Nkunga 89:1-52

  • Kuyimbila zola ya kwikama ya Yehowa

    • Kuwakana ti Davidi (3)

    • Bana ya Davidi ta zinga kimakulu (4)

    • Muntu yina Nzambi me tulaka mafuta ke binga yandi “Tata” (26)

    • Kuwakana ya Davidi kele ya kieleka (34-37)

    • Muntu lenda tina ve Maziamu (48)

Maskile.* Ya Etani+ mwana ya Ezra. 89  Mono ta yimba kimakulu mambu ya ke monisa zola ya kwikama ya Yehowa. Ti munoko na mono, mono ta zabisa kwikama na nge na bandonga yonso ya bantu.   Sambu mono me tuba nde: “Zola ya kwikama ta zinga* kimakulu;+Mpi nge me tulaka kwikama na nge ngolo na zulu.”   “Mono me sala kuwakana ti muntu yina mono me solaka;+Mono me zenga kieleka sambu na nsadi na mono Davidi:+   ‘Mono ta tedimisa ngolo bana* na nge+ kimakulu,Mpi mono ta tunga kiti na nge ya kimfumu sambu na bandonga yonso ya bantu.’”+ (Sela)   Zulu ke kumisaka mambu na nge ya kuyituka, O Yehowa,Ee, kwikama na nge na dibundu ya basantu.   Sambu nani me fwanana ti Yehowa kuna na zulu?+ Na kati ya bana ya Nzambi,+ nani kele bonso Yehowa?   Bo ke waka Nzambi boma na lukutakanu* ya basantu;+Yandi kele nene mpi ke pesaka boma na bayina yonso kele na nziunga na yandi.+   O Yehowa Nzambi ya makesa,Nani kele ngolo bonso nge, O Yah?+ Kwikama na nge me ziunga nge.+   Nge ke yalaka kudasuka ya nzadi-mungwa;+Ntangu bitembo na yo ke tombukaka, nge ke lembikaka yo.+ 10  Nge me bedisa kibeni Rahabi+ bonso muntu yina bo me fwa.+ Nge me panza bambeni na nge ti diboko na nge ya ngolo.+ 11  Zulu kele ya nge, mpi ntoto kele ya nge;+Ntoto yina ke butaka ti bima yina ke fulusaka yo+—nge muntu salaka yo. 12  Nordi ti sudi—nge muntu gangaka yo;Tabore+ ti Ermoni+ ke kumisaka zina na nge na kiese. 13  Diboko na nge kele kikesa;+Diboko na nge kele ngolo;+Diboko na nge ya kitata kele ya kunanguka.+ 14  Lunungu ti kusungama kele fondasio ya kiti na nge ya kimfumu;+Zola ya kwikama ti kwikama ke vandaka na ntwala na nge.+ 15  Kiese na bantu yina me zaba milolo ya kiese.+ O Yehowa, bo ke tambulaka na nsemo ya luse na nge. 16  Bo ke vandaka na kiese sambu na zina na nge kilumbu ya mvimba,Mpi na lunungu na nge, bo kele ya kunanguka. 17  Sambu nge kele nkembo ya ngolo na bo,+Mpi kana nge ndima beto, ngolo* na beto ta kuma mingi.+ 18  Sambu kitaninu na beto ke katuka na Yehowa,Ntotila na beto ke katuka na Santu ya Izraele.+ 19  Na ntangu yina nge tubilaka bantu na nge ya kwikama na mbona-meso nde: “Mono me pesa ngolo na muntu mosi ya ngolo;+Mono me nangula muntu mosi ya bo me solaka na kati ya bantu.+ 20  Mono me mona Davidi nsadi na mono;+Mono me tula yandi mafuta na mono ya santu.+ 21  Diboko na mono ta sadisa yandi,+Mpi diboko na mono ta pesa yandi kikesa. 22  Mbeni mosi ve ta lomba yandi kitadi,Mpi muntu mosi ve ya kukonda lunungu ta niokula yandi.+ 23  Mono ta zenga bambeni na yandi bitini-bitini na ntwala na yandi+Mpi mono ta fwa bantu yina ke mengaka yandi.+ 24  Kwikama na mono mpi zola na mono ya kwikama kele ti yandi,+Mpi ngolo na yandi ta kuma mingi na nsadisa ya zina na mono. 25  Mono ta tula diboko* na yandi na zulu ya nzadi-mungwaMpi diboko na yandi ya kitata na zulu ya banzadi.+ 26  Yandi ta binga mono: ‘Nge kele Tata na mono,Nzambi na mono mpi Ditadi ya luguluku na mono.’