Psalm 146:1-10

  • Trustim God and no olketa man

    • Taem man dae, tingting blo hem finis (4)

    • God liftimap olketa wea hevi hem daonem olketa (8)

146  Praisem Jah!*+ Mi bae praisem Jehovah witim full heart blo mi.+  2  Mi bae praisem Jehovah lo full laef blo mi. Bae mi singsing for praisem* God blo mi lo full laef blo mi.  3  No putim trust blo iu lo olketa leader*Or lo son blo man, wea no savve sevem man.+  4  Taem brith blo hem go aot, hem go bak lo graon,+Lo datfala sem day tingting blo hem finis nao.+  5  Man wea luk lo God blo Jacob for helpem hem, hem nao hapi,+Wea putim hope lo Jehovah, God blo hem.+  6  Hem Man wea Wakem skae and earth,And sea, and evri samting wea stap insaed lo olketa,+Datfala Man wea hem gohed faithful evritaem,+  7  Man wea givim justice lo olketa wea pipol ravem olketa,Man wea givim kaikai lo olketa wea hangere.+ Jehovah mekem olketa wea prisoner* kamap free.+  8  Jehovah openem eye blo olketa wea blind,+Jehovah liftimap olketa wea hevi hem daonem olketa,+Jehovah lovem olketa wea raeteous.  9  Jehovah protectim olketa foreigner wea stap,Hem provaed for pikinini wea no garem dadi and widow woman,+Bat hem spoelem plan blo wicked pipol.+ 10  Jehovah bae hem King for olowe,+Hem God blo iu, O Zion, for evri genereson. Praisem Jah!*

Olketa footnote

^ Or, “Hallelujah!” “Jah” hem short form lo nem blo Jehovah.
^ Or, “pleim music for.”
^ Or, “bigman.”
^ Lit., “pipol taengem.”
^ Or, “Hallelujah!” “Jah” hem short form lo nem blo Jehovah.

Copyrights for disfala pablikeson