Psalm 90:1-17
Prea blo Moses, man blo datfala tru God.+
90 O Jehovah, lo evri genereson, iu nao olsem ples for mifala stap lo hem.*+
2 Bifor olketa maunten olketa formOr bifor iu wakem earth and disfala gud land,+Start from bifor kam and for olowe, iu nao God.+
3 Iu mekem man wea savve dae for go bak lo dust,Iu sei olsem: “Go bak, iufala olketa son blo man.”+
4 Bikos lo eye blo iu wan thousand year hem olsem yesterday nomoa wea go pas,+Olsem nomoa samfala hour lo naet.*
5 Iu swipim olketa go,+ olketa kamap olsem man wea sleep short taem nomoa.
Lo morning olketa olsem grass wea grow.+
6 Lo morning hem garem flaoa and luk fresh,Bat lo evening hem wik and hem drae.+
7 Kros blo iu hem distroem mifala+And mifala fraet tumas bikos lo kros blo iu.
8 Iu putim olketa mistek blo mifala front lo iu.*+
Laet from feis blo iu showim klia olketa secret blo mifala.+
9 Olketa days* blo mifala go pas kwiktaem bikos lo kros blo iu,Olketa years blo mifala finis olsem brith nomoa.
10 Laef blo mifala savve kasem 70 years,Or 80+ years sapos man hem strong.*
Bat olketa fulap witim trabol and pain nomoa,Olketa go pas kwiktaem, and mifala go nao.+
11 Hu nao fit for minim gud paoa blo kros blo iu?
Kros blo iu hem big tumas semsem olsem wei for fraet lo iu wea iu fit for kasem.+
12 Teachim mifala hao for kaontem olketa day blo mifala+Mekem mifala savve garem heart wea wise.
13 O Jehovah,+ iu kam bak! Hao long nao bae diswan gohed?+
Iu sorre lo mifala olketa servant blo iu.+
14 Lo morning, showim loyal love* blo iu+ lo mifala,Mekem mifala savve singaot witim hapi, and hapi+ lo full taem wea mifala laef.
15 Iu mekem mifala for hapi followim haomas day iu mekem mifala safa,+Followim haomas year wea mifala kasem trabol.+
16 Olketa servant blo iu mas lukim olketa samting iu duim,And olketa son blo olketa mas lukim glory blo iu.+
17 Jehovah, God blo mifala bae showim kaenfala fasin lo mifala,Bae iu mekem wanem mifala duim hem kamap gud.
Yes, mekem wanem mifala duim hem kamap gud.+