+ 27  Mpi mono ta tula yandi bonso mwana ya ntete,+Muntu ya kunanguka na kati ya bantotila ya ntoto.+ 28  Mono ta tanina zola na mono ya kwikama sambu na yandi kimakulu,+Mpi kuwakana na mono ti yandi ta fwa ve ata fioti.+ 29  Mono ta tedimisa mwana* na yandi kimakuluMpi mono ta sala nde kiti na yandi ya kimfumu kuzinga mingi bonso zulu.+ 30  Kana bana na yandi kubikisa nsiku na monoMpi bo tambula ve na kuwakana ti bantuma* na mono, 31  Kana bo fwa bansiku na monoMpi bo zitisa ve bantuma na mono, 32  Mono ta pesa bo ndola ti nti sambu na kukonda bulemfu* na bo.+Mpi ti fimbu sambu na bifu na bo. 33  Kansi mono ta yambula ve ata fioti zola na mono ya kwikama sambu na yandi+To kukonda kulungisa lusilu na mono.* 34  Mono ta fwa ve kuwakana na mono,+To kusoba mambu yina munoko na mono me tuba.+ 35  Mono me zenga kieleka na busantu na mono, mbala mosi imene;Mono ta tubila ve Davidi luvunu.+ 36  Bana* na yandi ta zinga kimakulu;+Kiti na yandi ya kimfumu ta zinga bonso ntangu na ntwala na mono.+ 37  Bonso ngonda, yo ta tulama ngolo kimakuluBonso mbangi ya kwikama na zulu.” (Sela) 38  Kansi nge mosi me buya yandi mpi me losa yandi;+Nge me wila muntu yina nge me tulaka mafuta makasi. 39  Nge me losa kuwakana ya nge salaka ti nsadi na nge;Nge me vweza mpu na yandi ya kimfumu na mutindu nge me losa yo na ntoto. 40  Nge me bwisa bibaka na yandi yonso ya matadi;*Nge me kumisa balupangu na yandi ya ngolo mayumbu. 41  Bantu yonso yina ke luta pene-pene me yiba-yiba bima na yandi;Bantu yina ke zingaka pene-pene na yandi ke pesa yandi nsoni.+ 42  Nge me nungisa bambeni na yandi;*+Nge me sala nde bambeni na yandi yonso kuwa kiese. 43  Nge me vutula mpi mbele na yandi ya bitumba na nima,Nge me sala nde yandi bela bitumba. 44  Nge me sukisa lukumu na yandiMpi nge me losa kiti na yandi ya kimfumu na ntoto. 45  Nge me kumisa nkufi bilumbu ya kileke na yandi;Nge me lwatisa yandi nsoni. (Sela) 46  Tii nki ntangu, O Yehowa, nge ta kudibumba? Keti yo ta vanda kimakulu?+ Keti makasi na nge ta landa kupela bonso tiya? 47  Yibuka mutindu luzingu na mono kele nkufi!+ Keti nge gangaka bantu yonso kukonda kikuma? 48  Inki muntu lenda zinga mpi kufwa ve?+ Keti yandi lenda kudigulusa* na ngolo ya Maziamu?* (Sela) 49  O Yehowa, wapi mambu na nge ya ntama ya ke monisa zola ya kwikama,Yina nge zengaka kieleka na Davidi sambu na yo na kwikama na nge?+ 50  O Yehowa, yibuka masota yina bo ke sosila bansadi na nge;Mutindu mono fwete nata* masota ya bantu yonso; 51  A mutindu bambeni na nge me finga, O Yehowa;A mutindu bo me finga konso kitambi ya muntu yina nge me tulaka mafuta. 52  Bika Yehowa kubaka lukumu kimakulu. Amen mpi Amen.+

Banoti na nsi ya lutiti

Na kisina, “tungama.”
Na kisina, “nkuna.”
To “dibundu.”
Na kisina, “kibongo.”
To “kiyeka.”
Na kisina, “nkuna.”
To “balusambisu.”
To “kukolama.”
Na kisina, “To kuta luvunu na kwikama na mono.”
Na kisina, “Nkuna.”
To “bisika na yandi ya lutaninu ya matadi.”
Na kisina, “me nangula diboko ya kitata ya bambeni na yandi.”
To “gulusa moyo na yandi.”
Na kisina, “diboko ya Sheole,” disongidila, maziamu ya bantu yonso. Tala Bantendula ya Bangogo.
Na kisina, “nata na ntulu na mono.”