Salmos 89:1-52
-
Jehová Diosarojj munasirïtapata jan jaytjasirïtapat cantaña
Maskil.* Etán+ sat ezrahíta chachan salmopa.
89 Jehová Diosajj munasiñat jan jaytjasirïtap uñachtʼayki uka toqetwa nayajj wiñayatak cantäjja.
Jan apanukusir Diosätamatjja lakajampiw taqe jutïr wawanakar yatiyäjja.
2 Nayajj akham sistwa: “Munasiñat jan jaytjasirïtamajj wiñayatak uttʼayatäniwa,+jan apanukurïtamsa alajjpachanakanwa sum uttʼayaraktajja” sasa.
3 Diosajj akham siwa: “Ajllitajampejj mä pacto nayajj lurta,+David servirijampejj mä juramento nayajj lurta:+
4 ‘Wawanakamarojj wiñayatakiw nayajj uttʼayäjja,+tronomsa taqe jutïr wawanakatakiw saytʼayäjja’”+ sasa. (Sélah).
5 Jehová Dios Tata, alajjpachanakajj musparkañ luratanakamatwa jachʼañchapjjtamjja,jïsa, santonakan* congregacionapanjja jan apanukusir Diosätamatwa jachʼañchapjjtamjja.
6 ¿Khitirak alajjpachanakan Jehová Diosjamäspasti?+
¿Khitirak angelanak*+ taypit Jehová Diosjamäspasti?
7 Santonakan jachʼa tantachäwipanjja Diosajj respetatawa, ajjsaratarakiwa.+
Jupar muytatäpki taqe ukanakatakejja jupajj jachʼawa, ajjsarkañarakiwa.+
8 Ejercitonakan Jehová Diosapa,Jah Dios Tata, ¿khitirak jumjam chʼamanisti?+
Jan apanukusir Diosätamjja kunayman toqetwa jumajj uñachtʼaytajja.+
9 Jumaw colerat lamar qotarojj apnaqtajja,+kunapachatï oladanakapajj sartki ukhajj jumaw tʼakuraytajja.+
10 Rahab*+ satäkis ukarojj jumaw atipjasin jiwaytajja,+chʼamani amparamampiw enemigonakamar chhukutataytajja.+
11 Alajjpachanakajj jumankiwa, oraqes jumankarakiwa,+achunak churir oraqesa, oraqer phoqantki ukanakas+ juman uttʼayatawa.
12 Alay toqesa aynach toqes* juman luratawa,Tabor+ qollusa Hermón+ qollus kusisitaw sutim jachʼañchapjje.
13 Amparamajj wali chʼamaniwa,+amparamajj chʼollqhewa,+kupi amparamajj jachʼañchatawa.+
14 Cheqapampi justiciampiw tronoman cimientopajja.+
Munasiñat jan jaytjasiñampi jan apanukusiñampiw juma nayraqatankapjje.+
15 Kusisit arnaqasisa jachʼañchktam uka markajj kusisitawa.+
Jehová Dios Tata, jupanakaw ajanuman qhanapan sarnaqapjje.
16 Jupanakajj jurnälaw sutim laykojj kusisipjje,cheqapar uñjirïtam laykuw jupanakajj jachʼañchatäpjje.
17 Kuna laykutejj jumaw jupanakan jachʼañchäwipätasa chʼamapätasa,+nanakar sum uñjatam laykuw nanakan chʼamajajj* jachʼañchatajja.+
18 Jiwasan escudosajj Jehová Diosankiwa,reyisajj Israelan Santo Diosapankiwa.+
19 Khä tiemponjja jumat jan jitheqtirinakampiw mä visionan parlayätajja, akham sayätawa:
“Chʼamani mä jaqeruw nayajj chʼam churta,+marka taypit mä ajllitaruw nayajj jachʼañchta.+
