Psalm 75:1-10
-
God hem judge followim stretfala wei
-
Wicked pipol bae drink lo kap blo Jehovah (8)
-
For director. For pleim followim singsing hia “No Distroem Mi.” Blo Asaph.+ Wanfala song.
75 Mifala talem thankiu lo iu, O God, mifala talem thankiu lo iu,Iu stap klosap lo mifala,*+And pipol talemaot olketa nambawan waka blo iu.
2 Iu tok olsem: “Taem mi markem for judge,Mi judge followim stretfala wei.
3 Taem earth and evri pipol wea stap lo hem olketa finis,Mi nao mekem olketa post blo hem for stap strong.” (Selah)
4 Mi tok olsem lo man wea savve tokplas, “Iu no tokplas,”And lo wicked man, “Iu no mekhae lo strong* blo iu.
5 No mekhae lo strong* blo iu for go hae antapOr praod lo toktok blo iu.
6 Bikos praise wea man kasem no kamFrom east or west or lo south.
7 Bikos God nao hem Judge.+
Hem savve daonem wanfala man and mekhae lo narawan.+
8 Bikos wanfala kap hem lo hand blo Jehovah,+Wine insaed lo hem gohed bubble and hem mix finis.
Bae hem pourimaot datwan,And evri wicked pipol lo earth nao bae drinkim, gogo kasem botom.”+
9 Bat mi, bae mi talemaot datwan for olowe,Bae mi singsing for praisem* God blo Jacob.
10 Bikos hem tok olsem: “Bae mi finisim evri strong* wea wicked pipol garem,Bat bae mi mekhae lo strong* wea raeteous pipol garem.”
