han iya tatay nga hi Amazias.+  Ngan padayon nga ginpamiling niya an Dios ha mga adlaw ni Zacarias, nga nagtutdo ha iya nga magkaada kahadlok ha tinuod nga Dios. Durante han panahon nga iya ginpapamiling hi Jehova, ginpahinabo han tinuod nga Dios nga mag-uswag hiya.+  Kinadto hiya ha pakig-away ha mga Filisteo+ ngan gin-guhangan an pader han Gat,+ an pader han Jabne,+ ngan an pader han Asdod.+ Katapos, nagtukod hiya hin mga syudad ha teritoryo han Asdod ngan dida ha mga Filisteo.  An tinuod nga Dios padayon nga binulig ha iya kontra ha mga Filisteo, kontra ha mga Arabiano+ nga naukoy ha Gurbaal, ngan kontra ha mga Meunim.  An mga Ammonita+ nagtikang paghatag hin bayad* kan Uzias. Ha urhi, an iya kabantogan inabot tubtob ha Ehipto, kay nagin gamhanan gud hiya.  Nagtukod liwat hi Uzias hin mga torre+ ha Jerusalem hirani ha Ganghaan ha Eskina,+ ha Ganghaan han Walog,+ ngan ha Nasuporta nga Harigi, ngan iya ginparig-on ito. 10  Dugang pa, nagtukod hiya hin mga torre+ ha kamingawan ngan nag-ukad* hin damu nga tirokan hin tubig (kay damu an iya hayop); ito liwat an iya ginbuhat ha Sefela ngan ha kapatagan.* May-ada hiya mga parag-uma ngan mga trabahador ha urubasan ha kabukiran ngan ha Carmel, kay mahilig hiya ha pag-uma. 11  Dugang pa, hi Uzias nagkaada kasundalohan nga ginbansay ha pakiggirra. Napakadto hira ha mga pakiggirra, nga nakaorganisar sugad nga mga grupo. Gin-ihap hira ngan iginrehistro+ ni Jeiel nga sekretaryo+ ngan ni Maaseias nga opisyal, ilarom han pagdumara ni Hananias, nga usa han mga prinsipe han hadi. 12  An kadamu han ngatanan nga ulo han mga panimalay* nga nagdumara hinin magkusog nga mga girriro, 2,600. 13  An kadamu han armado nga kasundalohan ilarom han ira pagpanguna 307,500 nga lalaki nga andam ha pakiggirra, usa ka gamhanan nga pwersa militar basi buligan an hadi kontra ha mga kaaway.+ 14  Gintagan ni Uzias an ngatanan nga sundalo hin mga taming, mga sugob,+ mga helmet, mga kutamaya,+ mga pana, ngan mga bato nga ilarabyog.+ 15  Naghimo liwat hiya ha Jerusalem hin mga makina ha pakiggirra nga gindisenyo han mga endyinir; iginpwesto ito ha mga torre+ ngan ha mga eskina han mga pader ngan nakakatira ito hin mga pana ngan dagku nga mga bato. Salit an iya kabantogan inabot ha bisan diin, kay daku gud nga bulig an iya nakarawat ngan nagin makusog hiya. 16  Kondi han makusog na hiya, nagin mapahitas-on an iya kasingkasing nga nagresulta han iya kadaot, ngan hiya nagin diri matinumanon kan Jehova nga iya Dios kay sinulod hiya ha templo ni Jehova basi magsunog hin insenso ha halaran han insenso.+ 17  Hi Azarias nga saserdote ngan an 80 nga iba pa nga maisugon nga saserdote ni Jehova sinulod dayon sunod ha iya. 18  Ira ginkompronta hi Hadi Uzias ngan ginsidngan hiya: “Uzias, diri husto nga magsunog ka hin insenso para kan Jehova!+ An mga saserdote la an sadang magsunog hin insenso kay hira an katulinan ni Aaron,+ hira amo an ginbaraan. Gawas ha santuaryo, kay ikaw nagin diri matinumanon ngan diri ka makarawat hin kadungganan tikang kan Jehova nga Dios tungod hini.” 19  Pero hi Uzias, nga may ginkakaptan nga insensaryo basi magsunog hin insenso, nasina gud;+ ngan samtang duro an iya kasina ha mga saserdote, nagkaada hiya liprosi+ ha iya agtang ha atubangan han mga saserdote ha balay ni Jehova ha sapit han halaran han insenso. 20  Han hi Azarias nga punoan nga saserdote ngan an ngatanan nga saserdote liningi ha iya, ira nakita nga nagkaada hiya liprosi ha iya agtang! Salit ira dayon hiya ginpagawas, ngan hiya mismo nagdagmit paggawas, kay ginsirotan hiya ni Jehova. 21  Hi Hadi Uzias nagpabilin nga may liprosi tubtob ha adlaw han iya kamatay, ngan nag-inukoy hiya ha nahibubulag nga balay sugad nga may liprosi,+ kay ginpaiwas hiya ha balay ni Jehova. An iya anak nga hi Jotam amo an nagdumara han balay* han hadi, nga naghuhukom ha katawohan han tuna.+ 22  Ngan an iba pa nga bahin han kasaysayan ni Uzias, tikang ha tinikangan tubtob ha kataposan, iginsurat ni propeta Isaias+ nga anak ni Amoz. 23  Katapos, hi Uzias pinahuway kaupod han iya mga kaapoy-apoyan, ngan ira iginlubong hiya kaupod han iya mga kaapoy-apoyan, pero didto ha lubnganan nga tuna nga kanan mga hadi, kay hira nagsiring: “May liprosi hiya.” Ngan an iya anak nga hi Jotam+ an nagin hadi kasaliwan niya.

Mga footnote

Karuyag sidngon, an iya tatay nga hi Amazias.
O “tributo.” Kitaa an Glossary.
O “nagtabas,” posible nga ha bato.
O “hitaas nga kapatagan.”
Kitaa an ftn. ha Ex 6:25.
O “palasyo.”