20 David servirijaruw nayajj jikjjatta,+sagrado aceitejampiw jupar warjjattʼarakta.+
21 Amparajaw juparojj yanaptʼani,+amparajaw chʼamañchtʼarakini.
22 Janiw khiti enemigos juparojj impuesto waytʼkaniti,janirakiw jan cheqapar uñjir jaqes jupar tʼaqesiykaniti.+
23 Jupa contra saytʼirinakarojj jupa nayraqatanwa qʼal tʼunjäjja,+uñisiriparus jiwayarakïwa.+
24 Jan apanukusirïtajasa munasiñat jan jaytjasirïtajas jupampïskiwa,+chʼamapas* sutij laykuw jachʼañchatäni.
25 Nayaw jupan amparapjja* lamar qotjjar usköjja,kupi amparapsa jawiranakjjaruw usköjja.+
26 Jupajj akham sasaw nayar artʼanitani: ‘Jumaw nayan Awkijätajja,nayan Diosajätasa, salvasiñ Qarqajätasa’*+ sasa.
27 Nayasti juparojj jilïr wawaruw tukuyäjja,+oraqenkir reyinakat sipansa wali jachʼaruw tukuyäjja.+
28 Wiñayatakiw juparojj munasiñat jan jaytjkäti,+jupamp pacto luratajajj janipuniw pʼakintatäkaniti.+
29 Wawanakaparojj wiñayatakiw uttʼayäjja,kunjamatï alajjpachanakajj wiñayatakïkejja, tronopajj ukham wiñayatakirakïniwa.+
30 Wawanakapatï leyij apanukupjjani,janirak decretonakajarjam* sarnaqapkani,
31 leyinakajsa pʼakintapjjani,janirak mandamientonakajsa phoqapkani ukhajja,
32 jan istʼasirïpjjatapatwa* mä varampi castigäjja,+pantjasitanakapatsa asutʼjarakïwa.
33 Ukampis janipuniw munasiñat jan jaytjasirïtaj jupat apaqkäti,+promesa luratajsa nayajj phoqapunïwa.
34 Janipuniw nayajj pacto lurataj pʼakintkäti,+kuntï lakajajj arski ukjja janirakiw mayjtʼaykäti.+
35 Santo Diosjamaw nayajj mä juramento lurta, mä kutikiw wiñayatak lurta,janiw Davidarojj kʼarinak parlkäti.+
36 Jupan wawanakapajj wiñayatakïniwa,+kunjamtï intejj wiñayatakïkejja, ukhamarakiw tronopajj wiñayatakïni.+
37 Uka tronojj wiñayatak suma uttʼayatäniwa,kunjamtï phajjsejj alajjpachanakan confiykañ testigjam uñstapunejja ukhama”. (Sélah).
38 Ukampis juma pachpaw juparojj apanuktajja, jaytanukuraktajja,+ajllitamatakis wal colerastajja.
39 Servirimamp lurkta uka pactsa apanuktawa,coronapsa oraqer jaqtasaw jiskʼachtajja.
40 Taqpach qalat lurat murallanakapsa allthaptawa,marka muytpachankir jachʼa perqanakapsa laqayaruw tukuytajja.
41 Uka cheqnam taqe pasirinakas juparojj saqueysupjjewa,vecinonakapatakis mä phenqʼawa.+
42 Jupa contra saytʼasirinakarus atipjaytawa,+taqe enemigonakaparus kusisiyaraktawa.
43 Espadapsa jan serviriruw tukuytajja,nuwasïwin atipañapatakis janiw yanaptʼktati.
44 Jachʼañchäwipsa tukusiytawa,tronopsa oraqeruw liwirpaytajja.
45 Wayna urunakapsa jukʼaptaytawa,jiskʼachañampiw isthapiyaraktajja. (Sélah).
46 Jehová Dios Tata, ¿kunapachkamarak imantasïta? ¿Wiñayatakit imantasïta?+
¿Wali colerasitamajj ninjam aqaskakiniti?
47 ¡Jakañ vidajajj kunja jukʼakisa uk amtasikimaya!+
¿Jan kuna amtampit taqe jaqenakarojj lurayäta?
48 ¿Khiti jaqerak jakaskakispasti ukhamarak jiwañsa janipun uñjkaspasti?+
¿Jaqejj Sepulturan chʼamapatjja* jupa pachpajj salvasispati?* (Sélah).
49 Jehová Dios Tata, ¿kunanaktï nayra tiempon munasiñat jan jaytjasirïtamat lurkayäta ukanakajj kawkinkaraki?
Ukanakatjja jan apanukusir Diosätam laykuw Davidarojj juramentomp arsuyätajja.+
50 Jehová Dios Tata, kunjamsa servirinakamat burlasipjjäna ukanakat amtasikimaya,kunjamsa taqe markanakan burlasitanakap nayajj aguantawayta uk amtasikimaya,
51 Jehová Dios Tata, kunjamsa enemigonakamajj insultapjjäna uk amtasikimaya,kunjamsa ajllitaman sapa sartatanakap insultapjjäna uk amtasikimaya.
52 Jehová Diosajj wiñayatak jachʼañchatäpan. Amén, amén.+
Notanaka
^ Jan ukajja, “santo angelanakan”.
^ Hebreo arunjja, “Diosan wawanakap”.
^ Ukajja, inas Egipto markata jan ukajj Egiptonkir faraonat parlaskchi.
^ Jan ukajja, “Norte toqesa sur toqes”.
^ Hebreo arunjja, “wajjrajajj”.
^ Hebreo arunjja, “wajjrapas”.
^ Jan ukajja, “autoridadapjja”.
^ Variante: “Jaqhejätasa”.
^ Jan ukajja, “juicionakajarjam”.
^ Jan ukajja, “kutkatasirïpjjatapatwa”.
^ Jan ukajja, “almap salvaspati”.
