Psalm 71:1-24
71 Lo iu, O Jehovah, mi kam for stap sef.
No letem pipol mek shame lo mi.+
2 From iu raeteous iu sevem mi and rescuem mi.
Tanem ear blo iu* kam lo mi and sevem mi.+
3 Iu kamap strong ples blo mi olsem wanfala rockWea evritaem mi savve go insaed.
Givim komand for sevem mi,Bikos iu nao rock blo mi and sef ples blo mi.+
4 O God blo mi, rescuem mi from hand blo wicked pipol,+From olketa wea hol taet lo mi and treatim mi nogud.
5 Bikos iu nao hope blo mi, O Sovereign Lord Jehovah.
Mi trustim iu start from taem mi young.+
6 Mi depend lo iu start from taem mi born.
Iu nao tekem mi aot from bele blo mami blo mi.+
Mi evritaem praisem iu.
7 For staka pipol mi olsem wanfala mirakol,Bat iu nao strongfala sef ples blo mi.
8 Mouth blo mi fulap witim toktok for praisem iu.+
Lo full day mi story abaotem glory blo iu.
9 No rejectim mi taem mi olo.+
No lusim mi taem strong blo mi hem gogo daon.+
10 Olketa enemy blo mi tok againstim mi,Olketa wea lukaotem mi mekem plan for killim mi dae,+
11 Olketa sei: “God lusim hem finis.
Aftarem and kasholem hem, bikos no eniwan bae sevem hem.”+
12 O God, iu no stap farawe from mi.
Kwiktaem kam for helpem mi, O God blo mi.+
13 Olketa wea againstim miBae kasem shame and bae finis.+
Olketa wea kosim trabol for miBae shame tumas and feel nogud.+
14 Bat mi, bae mi gohed for weit.
Bae mi praisem iu go moa.
15 Mouth blo mi bae tok abaotem raeteous fasin blo iu,+Lo full day olketa samting wea iu duim for sevem man,Nomata olketa samting hia staka tumas for mi understandim.*+
16 Bae mi kam and story abaotem olketa big samting wea iu duim,O Sovereign Lord Jehovah.
Bae mi tok abaotem raeteous fasin blo iu nomoa.
17 O God, iu bin teachim mi from taem mi young,+And kam kasem distaem mi gohed talemaot olketa nambawan waka blo iu.+
18 Nomata mi olo and garem gray hair, O God, no lusim mi.+
Letem mi story abaotem paoa* blo iu lo next generesonAnd abaotem olketa bigfala samting iu duim, lo evriwan wea bae born kam bihaen.+
19 O God, raeteous wei blo iu hem hae tumas.+
Iu bin duim olketa bigfala samting,O God, no eniwan nao hem olsem iu.+
20 Nomata iu letem mi for kasem staka hard taem and trabol,+Iu mekem mi strong bak moa,Liftim mi ap from botom* lo graon.+
21 Iu mekem bignem wea mi garem for big go moaAnd iu stap witim mi and comfortim mi.
22 Then bae mi praisem iu witim string instrumentBikos iu faithful, O God blo mi.+
Bae mi singsing for praisem* iu witim harp,O Holy Wan blo Israel.
23 Lips blo mi bae singaot witim hapi, taem mi singsing for praisem iu,+Bikos iu sevem laef blo mi.*+
24 Lo full day tongue blo mi bae story abaotem raeteous wei blo iu,+Bikos olketa wea lukaotem mi for finisim mi, bae shame and feel nogud.+
