Psalm 65:1-13
For director. Singsing blo David. Wanfala song.
65 O God, iu bae kasem praise lo Maunt Zion,+Bae mifala keepim promis blo mifala witim iu.+
2 O Man wea herem olketa prea, evri difren kaen pipol bae kam lo iu.+
3 Olketa mistek blo mi hem tumas for mi nao,+Bat iu forgivim olketa sin blo mifala.+
4 Man wea iu chusim and tekem kam klosapFor stap lo olketa courtyard blo iu hem hapi.+
Mifala bae satisfae witim olketa gud samting mifala kasem lo haos blo iu,+Lo holy temple* blo iu.+
5 Iu bae ansarem mifala witim olketa nambawan samting iu duim,+ followim raeteous fasin blo iu,O God wea sevem mifala.
Pipol lo olketa farawe ples lo earth+And wea stap lo olketa farawe ples lo sea olketa trustim iu.
6 Lo paoa blo iu,* iu mekem olketa maunten stap strong,Iu* werem paoa olsem kaleko.+
7 Iu* mekem raf sea for hem kwaet,+Witim olketa wave blo hem wea brek, and big noes blo olketa nation.+
8 Olketa pipol wea stap lo olketa farawe ples, bae sapraes lo olketa nambawan samting* wea iu duim,+Iu bae mekem olketa wea stap lo ples wea sun kamap, and lo ples wea sun go daon, for singaot from olketa hapi.
9 Iu kea for disfala earth,Iu mekem hem garem staka kaikai wea barava healthy.+
Stream wea kam from God hem fulap lo wata,Iu provaedem grain for olketa,+Bikos hem nao hao iu redyim disfala earth.
10 Iu mekem wata fulap lo olketa row blo hem, and levelem graon* blo hem wea olketa houm finis,Iu givim smol rain for mekem graon soft, and iu blessim olketa samting wea grow lo hem.+
11 Iu blessim year witim olketa gud samting, olsem iu putim kraon lo hem,Olketa road blo iu fulap witim olketa gud samting gogo olketa kapsaet.+
12 Olketa ples for animal kaikai lo hem lo wilderness, bae garem staka grass,+And hapi bae kavarem olketa hill olsem kaleko.+
13 Olketa ples for animal kaikai lo hem bae fulap lo olketa animal,And lo olketa valley,* grain kavarem olketa olsem carpet.+
Olketa singaot witim hapi from olketa win, yes, olketa singsing.+
