An Ikaduha nga Libro han mga Cronicas 16:1-14

  • Kasabotan ni Asa ha Sirya (1-6)

  • Ginsaway ni Hanani hi Asa (7-10)

  • Kamatayon ni Asa (11-14)

16  Ha ika-36 ka tuig han paghadi ni Asa, hi Hadi Baasa+ han Israel sinulong ha Juda ngan nagtikang pagtukod* han Rama+ basi pugngan an bisan hin-o ha paggawas o pagkadto kan* Hadi Asa han Juda.+  Ngan igin-gawas ni Asa an silber ngan bulawan tikang ha mga tiripigan hin bahandi ha balay ni Jehova+ ngan ha balay* han hadi ngan iginpadara ito ngadto kan Hadi Ben-hadad han Sirya,+ nga naukoy ha Damasco, nga nasiring:  “May-ada kasabotan butnga ha aton nga duha ngan butnga han akon tatay ngan han imo tatay. Nagpadara ako ha imo hin silber ngan bulawan. Kadi, talapasa an imo kasabotan kan Hadi Baasa han Israel, basi umatras hiya tikang ha akon.”  Hi Ben-hadad namati kan Hadi Asa ngan ginsugo an mga lider han iya mga kasundalohan kontra ha mga syudad han Israel, ngan ira ginsakop an Ijon,+ Dan,+ Abel-maim, ngan an ngatanan nga bodega han mga syudad han Neptali.+  Pakabati hito ni Baasa, inundang dayon hiya ha pagtukod* han Rama ngan ginbayaan an iya ginbubuhat dida hito.  Katapos, igin-upod ni Hadi Asa an bug-os nga Juda, ngan ira gindara an mga bato ngan mga kahoy ha Rama+ nga gin-gamit ni Baasa ha pagtukod,+ ngan gin-gamit ito niya ha pagtukod* han Geba+ ngan han Mizpa.+  Hito nga panahon, hi Hanani+ nga nakakakita hin bisyon kinadto kan Hadi Asa han Juda ngan ginsidngan hiya: “Tungod kay sinarig* ka ha hadi han Sirya ngan waray ka sumarig* kan Jehova nga imo Dios, an kasundalohan han hadi han Sirya nakapalagiw tikang ha imo.+  Diri ba an mga taga-Etiopia ngan an mga taga-Libya damu gud nga kasundalohan nga may damu nga karuwahe ngan parapangabayo? Pero tungod kay sinarig ka kan Jehova, igintubyan niya hira ha imo kamot.+  Kay an mga mata ni Jehova nagkikita ngadto-nganhi ha bug-os nga tuna+ basi ipakita an iya kusog* para hadton bug-os an kasingkasing ngadto* ha iya.+ Kalurongan an imo ginbuhat may kalabotan hini; tikang yana may-ada makikiggirra ha imo.”+ 10  Pero hi Asa nasina ha nakakakita hin bisyon ngan iginbutang hiya ha prisohan* kay duro an iya kasina ha iya tungod hini. Ngan ginmaltrato ni Asa an iba dida ha katawohan hito nga panahon. 11  An kasaysayan ni Asa, tikang ha tinikangan tubtob ha kataposan, iginsurat ha Libro han mga Hadi han Juda ngan han Israel.+ 12  Ha ika-39 ka tuig han paghadi ni Asa, nagkaada hiya hin sakit ha iya mga tiil tubtob nga naggrabe hiya; ngan bisan ha panahon nga may sakit hiya, waray hiya dumangop kan Jehova, lugod ha mga tambalan. 13  Katapos, hi Asa pinahuway kaupod han iya mga kaapoy-apoyan;+ namatay hiya ha ika-41 ka tuig han iya paghadi. 14  Salit iginlubong nira hiya ha maopay gud nga lubnganan nga iya gin-ukad para ha iya kalugaringon didto ha Syudad ni David,+ ngan an ira ginhay-aran ha iya puno hin lana han balsamo ngan iba-iba nga klase hin mga panakot ngan maghamot nga mga lana nga ginharalo.+ Dugang pa, naghimo hira hin talagsahon gud nga pagsunog ha pagpasidungog ha iya.*

Mga footnote

O “pagpader; pagtukod utro.”
O “pagbaya o pagsulod ha teritoryo ni.”
O “palasyo.”
O “pagpader; pagtukod utro.”
O “pagpader; pagtukod utro.”
Lit., “sinandig.”
Lit., “sumandig.”
O “suporta.”
O “bug-os an debosyon.”
Lit., “ha balay nga pandugan.”
Matin-aw nga diri ini pagsunog kan Asa, kondi pagsunog han mga panakot.