Psalm 132:1-18
Song blo Olketa wea Go Ap.
132 O Jehovah, plis iu tingim DavidAnd evri hard taem blo hem,+
2 Promis wea hem talem lo Jehovah,Hao hem promis lo datfala Paoaful God blo Jacob, and sei:+
3 “Bae mi no go insaed lo tent blo mi, wea hem haos blo mi.+
Bae mi no leidaon lo kusun chair blo mi, wea hem bed blo mi.
4 Bae mi no letem eye blo mi for sleep,Or satem eyelid blo mi
5 Go kasem taem mi faendem wanfala ples for Jehovah,Wanfala naes haos* for datfala Paoaful God blo Jacob.”+
6 Lukim! Mifala herem story abaotem diswan lo Ephrathah.+
Mifala lukim diswan lo olketa ples lo forest.+
7 Iumi go insaed lo haos blo hem,*+Iumi baodaon front lo footstool blo hem.+
8 O Jehovah, plis getap, iu kam lo ples blo iu for rest,+Iu and datfala Ark wea showim strong blo iu.+
9 Olketa priest blo iu mas werem raeteous fasin olsem kaleko,And olketa loyal wan blo iu mas singaot witim hapi.
10 Bikos lo servant blo iu David,No rejectim* anointed wan blo iu.+
11 Jehovah promis finis lo David,Bae hem no brekem wanem hem talem finis, wea sei:
“Wanfala lo olketa pikinini blo iu,*Bae mi putim lo throne blo iu.+
12 Sapos olketa son blo iu keepim covenant blo miAnd olketa reminder wea mi teachim lo olketa,+Olketa son blo olketa tuBae sidaon lo throne blo iu for olowe.”+
13 Bikos Jehovah chusim finis Zion.+
Hem laekem datfala ples for hem stap lo hem, and sei:+
14 “Diswan hem ples blo mi for rest for olowe.
Lo hia nao bae mi stap,+ bikos hem nao wanem mi laekem.
15 Mi bae barava blessim witim staka samting.
Bae mi givim kaikai lo pipol blo hem wea poor mekem olketa satisfae.+
16 Bae mi mekem olketa priest blo hem werem salvation olsem kaleko,+And olketa loyal wan blo hem bae singaot witim hapi.+
17 Bae mi mekem paoa* blo David for kamap big.
Mi redyim finis wanfala lamp for anointed wan blo mi.+
18 Bae mi mekem shame kavarem olketa enemy blo hem olsem kaleko,Bat datfala kraon lo hed blo hem bae shaen.”+
