Salmos 106:1-48
-
Israelajj janiw yuspärasirïkiti
106 ¡Jah Diosar jachʼañchapjjam!*
Jehová Diosar yuspärapjjam, jupajj suma Diosawa,+munasiñat jan jaytjasirïtapajj wiñayatakiwa.+
2 ¿Khitirak Jehová Diosan taqe jachʼa luräwinakapat yatiyaspasti,jan ukajj khitirak jachʼañchkañ taqe luräwinakapat yatiyaspasti?+
3 Khitinakatï cheqapar kuns lurapki ukanakajj kusisitäpjjewa,khitinakatï taqe horasan kunatï cheqapäki uk luras sarnaqapki ukanakajj kusisitäpjjewa.+
4 Jehová Dios Tata, kunapachatï markamar sum uñjkäta ukhajj nayat amtasikimaya.+
Sumakiy nayar uñjita, salvarakita,
5 ukhamat kunjamtï ajllitanakamar+ suma chuymamp uñjkta ukham nayar uñjañamataki,ukhamat markamamp chik kusisiñajataki,ukhamat jachʼañchasis herenciamamp* chik jumar jachʼañchañajataki.
6 Kunjamtï nayra awkinakajajj juchachasipkäna ukhamwa nanakajj juchachasipjjta,+nanakajj jan wal lurapjjta, jan walpun lurapjjta.+
7 Egipto markanjja nayra awkinakajajj janiw musparkañ luräwinakamar sum uñjapkänti.
Wali munasiñat jan jaytjasirïtamat janiw amtasipkänti,jan ukasti Mar Rojo qota jakʼanwa juma contra saytʼasipjjäna.+
8 Ukampis sutip laykuw Diosajj jupanakar salväna,+ukhamat qhawqha chʼamanis uk uñtʼayañataki.+
9 Diosajj Mar Rojo qotaruw toqenoqäna, ukatwa uka qotajj wañtʼjjäna,uka qota taypnamaw jupanakar irpäna, mä wasar taypnamas irpkaspa ukhama.+
10 Jupanak contra saytʼirinakan amparapatwa Diosajj salväna,+enemigon amparapatwa jupanakarojj salväna.+
11 Jupanak contra saytʼirinakajj umamp ajjskatasaw jiwapjjäna,jupanakat janiw maynis salvaskänti.+
12 Ukatwa jupanakajj Diosan promesapar confiyapjjäna,*+jupan alabanzanakap cantañwa qalltapjjarakïna.+
13 Ukampis kuntï Diosajj lurkäna ukjja jankʼakiw jupanakajj armasjjapjjäna,+janiw jupan ewjjtʼap suyapkänti.
14 Wasaranjja pachpa jan wali munañanakapampiw apayasipjjäna,+wasaranwa Diosarojj yantʼapjjäna.+
15 Kuntï mayipkäna ukwa Diosajj jupanakar churäna,ukampis mä jan wali usumpiw jupanakarojj usuntayäna, uka usuw jupanakarojj aynachtʼayäna ukat jiwarayarakïna.+
16 Campamentonjja jupanakajj Moisesatwa envidiasipjjäna,Aaronatsa envidiasipjjarakïnwa,+ jupajj Jehová Diosar serviñatak yaqhachatänwa.+
17 Ukatjja oraqejj jistʼartasaw Datán chacharojj manqʼantäna,Abiram chachamp tantachtʼatäsipkäna ukanakarusti imjjatarakïnwa.+
18 Jupanakan grupop taypinjja ninaw aqtäna,mä ninaw jan wali jaqenakarojj qʼal nakhantäna.+
19 Horeb qollunjja mä vaca qallwa jupanakajj lurapjjäna,metalat lurat mä idoloruw altʼasipjjäna.+
20 Nayar jachʼañchañat sipansa,jupanakajj pasto manqʼer toror uñtasitäki uka idoloruw adorañ* qalltapjjäna.+
21 Salvir Diosatjja jupanakajj armtʼasjjapjjänwa,+jupaw Egipto markan musparkañanak luräna,+
22 jupaw Cam oraqen musparkañanak luräna,+juparakiw Mar Rojo sat qotan musparkañanak luräna.+
23 Jupanakan tukjatäpjjañapatakejja Diosajj niyaw mä orden churañampïskäna,ukampis Moisés ajllitapaw jupanakatakejj Diosar ruwtʼäna,ukhamat tukjañ munir colerasitap apartayañataki.+
24 Ukatjja jupanakajj suma oraqwa jiskʼachapjjäna,+Diosan promesaparojj janiw confiyapkänti.*+
25 Jupanakasti carpanakapanjja arusisipkakïnwa.+
Janiw Jehová Diosan aruparojj istʼapkänti.+
26 Ukatwa Diosajj amparap altor aytäna, mä juramento lurarakïna,ukhamat wasaran jupanakar jiwarayañataki,+
27 jutïr wawanakapar markanak taypin aywitatayañatakiukhamarak yaqha oraqenakan jiwapjjañapataki.+
28 Ukatsti jupanakajj Peor sat lugarankir Baal diosar adorañwa* qalltapjjäna,+jiwatanakar loqtat sacrificionakwa manqʼapjjarakïna.*
