Job 1:1-22

  • Fasin blong Job blong mekem i stret mo ol rij samting blong hem (1-5)

  • Setan i askem kwestin long saed blong samting we i pusum Job blong wosipim God (6-12)

  • Job i lusum ol samting blong hem mo ol pikinini blong hem (13-19)

  • Job i no blemem God (20-22)

1  Bifo i gat wan man long ples ya Uj, nem blong hem Job.*+ Hem i wan gudfala man we fasin blong hem i stret gud,*+ hem i fraet* long God mo i stap longwe long ol samting we i nogud.+  Hem i gat seven boe mo tri gel.  Ol animol blong hem, i gat 7,000 sipsip, 3,000 kamel, 1,000 buluk,* 500 dongki,* mo hem i gat plante man blong wok. Taswe hem i hae moa i winim olgeta man long Is.  Ol boe blong hem wanwan oli gat wan stret dei blong mekem lafet long haos blong hem.* Mo oltaem oli stap singaot trifala sista blong olgeta tu i kam kakae mo dring wetem olgeta.  Taem evriwan i finisim ol dei blong lafet blong olgeta, oltaem Job i sanem tok from olgeta blong mekem olgeta oli tabu. Biaen hem i stap girap long eli moning, i bonem ol sakrefaes we oli bon fulwan+ blong ol boe blong hem wanwan, from we hem i talem se: “Ating ol boe blong mi oli mekem sin, mo long hat blong olgeta oli tok nogud long God.” Hemia nao samting we Job i stap mekem oltaem.+  Nao dei i kam blong ol pikinini blong tru God*+ oli kam stanap long fes blong Jehova,+ mo Setan+ i kam insaed tu long medel blong olgeta.+  Nao Jehova i askem long Setan se: “?Yu kam wea?” Setan i ansa long Jehova se: “Mi stap go olbaot long wol mo mi stap wokbaot olbaot long hem.”+  Nao Jehova i talem long Setan se: “?Yu yu makem fasin blong* Job, man blong wok blong mi? I no gat wan man long wol we i olsem hem. Hem i wan gudfala man we fasin blong hem i stret gud,*+ i fraet* long God mo i stap longwe long samting we i nogud.”  Be Setan i ansa long Jehova se: “?Yu ting se i blong nating nomo we Job i fraet* long God?+ 10  ?I no yu we yu pulum fenis i goraon long hem blong protektem hem,+ mo haos blong hem, mo evri samting we hem i gat? Yu yu stap blesem ol wok we han blong hem i mekem,+ mo ol animol blong hem oli fulap gud long ples we hem i stap long hem. 11  Be yu traem mekem i defren, yu pusum han blong yu mo spolem evri samting we hem i gat, i sua se bambae hem i tok nogud long yu stret long fes blong yu.” 12  Nao Jehova i talem long Setan se: “!Yu luk! Evri samting we hem i gat, naoia i stap long han blong yu.* !Be yu no mas tajem hem!” Nao Setan i aot long fes blong Jehova i go.+ 13  Nao long dei we ol boe mo ol gel blong hem oli stap kakae mo oli stap dring waen long haos blong fasbon brata blong olgeta,+ 14  wan mesenja i kam luk Job, mo i talem se: “Ol buluk oli stap pulum plao mo ol dongki oli stap kakae gras klosap long olgeta, 15  taem ol man Siba oli atakem mifala mo oli tekem ol animol ya, mo oli kilim i ded ol man blong wok long naef blong faet. Mi wan nomo mi ronwe blong kam talemaot long yu.” 16  Taem hem i stap toktok yet, wan narawan i kam i talem se: “!Faea blong God* i aot long heven i kam, i bonem ol sipsip mo ol man blong wok, mo i flatemgud olgeta! Mi wan nomo mi ronwe blong kam talemaot long yu.” 17  Taem hem i stap toktok yet, wan narawan i kam, i talem se: “Ol man Koldia+ oli mekem tri grup, mo oli kam tekemaot ol kamel, oli karem olgeta i go, mo oli kilim i ded ol man blong wok long naef blong faet. Mi wan nomo mi ronwe blong kam talemaot long yu.” 18  Taem hem i stap toktok yet, wan narawan i kam, i talem se: “Ol boe mo ol gel blong yu oli stap kakae mo oli stap dring waen long haos blong fasbon brata blong olgeta. 19  Wantaem nomo wan strong win long draeples i kam, i kilim evri saed blong haos ya, nao haos ya i foldaon long ol yangfala ya, mo oli ded. Mi wan nomo mi ronwe blong kam talemaot long yu.” 20  Nao Job i stanap, i terem klos blong hem mo i katemaot hea long hed blong hem, biaen i foldaon i go long graon, i bodaon, 21  mo i talem se: “Taem mi kamaot long bel blong mama blong mi, mi neked nomo,Mo bambae mi gobak we mi neked nomo.+ Jehova i givim samting,+ mo Jehova i tekemaot bakegen. I gud ol man oli gohed blong presem nem blong Jehova.” 22  Long olgeta samting ya, Job i no mekem sin o blemem God se hem i mekem wan samting we i rong.*

Ol futnot

Maet hemia i minim “Wan Samting We Ol Man Oli Agensem.”
NT: “man we i no gat poen long hem mo i wan gudfala man.”
NT: “tinghevi.”
PT: “1,000 buluk we oli wok tutu.”
PT: “ol woman dongki.”
NT: “olgeta wanwan oli gat stret dei blong mekem lafet long haos blong olgeta wanwan.”
Hemia wan tok long lanwis Hibru we i tokbaot ol enjel se oli pikinini blong God.
PT: “yu putum hat blong yu long.”
NT: “man we i no gat poen long hem mo i wan gudfala man.”
NT: “stap tinghevi.”
NT: “tinghevi.”
NT: “naoia yu yu bos long olgeta samting we hem i gat.”
MNT: “Laetning.”
NT: “o talem se God i mekem wan samting we i no stret.”