Job 32:1-22

  • Yangfala Elihu i joenem storian (1-22)

    • Hem i kros long Job mo ol fren blong Job (2, 3)

    • Hem i no toktok yet, from we hem i gat respek (6, 7)

    • I no yia blong man nomo i mekem se man i waes (9)

    • Elihu i wantem tumas blong toktok (18-20)

32  Nao trifala man ya oli no moa traem ansa long Job, from we hem i bilif strong se hem nao i stret.*+  Be Elihu, boe blong Barakel we i laen blong Bus,+ we i wan famle blong Ram, i kros tumas. Hem i kros long Job bitim mak from we Job i traem blong pruvum se hem* nao i stret, i no God.+  Hem i kros tumas long trifala fren blong Job tu, from we oli no save faenem wan ansa, be oli stap talem se God i nogud.+  Elihu i stap wet blong ansa long Job, from we trifala ya i olfala moa long hem.+  Taem Elihu i luk we trifala man ya i no gat tok blong talem blong ansa long Job, hem i kam kros bitim mak.  Nao Elihu, boe blong Barakel we i laen blong Bus, i stat blong toktok i se: “Mi mi yangfala nomo*Mo yufala i olfala moa.+ Taswe mi no toktok from mi respektem yufala,+Mo mi no wantem talem long yufala samting we mi save.   Mi stap tingting se: ‘I gud man we i olfala* i toktok,Mo i gud man we i laef plante yia finis i tokbaot waes.’   Be spirit we i stap long ol man,Hemia win blong God Ya We i Gat Olgeta Paoa, hem nao i mekem se oli kasemsave samting.+   I no yia blong man nomo i mekem se man i waes,Mo i no ol olfala nomo we oli kasemsave samting we i stret.+ 10  Taswe mi talem se: ‘Yu lesin long mi,Mo bambae mi tu mi talem long yu samting we mi save.’ 11  !Yufala i luk! Mi mi stap wet long ol tok blong yufala,Mi gohed blong lesin long ol tingting blong yufala+Taem yufala i stap lukaot ol samting blong talem.+ 12  Mi stap lesin gud long yufala,Be i no gat wan long yufala i save pruvum se Job i rong*No i ansarem ol tok blong hem. 13  Taswe yufala i no mas talem se: ‘Mifala i faenem waes,God nao i talem se hem i rong, i no wan man.’ 14  Job i no stap toktok agensem mi,Taswe bambae mi no ansa long hem folem ol poen blong yufala. 15  Oli harem nogud, oli no moa gat ansa.Oli no moa gat wan tok i stap blong talem. 16  Mi stap wet, be oli no moa gohed blong toktok.Oli stanap i stap we oli no moa gat wan ansa blong talem. 17  Taswe mi tu bambae mi givim wan ansa.Mi tu bambae mi talem samting we mi save, 18  From we mi mi fulap gud long ol toktok,Spirit we i stap long mi, i stap pulum mi blong toktok. 19  Ol samting insaed long mi, i olsem waen we oli satemgud,Olsem ol niufala skin botel we oli rere blong bosta.+ 20  !Yufala i letem mi mi toktok, nao mi save harem gud! Bambae mi openem maot blong mi mo givim wan ansa. 21  Bambae mi no tekem saed blong eni man.+Mo bambae mi no switim eni man,* 22  From we mi mi no save olsem wanem blong switim man.Sipos mi mekem, kwiktaem nomo Man We i Mekem mi, bambae i kilim mi mi ded.

Ol futnot

NT: “from we hem i luk hem wan se hem i wan stret man.”
NT: “sol blong hem.”
PT: “Dei blong mi i no plante.”
PT: “gud ol dei.”
NT: “save stretem Job.”
NT: “bambae mi no givim haenem long eni man.”