Job 5:1-27
5 “!Plis, yu singaot! ?I gat wan man i ansa long yu?
?Hu long ol tabu man we bambae yu yu lukluk i go long hem?
2 From we fasin blong holem kros bambae i kilim man we i no gat hed,Mo jalus bambae i kilim i ded man we i no save tingting gud.
3 Mi mi luk finis man we i no gat hed i stap win gud,Be wantaem nomo trabol i kasem ples blong hem.
4 Ol boe blong hem oli no sef nating,Mo ol man oli spolem gud olgeta long get blong taon,+ we i no gat man blong sevem olgeta.
5 Man we i hanggri, i stap kakae ol kakae we hem i havestem,I stap tekem kakae tu long ol ropnil,Mo olting blong olgeta, ol man oli kam tekemaot.
6 From ol samting we i spolem man, oli no gru i kamaot long das,Mo ol trabol tu oli no gru i kamaot long graon.
7 From man i bon blong kasem trabol,Sem mak olsem smol faea we oltaem i sut i go antap.
8 Sipos mi, bambae mi apil long God,Mo bambae mi putum bisnes ya long han blong God,
9 Long Man ya we i stap mekem ol bigbigfala wok mo ol samting we man i no naf blong faenemaot,Ol gudgudfala samting we man i no save kaontem evriwan.
10 Hem i givim ren long wol yaMo i sanem wota i go long ol open ples.
11 Hem i leftemap man we i no impoten, i kam hae moa,Mo i leftemap man we i harem nogud, i sevem hem.
12 Hem i stap spolem plan blong ol man blong wokem trik,Nao wok we han blong olgeta i mekem, i no go gud.
13 Hem i yusum ol trik blong ol waes man blong kasem olgeta bakegen,+Nao ol plan blong man we i tingting gud, i foldaon.
14 Oli mitim tudak nating se i delaet yet,Mo oli stap puspusum han olbaot long medel dei olsem se i naet.
15 Hem i stap sevem man, blong naef blong faet long maot blong olgeta i no spolem hem,Hem i stap sevem puaman, i tekemaot hem long han blong man we i strong,
16 Mekem se ol man we oli no impoten, oli gat hop,Be ol man we oli no stret, hem i satem maot blong olgeta.
17 !Yu luk! Man we God i tok strong long hem, hem i glad.!Taswe yu no mas sakemaot fasin blong stretem man, we i kam long God Ya We i Gat Olgeta Paoa!
18 From hem i stap mekem man i harem nogud, be i stap fasem ol soa tu.Hem i stap brebrekem, be i stap hilim bakegen long prapa han blong hem.
19 Bambae hem i tekemaot yu long sikis trabol,Mo namba 7 trabol tu bambae i no spolem yu.
20 Long taem we kakae i sot, bambae hem i pemaot yu long ded,Mo long taem blong faet, bambae hem i tekemaot yu long paoa blong naef blong faet.
21 Bambae hem i protektem yu taem man i sakem ol tok agensem yu,+Mo bambae yu no fraet long bigfala trabol taem i kam.
22 Bambae yu laf long ol trabol mo long hanggri,Mo bambae yu no fraet long ol wael animol blong wol.
23 From ol ston long open ples bambae oli no spolem yu,*Mo ol wael animol long open ples bambae oli stap long pis wetem yu.
24 Bambae yu save se tent blong yu i sefgud,*Mo bambae i no gat samting i lus long graon blong yu taem yu go jekem.
25 Bambae yu glad long plante pikinini,Mo ol laen blong yu, bambae oli plante olsem ol gras long wol ya.
26 Bambae yu strong yet taem yu go long gref,Olsem ol bandel wit we oli hivimap long sisen blong olgeta.
27 !Yu luk! Mifala i stadi gud long samting ya, mo mifala i luk se i tru.
Yu lesin mo yu akseptem.”