Psalm 9:1-20
For director, for followim tune hia Muth-labben.* Singsing blo David.
א [Aleph]
9 O Jehovah, mi bae praisem iu witim full heart blo mi,Mi bae story abaotem evri nambawan waka wea iu duim.+
2 Mi bae hapi and barava hapi bikos lo iu,Mi bae singsing for praisem* nem blo iu, O Most Hae.+
ב [Beth]
3 Taem olketa enemy blo mi muv go bak from mi,+Olketa bae stambol and dae front lo iu.
4 Bikos iu defendim mi for stret samting mi duim,Iu sidaon lo throne blo iu and judge followim raeteous wei.+
ג [Gimel ]
5 Iu tok strong lo olketa nation+ and distroem wicked pipol,Iu rabemaot nem blo olketa for olowe.
6 Datfala enemy hem distroe for olowe,Iu aotem finis olketa taon blo olketa,And no eniwan bae rememberim olketa moa.+
ה [He]
7 Bat Jehovah hem sidaon lo throne for olowe.+
Hem setimap throne blo hem mekem justice kamap.+
8 Hem bae judgem pipol wea stap lo earth followim raeteous fasin.+
Hem bae judgem olketa nation followim olketa disison wea raeteous.+
ו [Waw]
9 Jehovah bae kamap wanfala sef ples,* for olketa wea pipol treatim nogud lo olketa,+Wanfala sef ples for haed lo olketa taem blo trabol.+
10 Olketa wea savve gud lo nem blo iu bae trustim iu.+
O Jehovah, bae iu no lusim olketa wea lukaotem iu.+
ז [Zayin]
11 Singsing for praisem Jehovah, wea hem stap lo Zion.
Talemaot lo pipol olketa samting wea hem duim.+
12 Bikos Man wea garem raet for pei bak lo blood blo olketa, hem tingim olketa,+Hem bae no forgetim krae blo olketa wea barava safa.+
ח [Heth]
13 O Jehovah, iu kaen lo mi, lukim nogud samting wea pipol wea heitim mi duim,Iu wea liftim mi aot from olketa gate blo dae,+
14 Mekem mi savve talemaot olketa samting wea iu duim wea fit for kasem praise, lo olketa gate blo dota blo Zion,+And for hapi lo wanem iu duim for sevem mi.+
ט [Teth]
15 Olketa nation sink daon insaed hol olketa digim,Leg blo olketa pas insaed trap* wea olketa seleva haedem.+
16 Pipol savve lo Jehovah bikos lo judgment wea hem givim.+
Wicked man hem trap lo samting wea hand blo hemseleva duim.+
Higgaion.* (Selah)
י [Yod ]
17 Wicked pipol bae go bak lo Grev,*Evri nation wea forgetim God.
18 Bat God bae evritaem tingim man wea poor,+Or hope wea hambol man garem bae no savve finis.+
כ [Kaph]
19 O Jehovah, plis, getap! No letem man wea savve dae hem win.
Iu nao bae judgem olketa nation wea stap front lo iu.+
20 O Jehovah, mekem olketa for fraet,+And mekem olketa nation savve dat olketa man nomoa, wea savve dae. (Selah)
Olketa footnote
^ Lukim “Muth-labben” lo Dictionary.
^ Or, “pleim music for.”
^ Or, “ples wea stap hae wea sef.”
^ Lit., “net.”
