Nkunga 81:1-16
Na ntwadisi; na zulu ya Gititi*. Ya Asafi.+
81 Beno tula milolo ya kiese sambu na Nzambi, ngolo na beto.+
Beno tula milolo ya kununga sambu na Nzambi ya Yakobi.
2 Beno yantika kubula miziki mpi beno baka ngoma ya fioti,Kidare ya ke bulaka miziki ya kitoko mpi kima ya kubudila miziki ya kele ti bansinga.
3 Beno bula kibongo na ngonda ya mpa,+Ntangu ngonda kele ya mvimba, sambu na kilumbu ya nkinsi na beto.+
4 Sambu yo kele nsiku sambu na Izraele,Munsiku ya Nzambi ya Yakobi.+
5 Yandi tulaka yo bonso ngibusa sambu na Yozefi+Ntangu Yandi basikaka sambu na kunwanisa insi ya Ezipte.+
Mono waka mungungu* yina mono zabaka ve:
6 “Mono katulaka kizitu na dipeka na yandi;+Bo katulaka kitunga na maboko na yandi.
7 Nge bingaka mono ntangu nge vandaka na mpasi, mpi mono gulusaka nge;+Mono pesaka nge mvutu na kati ya dituti ya makelele ya nzasi.*+
Mono mekaka nge na bamasa ya Meriba.*+ (Sela)
8 Bantu na mono, beno wa, mono ta ta kimbangi sambu na kubedisa beno.
O Izraele, kana nge wilaka mono.+
9 Nzambi mosi ve ya nzenza ta vanda na kati na beno,Mpi nge ta fukimina ve nzambi ya nzenza.+
10 Mono, Yehowa, mono kele Nzambi na nge,Muntu yina basisaka nge na insi ya Ezipte.+
Kangula munoko na nge nene, mpi mono ta fulusa yo.+
11 Kansi bantu na mono waka ve ndinga na mono;Izraele lemfukilaka mono ve.+
12 Yo yina mono bikaka bo bo landa bantima na bo ya ngolo;Bo salaka mambu yina bo yindulaka nde yo vandaka mbote.*+
13 A kana bantu na mono wilaka mono!+A kana Izraele tambulaka na banzila na mono!+
14 Mono zolaka kubedisa nswalu bambeni na bo;Mono zolaka kubalula diboko na mono sambu na kunwanisa bambeni na bo.+
15 Bantu yina ke mengaka Yehowa ta fukama na ntwala na yandi na boma,Mpi nsuka* na bo ta vanda kimakulu.
16 Kansi yandi ta disa nge* ble ya kuluta kitoko*+Mpi yandi ta fulusa nge ti bwiki ya ke basika na ditadi.”+
Banoti na nsi ya lutiti
^ Tala Bantendula ya Bangogo.
^ To “ndinga.”
^ Na kisina, “na kisika ya kubumbana ya makelele ya nzasi.”
^ Yo ke tendula “Kuswana.”
^ Na kisina, “Bo tambulaka na bandongisila na bo.”
^ Na kisina, “ntangu.”
^ Na kisina, “yandi.” Disongidila, bantu ya Nzambi.
^ Na kisina, “ya mafuta.”
