Job 13:1-28

  • Job i gohed blong ansa (1-28)

    • ‘Mi mi glad moa blong toktok wetem God’ (3)

    • “Yufala evriwan i olsem ol rabis dokta” (4)

    • “Mi mi save se mi nao mi stret” (18)

    • Hem i askem from wanem God i luk hem olsem wan enemi (24)

13  “Yes, ae blong mi i bin luk olgeta samting ya,Mo sora blong mi i bin harem mo i kasemsave olgeta.   Samting we yufala i save, mi tu mi save.Mi mi no daon moa long yufala.   Long saed blong mi, mi mi glad moa blong toktok stret long God Ya We i Gat Olgeta Paoa.Mi wantem tumas blong agiu wetem God from kes blong mi.+   Be yufala i stap rabem ol giaman tok long mi.Yufala evriwan i olsem ol rabis dokta.+   I moa gud sipos yufala i stap kwaet nomo,Hemia bambae i soemaot se yufala i waes.+   Plis yufala i lesin long ol poen blong mi,Mo yufala i lesin gud long ol samting we mi stap askem.   ?Bambae yufala i talem ol tok we i no stret long bihaf blong God,Mo bambae yufala i talem ol giaman tok long bihaf blong hem?   ?Bambae yufala i tekem saed blong hem,*Bambae yufala i traem toktok from kes blong tru God?   ?Yufala i ting se evri samting bambae i go gud sipos hem i jekem yufala?+ ?Bambae yufala i mekful long hem, olsem we yufala i save mekem long man? 10  I sua se bambae hem i faerap long yufalaSipos yufala i traem blong haedem se yufala i laekem moa wan man i bitim narawan.+ 11  ?Yufala i no ting se haenem blong hem bambae i mekem yufala i seksek,Mo ol samting blong hem blong fraet, i kasem yufala? 12  Ol waestok* blong yufala oli ol proveb* we oli olsem asis nomo.Ol tok blong difendem yufala,* oli olsem klei we i save brok isi nomo. 13  Yufala i stap kwaet long fes blong mi, blong mi save toktok. !Biaen letem eni samting we i save kasem mi, i kasem mi! 14  ?From wanem mi putum mi wan long denja*Mo mi holem laef* blong mi long han blong mi? 15  Nating se hem i save kilim mi, be bambae mi wet yet,+Mi save agiu long fes blong God from kes* blong mi. 16  Nao hem bambae i kam sevia blong mi,+From we man we i no bilif long God,* i no save kam long fes blong hem.+ 17  Yufala i lesin gud long ol tok blong mi.Yufala i stap kwaet yufala i harem ol tok we mi stap talemaot. 18  Yufala i luk, mi mi rerem kot kes blong mi finis.Mi mi save se mi nao mi stret. 19  ?Hu bambae i kam fesem mi? !Bambae mi mi ded sipos mi stap kwaet nomo!* 20  Plis God, mi wantem se yu givim tu samting nomo long mi,*Olsem nao bambae mi no haed long fes blong yu. 21  Yu tekemaot han blong yu we i hevi, i go longwe long mi,Mo yu no letem fasin ya blong fraet long yu, i mekem mi mi fraet nogud.+ 22  Yu singaot, mo bambae mi ansa,O yu letem mi mi toktok, mo yu ansa long mi. 23  ?Wanem ol mastik mo ol sin blong mi? Yu soemaot long mi ol rong mo sin blong mi. 24  ?From wanem yu haedem fes blong yu+Mo yu luk mi se mi enemi blong yu?+ 25  ?Bambae yu traem mekem wan lif we win i stap blu long hem i fraetNo yu ron biaen long stamba blong drae gras? 26  From yu yu gohed blong raetemdaon ol rabis poen agensem mi,Mo yu mekem mi mi safa from ol sin we mi mekem taem mi yangfala. 27  Yu putum ol leg blong mi long ol stok*Yu jekemgud evri rod blong mi,Mo yu folem gud ol trak blong leg blong mi. 28  Nao man* i stap kam roten olsem wan samting we i roten finis,Olsem wan klos we ol bebet* oli kakae.

Ol futnot

NT: “yufala i mekem i gud moa long hem.”
NT: “Ol gudfala tok blong bifo.”
Yu luk Diksonari.
PT: “Ol aean blong yufala long medel blong ol sil.”
PT: “?From wanem mi stap karem mit blong mi long tut blong mi?”
NT: “sol.”
NT: “toktok from ol fasin.”
NT: “man blong apostasi.” Yu luk Diksonari.
MNT: “Sipos wan man i save mekem, bambae mi stap kwaet mo mi ded.”
PT: “Tu samting nomo yu no mas mekem long mi.”
Yu luk Diksonari.
PT: “hem,” maet hemia i minim Job.
PT: “mot.” Hemia wan bebet we i luk olsem bataflae.