Job 3:1-26
3 Afta long samting ya, Job i stat blong toktok mo i tok nogud long dei ya we hem i bon long hem.*+
2 Job i talem se:
3 “I gud dei we mi bon long hem i lus,+Mo naet ya tu we wan man i talem se: ‘!Wan boe i stap gru long bel blong mama blong hem!’
4 I gud dei ya i tudak nomo.
I gud God ya antap i no tingbaot dei ya.I gud laet i no saen long dei ya.
5 I gud tudak we i dak olgeta i tekembak dei ya.
I gud klaod blong ren i kavremap dei ya.
I gud eni samting we i mekem dei i tudak, i mekem dei ya i fraet.
6 I gud tudak i stilimaot naet ya.+I gud dei ya i no glad wetem ol narafala dei blong yia,Mo i gud dei ya i no wan long ol namba blong ol manis.
7 !Yes! I gud naet ya i kam olsem woman we i no save bonem pikinini.I gud man i no harem voes blong man we i glad long naet ya.
8 I gud olgeta we oli stap singaot trabol i kam long ol dei, oli singaot trabol i kam long naet ya,Hemia olgeta we oli naf blong wekemap Leviatan.*+
9 I moa gud we long naet ya, ol laet blong sta long eli moning, oli no moa saen.I gud naet ya i wet long delaet, be i no kamtru,Mo i gud naet ya i no luk laet blong san long eli moning.
10 From we naet ya i no bin satem doa blong bel blong mama blong mi,+Mo i no bin haedem ol trabol ya, blong mi no luk.
11 ?From wanem mi no ded taem mi bon?
?From wanem mi no lus taem mi kamaot long bel blong mama?+
12 ?From wanem mama blong mi i putum mi long ni blong hem,Mo i givim titi long mi?
13 From sipos no, naoia bambae mi stap ledaon we mi no wari nating.+Bambae mi stap slip mo mi stap spel+
14 Wetem ol king blong wol ya mo ol advaesa blong olgeta,We oli bin wokem ol ples ya we naoia oli kam nogud finis,*
15 Mo wetem ol prins we oli gat gol,Mo we ol haos blong olgeta i fulap gud long silva.
16 ?Mo from wanem mi no olsem wan bebi we i haed from i ded long bel,Olsem pikinini we i neva luk laet?
17 Long ples ya, ol man nogud tu oli no moa wari.Long ples ya, olgeta we oli taed oli stap spel.+
18 Long ples ya, ol prisena oli stap gud wanples.Oli no harem voes blong man we i stap fosem olgeta blong wok.
19 Long ples ya, olgeta evriwan, smol no bigwan,* be oli sem mak nomo,+Mo ol slef oli kam fri long masta blong olgeta.
20 ?From wanem hem i givim laet long man we i stap safa,Mo i givim laef long olgeta we oli stap harem nogud?*+
21 ?From wanem oli wantem ded, be i no hapen?+
Oli traehad moa blong faenem ded, i bitim we oli digim graon from ol sas samting we i haed,
22 Olgeta ya we oli stap glad bigwan,Oli hapi tumas taem oli faenem gref.
23 ?From wanem hem i givim laet long man we i lusum rod blong hem finis,We God i blokem hem finis long evri saed?+
24 From we mi stap pulum nogud win blong mi, mo hemia i kam olsem kakae blong mi,+Mo noes we mi mekem from mi stap krae,+ i olsem noes blong wota we i stap kafsaed.
25 From samting we i mekem mi fraet tumas, naoia i kasem mi,Mo samting we mi fraet long hem, naoia i kamtru long mi.
26 Longtaem nao mi no gat pis, mi no stap kwaet, mo mi no spel,Be trabol i gohed blong kam.”
Ol futnot
^ PT: “long dei blong hem.”
^ Plante man oli ting se hemia krokodael, no sam narafala animol we oli bigwan mo oli gat paoa mo oli stap laef long wota.
^ MNT: “we oli bin wokem ol ples ya we naoia oli emti nomo i stap.”
^ NT: “man nating mo haeman.”
^ NT: “harem nogud long laef blong olgeta.”
