Nkunga 21:1-13

  • Balusakumunu na ntotila yina ke tudilaka Yehowa ntima

    • Nzambi me pesa ntotila luzingu ya nda (4)

    • Bambeni ya Nzambi ta bela bitumba (8-12)

Na ntwadisi. Nkunga ya Davidi. 21  O Yehowa, ntotila ke wa kiese sambu na ngolo na nge;+Yandi ke wa kiese kibeni sambu nge ke gulusaka!+   Nge me lungisa nzala ya ntima na yandi,+Mpi nge me buya ve kupesa yandi kima yina munoko na yandi me lomba. (Sela)   Sambu nge me pesa yandi balusakumunu mingi;Nge me tula mpu ya kimfumu ya wolo ya mbote* na ntu na yandi.+   Yandi lombaka nge luzingu, mpi nge pesaka yandi yo,+Luzingu ya nda,* mvula na mvula.   Sambu nge ke gulusaka, yo ke natila yandi nkembo ya nene.+ Nge me pesa yandi nkembo mpi lukumu.   Nge me sakumuna yandi kimakulu;+Nge me sala nde yandi wa kiese sambu nge* kele ti yandi.+   Sambu ntotila ke tula ntima na Yehowa;+Sambu na zola ya kwikama ya Muntu ya Kuluta Zulu, yandi ta nikana ve* ata fioti.+   Diboko na nge ta kanga bambeni na nge yonso;Diboko na nge ya kitata ta kanga bantu yina ke mengaka nge.   Nge ta kumisa bo bonso fulu ya tiya na ntangu ya me tulamaka ntangu nge ta tudila bo dikebi. Yehowa ta mina bo na makasi na yandi, mpi tiya ta yoka bo.+ 10  Nge ta fwa bana* na bo na ntoto,Mpi bantekolo na bo na kati ya bana ya bantu. 11  Sambu bo kanaka kusala nge mambu ya mbi;+Bo me yindula bangindu ya mbi yina ta nunga ve.+ 12  Sambu nge ta sala nde bo vutuka nima+Na mutindu nge ta balula munduki na nge ya tolo-tolo* na ndambu na bo.* 13  O Yehowa, telama na ngolo na nge. Beto ta yimba bankunga* sambu na kukumisa ngolo na nge.

Banoti na nsi ya lutiti

To “ya bunkete.”
Na kisina, “Nda ya bilumbu.”
Na kisina, “luse na nge.”
To “ta tambula ve na lunziungu.”
Na kisina, “mbuma.”
Na kisina, “bansinga ya munduki ya tolo-tolo na nge.”
Na kisina, “na baluse na bo.”
Na kisina, “ta yimba mpi ta bula miziki.”