An Ikaduha nga Libro han mga Cronicas 1:1-17
1 Nagin mas marig-on an paghadi ni Solomon nga anak ni David, ngan kaupod niya hi Jehova nga iya Dios ngan ginhimo hiya nga bantogan hinduro.+
2 Iginpatawag ni Solomon an bug-os nga Israel, an mga lider han kada 1,000 ngan han kada 100, an mga hukom, ngan an ngatanan nga lider han bug-os nga Israel, an mga ulo han mga panimalay.*
3 Katapos, hi Solomon ngan an bug-os nga kongregasyon kinadto ha hitaas nga lugar ha Gibeon,+ kay aadto an tolda nga katirokan han tinuod nga Dios, an tolda nga ginhimo ni Moises nga surugoon ni Jehova didto ha kamingawan.
4 Pero gindara ni David an Arka han tinuod nga Dios tikang ha Kiriat-jearim+ ngadto ha lugar nga igin-andam ni David para hito; nagtindog hiya hin tolda para hito ha Jerusalem.+
5 Ngan an halaran nga tumbaga*+ nga ginhimo ni Bezalel+ nga anak ni Uri nga anak ni Hur iginbutang ha atubangan han tabernakulo ni Jehova; ngan hi Solomon ngan an kongregasyon nag-aampo ha atubangan hito.*
6 Hi Solomon naghalad hin mga halad didto ha atubangan ni Jehova, ngan naghalad hiya hin 1,000 nga halad nga sinunog dida ha halaran nga tumbaga+ ha tolda nga katirokan.
7 Hito nga gab-i nagpakita an Dios kan Solomon ngan nagsiring ha iya: “Pangaro han karuyag mo nga ihatag ko ha imo.”+
8 Hi Solomon nagsiring ha Dios: “Nagpakita ka hin daku nga maunungon nga gugma ha akon tatay nga hi David,+ ngan ginhimo mo ako nga hadi kasaliwan niya.+
9 Yana, O Jehova nga Dios, hinaot matuman an imo saad kan David nga akon tatay,+ kay imo ako ginhimo nga hadi hin katawohan nga sugad kadamu han mga tapotapo ha tuna.+
10 Tagi ako yana hin kinaadman ngan kahibaro+ basi pangunahan ini nga katawohan,* kay hin-o an posible makaghukom hini nga imo damu nga katawohan?”+
11 Katapos, an Dios nagsiring kan Solomon: “Tungod kay ini an hingyap han imo kasingkasing ngan waray ka mangaro hin bahandi, karikohan, ngan kadungganan o han kamatayon* han mga nangangalas ha imo, waray ka liwat mangaro hin hilawig nga kinabuhi,* lugod nangaro ka hin kinaadman ngan kahibaro basi makaghukom han akon katawohan nga ha ira ginhimo ko ikaw nga hadi,+
12 tatagan ka hin kinaadman ngan kahibaro; pero tatagan ko liwat ikaw hin bahandi ngan karikohan ngan kadungganan nga waray mga hadi nga nauna ha imo an nagkaada hito ngan waray masunod ha imo an magkakaada hito.”+
13 Salit hi Solomon inabot tikang ha hitaas nga lugar ha Gibeon,+ tikang ha atubangan han tolda nga katirokan, ngadto ha Jerusalem; ngan naghadi hiya ha Israel.
14 Hi Solomon padayon nga nagtirok hin mga karuwahe ngan mga kabayo;* may-ada hiya 1,400 nga karuwahe ngan 12,000 nga kabayo,*+ ngan iya ito iginbutang ha mga syudad para han mga karuwahe+ nga hirani ha hadi ha Jerusalem.+
15 An silber ngan an bulawan ha Jerusalem ginhimo han hadi nga magin sugad kadamu han mga bato,+ ngan an kahoy nga sedro magin sugad kadamu han mga kahoy nga sikomoro ha Sefela.+
16 An mga kabayo ni Solomon gin-angkat tikang pa ha Ehipto,+ ngan ginpapalit han mga negosyante han hadi an mga kabayo nga panon-panon* sumala ha pamresyohan.+
17 An tagsa nga karuwahe nga gin-angkat tikang ha Ehipto nagkakantidad hin 600 ka bug-os nga silber, ngan an usa nga kabayo nagkakantidad hin 150; ngan ira ito iginbabaligya ha ngatanan nga hadi han mga Hiteo ngan mga hadi han Sirya.
Mga footnote
^ Ha Ingles, copper.
^ O “nagpapakiana ha Iya didto.”
^ Lit., “basi gumawas ha atubangan hini nga katawohan ngan basi sumulod.”
^ O “kalag.”
^ Lit., “damu nga adlaw.”
^ O “mga parapangabayo.”
^ O “mga parapangabayo.”
^ O posible nga “tikang ha Ehipto ngan tikang ha Kue; an mga negosyante han hadi napalit hito tikang ha Kue,” bangin nagtutudlok ha Cilicia.
