An Ikaduha nga Libro han mga Cronicas 15:1-19

  • Mga pagbag-o nga ginhimo ni Asa (1-19)

15  Yana an espiritu han Dios kinada kan Azarias nga anak nga lalaki ni Oded.  Salit kinadto hiya basi makigkita kan Asa ngan nagsiring ha iya: “Pamati ha akon, O Asa ngan bug-os nga Juda ngan Benjamin! Hi Jehova kaupod niyo kon magpapabilin kamo nga kaupod niya;+ ngan kon pamilngon niyo hiya, itutugot niya nga maagian niyo hiya,+ pero kon bumaya kamo ha iya, mabaya liwat hiya ha iyo.+  Ha sulod hin maiha nga panahon,* an Israel waray tinuod nga Dios, waray saserdote nga nagtututdo, ngan waray balaud.+  Pero kon ha panahon han ira kasakitan nabalik hira kan Jehova nga Dios han Israel ngan namimiling ha iya, igintutugot niya nga maagian nira hiya.+  Hito nga mga panahon diri talwas an pagbiyahe,* kay masamok hinduro an ngatanan nga umurukoy han mga tuna.  An usa nga nasud ginbungkag hin lain nga nasud ngan an usa nga syudad ginbungkag hin lain nga syudad, kay ginpahinabo han Dios nga magin masamok hira pinaagi han ngatanan nga klase hin kasakitan.+  Pero kamo, magin marig-on kamo ngan ayaw panluya,*+ kay an iyo ginbubuhat babalosan.”  Pakabati gud ni Asa hini nga mga pulong ngan han tagna ni Oded nga propeta, nagin maisugon hiya ngan ginpanguha an mangil-ad nga mga idolo ha bug-os nga tuna han Juda+ ngan Benjamin ngan ha mga syudad nga iya nasakop ha kabukiran han Efraim, ngan iya gin-ayad an halaran ni Jehova nga nakada ha atubangan han beranda ni Jehova.+  Ngan iya gintirok an bug-os nga Juda ngan Benjamin ngan an mga dayo nga residente nga kaupod nira tikang ha Efraim ngan Manases ngan Simeon,+ kay damu hira nga dinapig ha iya tikang ha Israel han ira nakita nga hi Jehova nga iya Dios kaupod niya. 10  Salit gintirok hira ha Jerusalem ha ikatulo ka bulan han ika-15 ka tuig han paghadi ni Asa. 11  Hito nga adlaw naghalad hira kan Jehova hin 700 nga baka ngan 7,000 nga karnero tikang ha dinag-an nga ira gindara. 12  Dugang pa inuyon hira ha kasabotan nga pamilngon hi Jehova nga Dios han ira mga kaapoy-apoyan ha bug-os nira nga kasingkasing ngan ha bug-os nira nga kalag.*+ 13  An bisan hin-o nga diri mamiling kan Jehova nga Dios han Israel papatayon, batan-on man o lagas,* lalaki o babaye.+ 14  Salit nanumpa hira kan Jehova ha daku nga tingog, upod an malipayon nga pagguliat, ngan may mga trumpeta ngan mga sungay. 15  Ngan an bug-os nga Juda nagrayhak tungod han iginpanumpa, kay nanumpa hira ha bug-os nira nga kasingkasing ngan namiling gud hira ha iya ngan igintugot niya nga maagian nira hiya,+ ngan hi Jehova padayon nga naghatag ha ira hin kapahuwayan ha bisan diin.+ 16  Gintangtang pa ngani ni Asa nga hadi an iya lola nga hi Maaca+ ha iya katungdanan sugad nga rayna, kay naghimo hiya hin mangil-ad nga idolo para ha pagsingba ha sagrado nga poste.*+ Gin-utod ni Asa an iya mangil-ad nga idolo ngan ginpulbos ito ngan ginsunog ito ha Walog han Kidron.+ 17  Pero waray pananggala an higtaas nga mga lugar+ ha Israel.+ Bisan pa hito, bug-os* an kasingkasing ni Asa ha bug-os niya nga kinabuhi.*+ 18  Ngan gindara niya an mga butang nga ginbaraan niya ngan han iya tatay ngadto ha balay han tinuod nga Dios—silber, bulawan, ngan magkalain-lain nga mga gamit.+ 19  Waray girra tubtob han ika-35 ka tuig han paghadi ni Asa.+

Mga footnote

Lit., “Ngan damu nga adlaw nga.”
Lit., “waray kamurayawan para ha nagawas o ha nasulod.”
Lit., “ayaw tuguti nga manluyloy an iyo mga kamot.”
Kitaa an Glossary.
O “prominente o ubos.”
Kitaa an Glossary.
O “bug-os nga debotado.”
Lit., “ha ngatanan niya nga adlaw.”