Psalm 20:1-9

  • God sevem king wea hem anointim

    • Samfala depend lo olketa chariot and olketa horse, ‘bat mifala kol lo nem blo Jehovah’ (7)

For director. Singsing blo David. 20  Jehovah bae ansarem iu lo day blo trabol. Nem blo God blo Jacob nao bae protectim iu.+  2  Bae hem givim kam help from datfala holy ples+And from Zion bae hem strongim iu.+  3  Bae hem rememberim evri offering blo iu wea iu givim olsem present. Bae hem hapi for acceptim burnt offering* blo iu.* (Selah)  4  Bae hem givim iu evri samting wea heart blo iu laekem+And bae hem mekem evri plan* blo iu for kamap gud.  5  Mifala bae singaot from mifala hapi lo olketa samting iu duim for sevem man.+ Mifala bae holem ap olketa saen blo mifala for nem blo God blo iumi.+ Jehovah nao bae givim evri samting wea iu askem.  6  Distaem nao mi savve dat Jehovah hem sevem anointed wan blo hem.+ Hem ansarem hem from holy ples blo hem lo hevenWitim raet hand blo hem,* hem sevem hem.*+  7  Samfala depend lo olketa chariot and olketa narawan lo olketa horse,+Bat mifala kol lo nem blo Jehovah, God blo mifala.+  8  Olketa wik and foldaon finis,Bat mifala getap and strong bak moa.+  9  O Jehovah, sevem datfala king!+ Hem bae ansarem mifala lo day wea mifala singaot for help.+

Olketa footnote

^ Lukim “Burnt offering” lo Dictionary.
^ Lit., “ting lo datfala burnt offering olsem hem gris naes.”
^ Or, “disison.”
^ Or, “bigfala paoa.”
^ Or, “win lo olketa faet.”

Copyrights for disfala pablikeson