Psalm 60:1-12
For director. For pleim followim tune hia “Lily wea Olsem Reminder.” Miktam.* Blo David. For teachim man. Taem hem faet witim Aram-naharaim and Aram-Zobah, and Joab go bak and killim dae 12,000 Edomite lo Valley blo Salt.+
60 O God, iu rejectim mifala, iu daonem mifala finis.+
Iu bin kros lo mifala, bat distaem acceptim mifala bak!
2 Iu mekem earth hem seksek, and iu splitim for hem open.
Fixim bak olketa ples lo hem wea krak, bikos hem gogo for foldaon.
3 Iu bin mekem pipol blo iu for kasem hard taem.
Iu mekem mifala drinkim wine wea mekem mifala no wakabaot stret.+
4 Showim* wanfala saen for olketa wea fraet lo iuFor olketa ranawe and misstim datfala bow. (Selah)
5 Mekem olketa wea iu lovem bae olketa sev,Sevem mifala witim raet hand blo iu and ansarem mifala.+
6 God wea holy hem tok kam and sei:
“Mi bae hapi for givim go Shechem olsem wanfala inheritance,+And mi bae divaedem datfala Valley* blo Succoth.+
7 Gilead hem blo mi, and Manasseh tu hem blo mi,+And Ephraim hem helmet for hed blo mi,Judah nao datfala stik blo komanda blo mi.+
8 Moab hem basin blo mi for waswas.+
Bae mi torowem sandol blo mi ovam Edom.+
Bae mi win ovam Philistia and singaot witim hapi.”+
9 Hu nao bae tekem mi go lo datfala taon wea olketa raonem?*
Hu nao bae leadim mi go kasem Edom?+
10 Hao, hem no iu O God, wea rejectim mifala,God blo mifala, wea no leadim nao army blo mifala?+
11 Helpem mifala taem mifala kasem trabol,Bikos wanem olketa man duim for sevem man hem iusles nomoa.+
12 God nao bae givim mifala strong,+And hem bae stepim olketa enemy blo mifala.+
