An Ikaduha nga Libro han mga Cronicas 17:1-19
17 Ngan an iya anak nga hi Jehosafat+ an nagin hadi kasaliwan niya, ngan iya ginparig-on an iya katungdanan ha Israel.
2 Nagbutang hiya hin mga pwersa militar ha ngatanan nga pinader nga syudad han Juda ngan nagbutang hin mga kampo ha tuna han Juda ngan ha mga syudad han Efraim nga ginsakop han iya tatay nga hi Asa.+
3 Hi Jehova padayon nga inupod kan Jehosafat kay ginsunod niya an pagkinabuhi hadto han iya kaapoy-apoyan nga hi David+ ngan waray hiya mamiling ha mga Baal.
4 Kay ginbiling niya an Dios han iya tatay+ ngan ginsunod an* iya sugo ngan diri an mga binuhatan han Israel.+
5 Padayon nga gin-establisar hin marig-on ni Jehova an ginhadian ha iya kamot;+ ngan an bug-os nga Juda padayon nga naghatag hin mga regalo kan Jehosafat, ngan hura hiya hin karikohan ngan kadungganan.+
6 Nagin maisugon hiya ha pagsunod han mga dalan ni Jehova, ngan iya pa ngani ginpananggal an higtaas nga mga lugar+ ngan an sagrado nga mga poste*+ ha Juda.
7 Ha ikatulo ka tuig han iya paghadi iya iginpatawag an iya mga prinsipe nga hira Ben-hail, Obadias, Zacarias, Netanel, ngan Micaias basi magtutdo ha mga syudad han Juda.
8 May kaupod hira nga mga Levita: hira Semaias, Netanias, Zebadias, Asahel, Semiramot, Jehonathan, Adonias, Tobias, ngan Tob-adonias, ngan kaupod nira hira Elisama, ngan Jehoram nga mga saserdote.+
9 Nagtikang hira panutdo ha Juda, dara nira an libro han Balaud ni Jehova,+ ngan ginlibot nira an ngatanan nga syudad han Juda ha pagtutdo ha mga tawo.
10 Ngan an duro nga kahadlok kan Jehova gin-abat han ngatanan nga ginhadian han mga tuna ha palibot han Juda, ngan waray hira makiggirra kan Jehosafat.
11 Ngan an mga Filisteo nagdara hin mga regalo kan Jehosafat ngan hin kwarta sugad nga bayad.* An mga Arabo nagdara ha iya hin 7,700 nga karnero nga lalakí ngan 7,700 nga kanding nga lalakí tikang ha ira mga panon.
12 Hi Jehosafat padayon nga nagin mas gamhanan,+ ngan nagpadayon hiya pagtukod hin pinader nga mga lugar+ ngan mga syudad nga bodega+ ha Juda.
13 Naghimo hiya hin dagku nga mga proyekto ha mga syudad han Juda, ngan may-ada hiya mga sundalo, nga magkusog nga mga girriro ha Jerusalem.
14 Ini hira gin-grupo uyon ha ira mga panimalay:* tikang ha Juda an mga lider han kada 1,000, hi Adnah an lider, ngan kaupod niya an 300,000 nga magkusog nga girriro.+
15 Ngan ilarom han iya pagpanguna an lider nga hi Jehohanan, ngan kaupod niya an 280,000.
16 Ngan ilarom liwat han iya pagpanguna hi Amasias nga anak ni Zikri, nga nagboluntaryo para ha pag-alagad kan Jehova, ngan kaupod niya an 200,000 nga magkusog nga girriro.
17 Ngan tikang ha Benjamin,+ amo hi Eliada, usa nga makusog nga girriro, ngan kaupod niya an 200,000 nga lalaki nga may dara nga pana ngan taming.+
18 Ngan ilarom han iya pagpanguna hi Jehozabad, ngan kaupod niya an 180,000 nga lalaki nga ginbansay ha pagsundalo.
19 Ini hira nagsiserbi ha hadi labot pa han mga tawo nga iginbutang han hadi ha pinader nga mga syudad ha bug-os nga Juda.+
Mga footnote
^ Lit., “naglakat uyon ha.”
