Psalm 141:1-10
Singsing blo David.
141 O Jehovah, mi kol go lo iu.+
Kam kwiktaem for helpem mi.+
Lisin gud taem mi kol go lo iu.+
2 Mi laekem prea blo mi wea mi redyim, hem olsem incense+ front lo iu,+And hand wea mi liftimap hem olsem grain offering* lo evening.+
3 O Jehovah, putim security for gaedem mouth blo mi,Putim security for gaedem door lo lips blo mi.+
4 No letem heart blo mi tane for duim eni nogud samting,+For joinim olketa nogud man for duim rabis samting.
Mi bae no enitaem kaikaim olketa naes kaikai witim olketa.
5 Sapos raeteous man whipim mi, datwan showimaot loyal love.*+
Sapos hem stretem mi, datwan hem olsem oil antap hed blo mi,+Wea hed blo mi bae no enitaem les lo hem.+
Prea blo mi bae no stop nomata olketa kasem trabol.
6 Nomata olketa torowem olketa judge blo olketa go daon lo klif,Pipol bae lisin gud lo olketa toktok blo mi, bikos olketa gud tumas.
7 Lo sem wei wea samwan houm and pisisim graon,So olketa bon blo mifala tu olketa spredim finis lo mouth blo Grev.*
8 Bat mi luk go lo iu, O Sovereign Lord Jehovah.+
Mi go lo iu for stap sef.
No killim mi dae.
9 Protectim mi from olketa trap wea olketa putim for mi foldaon insaed,From olketa trap blo wicked pipol.
10 Evri wicked pipol bae foldaon insaed olketa net wea olketa seleva putim+Bat mi bae go pas sef.
