Salmos 118:1-29
118 Jehová Diosar yuspärapjjam, kuna laykutejj jupajj suma Diosawa.+
Munasirïtapasa jan jaytjasirïtapas wiñayatakiwa.
2 Israelajj jichhajj akham sispan:
“Diosan munasirïtapasa jan jaytjasirïtapasa wiñayatakiwa” sasa.
3 Aarón chachat jutir wawanakajj jichhajj akham sapjjpan:
“Diosan munasirïtapasa jan jaytjasirïtapas wiñayatakiwa” sasa.
4 Khitinakatï Jehová Diosar ajjsarapki ukanakajj jichhajj akham sapjjpan:
“Diosan munasirïtapasa jan jaytjasirïtapasa wiñayatakiwa” sasa.
5 Wali llakitäkayäta ukhajja, Jah* Diosaruw nayajj artʼasiyäta,Jah Diosasti jaysitänwa, mä seguro lugararuw* irparakitäna.+
6 Jehová Diosaw nayamp chikäski, janiw ajjsarkäti.+
¿Jaqejj kamacharakitaspasti?+
7 Jehová Diosaw nayamp chikäski, jupaw nayan yanapirijajja.*+
Nayar uñisipkitu ukanakajj kunjam atipjatas uñjasipjjani ukwa nayajj uñjäjja.+
8 Jehová Diosar imantasiñaw jukʼamp sumajja,jaqenakar confiyañat sipansa.+
9 Jehová Diosar imantasiñaw jukʼamp sumajja,principenakar confiyañat sipansa.+
10 Taqe markanakaw nayarojj muyuntapjjetu,ukampis Jehová Diosan sutipjjaruw nayajj uka markanakarojj qhepar kuttʼayta.+
11 Uka markanakajj muyuntapjjetänwa, jïsa, nayajj qʼala muyuntatäyätwa,ukampis Jehová Diosan sutipjjaruw nayajj uka markanakarojj qhepar kuttʼayta.
12 Abejanakar uñtataw uka markanakajj muyuntapjjetäna,ukampis kunjamtï chʼapinakajj ninamp jankʼak nakhantatäpkejja ukhamwa jupanakajj jankʼak tukusipjjäna.
Jehová Diosan sutipjjaruw nayajj uka markanakarojj qhepar kuttʼayta.+
13 Nayar tinkuyañatakejja wali chʼamampiw nuktʼapjjetäna,*ukampis Jehová Diosaw yanaptʼitäna.
14 Jah Diosaw nayan imantasiñajasa chʼamajasa,jupaw nayan salvirijarojj tuku.+
15 Cheqap sarnaqer jaqenakan carpanakapatjja kusisiñat arnaqasiñaw istʼasi,salvacionaw jupanakatakejj purini.
Jehová Diosan kupi amparapajj chʼamanïtapwa uñachtʼayaski.+
16 Jehová Diosan kupi amparapajj jupa pachpaw jachʼañchasiski.
Jehová Diosan kupi amparapajj chʼamanïtapwa uñachtʼayaski.+
17 Nayajj janiw jiwkäti, janiwa, jan ukasti nayajj jakäwa,ukhamat Jah Diosan luräwinakapat yatiyañajataki.+
18 Jah Diosajj walpun castiguitäna,+ukampis janiw jiwañarojj katuykitänti.+
19 Cheqapar sarnaqer jaqenakan punkunakap llawirarapipjjeta,+uka punkunak mantasaw nayajj Jah Diosar jachʼañchäjja.
20 Akaw Jehová Diosan punkupajja.
Uka punknamaw cheqap sarnaqer jaqenakajj mantapjjani.+
21 Jumaruw nayajj jachʼañchäma, kuna laykutejj jumajj jaysistawa,+nayan salvirijaruw tukuraktajja.
22 Uta luririnakan rechazat qalajja,esquin jachʼa qalaruw tuku.+
23 Ukajj Jehová Diosatwa juti,+jiwasatakejj wali musparkañarakiwa.+
24 Jehová Diosaw aka uru uttʼayawayi,uka urunwa jiwasajj kusisiñäni, kʼuchisirakiñäni.
25 ¡Jehová, mirä amp suma, salvapjjakitaya!
¡Jehová, mirä amp suma, atipjayapjjakitaya!
26 Khititï Jehová Diosan sutipjjar jutki ukajj bendisitäpan.+
Nanakajj Jehová Diosan utapatpachwa jumanakarojj bendisipjjäma.
27 Jehová Diosaw jiwasan Diosasajja,jupaw qhan churistu.+
Fiestar saririnakamp chika ramanak aptʼasit sarapjjam,+altarkam sarapjjam.*+
28 Jumaw nayan Diosajätajja, jumaruw nayajj jachʼañchäma.
Nayan Diosaja, jumaruw nayajj jachʼañchäma.+
29 Jehová Diosar yuspärapjjam,+ kuna laykutejj jupajj suma Diosawa.
Munasirïtapasa jan jaytjasirïtapas wiñayatakiwa.+
Notanaka
^ “Jah” sutejja, Jehová Diosan jiskʼaptayat sutipawa.
^ Jan ukajja, “jachʼa campon lugararuw”.
^ Ukajja, “khitinakatï nayar yanaptʼapkitu ukanakamp chikawa” sasaw jaqokipasirakispa.
^ Ukajja, “wali chʼamampiw jumajj nuktʼistajja” sasaw jaqokipasirakispa.
^ Hebreo arunjja, “altaran wajjranakapkam sarapjjam”.
