An Ikaduha nga Libro han mga Cronicas 36:1-23

  • Hi Jehoahaz, hadi han Juda (1-3)

  • Hi Jehoiakim, hadi han Juda (4-8)

  • Hi Jehoiakin, hadi han Juda (9, 10)

  • Hi Zedekias, hadi han Juda (11-14)

  • Kabungkagan han Jerusalem (15-21)

  • Sugo ni Ciro nga tukuron utro an templo (22, 23)

36  Katapos, ginkuha han katawohan han Juda an anak ni Josias nga hi Jehoahaz+ ngan ginhimo hiya nga hadi ha Jerusalem kasaliwan han iya tatay.+  Hi Jehoahaz 23 anyos han nagin hadi hiya, ngan nagmando hiya hin tulo ka bulan ha Jerusalem.  Pero ginpaiwas hiya ha Jerusalem han hadi han Ehipto ngan ginmultahan an tuna hin 100 ka talanton* nga silber ngan usa ka talanton nga bulawan.+  Dugang pa, an bugto ni Jehoahaz nga hi Eliakim amo an ginhimo nga hadi ha Juda ngan Jerusalem han hadi han Ehipto ngan ginbalyoan an iya ngaran hin Jehoiakim; pero ginkuha ni Neco+ an iya bugto nga hi Jehoahaz ngan gindara hiya ngadto ha Ehipto.+  Hi Jehoiakim+ 25 anyos han nagin hadi hiya, ngan nagmando hiya hin 11 ka tuig ha Jerusalem. Padayon nga ginbuhat niya an maraot ha pagkita ni Jehova nga iya Dios.+  Ginsulong hiya ni Hadi Nabucodonosor+ han Babilonya basi gapuson hiya hin duha nga kadena nga tumbaga* para dad-on hiya ngadto ha Babilonya.+  Ngan hi Nabucodonosor nagdara hin pipira han garamiton ha balay ni Jehova ngadto ha Babilonya ngan iginbutang ito ha iya palasyo ha Babilonya.+  Mahitungod han iba pa nga bahin han kasaysayan ni Jehoiakim, an mangil-ad nga mga butang nga iya ginbuhat ngan an ngatanan nga magraot nga butang mahitungod ha iya, iginsurat ito ha Libro han mga Hadi han Israel ngan han Juda; ngan an iya anak nga hi Jehoiakin an nagin hadi kasaliwan niya.+  Hi Jehoiakin+ 18 anyos han nagin hadi hiya, ngan nagmando hiya hin tulo ka bulan ngan napulo ka adlaw ha Jerusalem; ngan padayon nga ginbuhat niya an maraot ha pagkita ni Jehova.+ 10  Ha tinikangan han tuig,* nagsugo hi Hadi Nabucodonosor nga dad-on hiya ha Babilonya,+ upod an birilhon nga mga garamiton ha balay ni Jehova.+ Ngan ginhimo niya nga hadi han Juda ngan Jerusalem hi Zedekias nga bugto han iya tatay.+ 11  Hi Zedekias+ 21 anyos han nagin hadi hiya, ngan nagmando hiya hin 11 ka tuig ha Jerusalem.+ 12  Padayon nga ginbuhat niya an maraot ha pagkita ni Jehova nga iya Dios. Waray hiya magpaubos ha atubangan ni propeta Jeremias,+ nga nagyakan uyon ha sugo ni Jehova. 13  Nagrebelde liwat hiya kan Hadi Nabucodonosor+ nga nagpasumpa ha iya ha ngaran han Dios, ngan nagpabilin nga matig-a an iya ulo* ngan matig-a an iya kasingkasing ngan nagdumiri hiya pagdangop kan Jehova nga Dios han Israel. 14  An ngatanan nga nangunguna nga saserdote sugad man an katawohan duro gud an pagkadiri-matinumanon, nagbinuhat han ngatanan nga mangil-ad nga butang han mga nasud, ngan ira ginhugawan an balay ni Jehova+ nga iya ginbaraan ha Jerusalem. 15  Padayon nga ginpahamangnoan hira ni Jehova nga Dios han ira mga kaapoy-apoyan pinaagi han iya mga mensahero, pauroutro nga ginpahamangnoan hira, kay pinaid hiya ha iya katawohan ngan ha iya urukyan. 16  Pero padayon nga gin-insulto nira an mga mensahero han tinuod nga Dios,+ ngan ira gintamay an iya mga pulong+ ngan ginminos an iya mga propeta,+ tubtob nga nasina hinduro hi Jehova ha iya katawohan,+ hasta nga waray na hira paglaom nga matambal. 17  Salit iya ginpahinabo nga atakehon hira han hadi han mga Caldeo,+ nga nagpatay han ira batan-on nga mga lalaki pinaagi han espada+ didto ha ira santuaryo;+ waray hiya malooy ha batan-on nga lalaki o ha birhen, ha lagas o ha maluya.+ An ngatanan igintubyan han Dios ha iya kamot.+ 18  An ngatanan nga garamiton ha balay han tinuod nga Dios, an dagku ngan an gudtiay, sugad man an mga bahandi ha balay ni Jehova ngan an mga bahandi han hadi ngan han iya mga prinsipe, gindara niya ngatanan ngadto ha Babilonya.+ 19  Ginsunog niya an balay han tinuod nga Dios,+ ginrumpag an pader han Jerusalem,+ ginsunog an ngatanan nga magrig-on nga torre hito, ngan ginbungkag an ngatanan nga presyoso nga butang.+ 20  Gindara niya nga bihag ngadto ha Babilonya an ngatanan nga waray mamatay pinaagi han espada,+ ngan hira nagin mga surugoon niya+ ngan han iya mga anak tubtob nga nagtikang pagmando an ginhadian han Persia,+ 21  basi matuman an pulong ni Jehova pinaagi kan Jeremias,+ tubtob nga nakabawi an tuna han waray tumana nga mga sabbath hito.+ Ha ngatanan nga adlaw nga binayaan ito gintuman hito an sabbath, ha pagtuman han 70 ka tuig.+ 22  Ha siyahan nga tuig ni Hadi Ciro+ han Persia, basi matuman an pulong ni Jehova nga iginyakan pinaagi kan Jeremias,+ ginpagios ni Jehova an espiritu ni Hadi Ciro han Persia nga magpasamwak hin mensahe ha bug-os niya nga ginhadian, nga iya liwat iginsurat,+ nga nasiring: 23  “Ini an siring ni Hadi Ciro han Persia, ‘Iginhatag ha akon ni Jehova nga Dios han langit an ngatanan nga ginhadian ha tuna,+ ngan iya ako ginsugo nga magtukod hin balay para ha iya ha Jerusalem, nga nahimumutang ha Juda.+ An bisan hin-o ha iyo nga bahin han iya katawohan, hinaot hi Jehova nga iya Dios umupod ha iya, ngan pasagkaha hiya.’”+

Mga footnote

An usa ka talanton katugbang han 34.2 kg. Kitaa an Ap. B14.
Ha Ingles, copper.
Posible nga ha katsaringsing.
Lit., “iya ginpatig-a an iya liog.”