29 Jupanakajj luratanakapampiw Diosarojj colerayapjjäna,+ukatwa jupajj usumpi jupanakar castigäna.+
30 Ukampis kunapachatï Finehás chachajj saytʼasïna, cheqaparjam lurarakïna ukhajja,castigojj saytʼjjänwa.+
31 Ukatwa jupajj cheqapar sarnaqer jaqet uñjatänjja,wiñayans wiñayapataki.+
32 Jupanakajj Meribá* lugarankir umanak jakʼanwa Diosar colerayapjjäna.
Jupanak kawsaw Moisesajj jan walin uñjasïna.+
33 Jupanakajj Moisesaruw colerayapjjäna,ukatwa jupajj jan amuytʼasisin lakapamp arsüna.+
34 Jupanakajj janiw markanakarojj tukjapkänti,+kunjamtï Jehová Diosajj jupanakar siskäna ukhama.+
35 Jan ukasti jupanakajj markanakampiw chikachasipjjäna,+uka markanakan costumbrenakaparjamaw sarnaqjjapjjarakïna.*+
36 Jupanakan idolonakapar servisipkakïnwa,+uka idolonakapajj mä tramparuw jupanakatakejj tukjjäna.+
37 Yoqall wawanakaparusimill wawanakaparus demonionakaruw sacrificiot loqtapjjäna.+
38 Jan juchani jaqenakan wilapjja wartasipkakïnwa,+pachpa yoqall wawanakapana imill wawanakapan wilapjja wartasipkakïnwa,Canaán oraqenkir idolonakaruw loqtapjjäna,+oraqejj wila wartasitampi qʼañuchatänwa.
39 Jupanakajj luratanakapampiw qʼañuchasipjjäna,luratanakapampiw Diosat jitheqtapjjäna.*+
40 Ukatwa Jehová Diosajj markap contrajj wal colerasïna,herenciapatjja* ajjtasïnwa.
41 Kutin kutiniw jupanakarojj yaqha markanakar apjjaruyäna,+ukhamat uñisirinakapajj jupanakar apnaqapjjañapataki.+
42 Enemigonakapasti jupanakarojj tʼaqesiyapjjänwa,jupanakajj enemigonakapan amparapar katuyatäpjjänwa.
43 Walja kutiw Diosajj jupanakar salväna,+ukampis jupanakajj kutkatasirïpjjänwa, jan istʼasirïpjjarakïnwa,+pantjasitanakapatjja jiskʼachataw uñjasipjjäna.+
44 Ukampis Diosajj tʼaqesitanakapwa uñjäna,+yanap mayiñatak artʼasitanakapsa istʼarakïnwa.+
45 Jupanak laykuw Diosajj pacto luratapat amtasïna,ukatwa wali munasiñat jan jaytjasirïtapat jupanakat sinttʼasïna.+
46 Khitinakatï jupanakar preso katuntapkäna taqe ukanakampiwDiosajj sinttʼasiyäna.+
47 Nanakan Jehová Diosaja, salvapjjakitaya,+markanak taypit tantachtʼapjjeta,+ukhamat santo sutim jachʼañchapjjañajataki,wali kusisit jumar alabapjjañajataki.+
48 Israelan Jehová Diosapajj jachʼañchatäpan,wiñayans wiñayapataki.*+
Taqpach markajj “¡Amén!”* sarakpan.
¡Jah Diosar jachʼañchapjjam!*
Notanaka
^ Jan ukajja, “¡Aleluya!”. “Jah” sutejja, Jehová Diosan jiskʼaptayat sutipawa.
^ Jan ukajja, “markamamp”.
^ Jan ukajja, “fe; iyawsäwi”.
^ Jan ukajja, “yupaychañ”.
^ Jan ukajja, “janiw feinïpkänti; janiw iyawsapkänti”.
^ Jan ukajja, “yupaychañwa”.
^ Ukajja, jiwat jaqenakaru jan ukajj jan vidani diosanakar loqtat sacrificionakatwa parlaski.
^ Ukajja, “toqesiña” sañ muni.
^ Jan ukajja, “costumbrenakapwa yateqasjjapjjarakïna”.
^ Jan ukajja, “yaqha diosanakamp prostitución jucha lurapjjäna”.
^ Jan ukajja, “markapatjja”.
^ Jan ukajja, “wiñayatpach wiñayataki”.
^ Jan ukajja, “¡Ukhamäpan!”.
^ Jan ukajja, “¡Aleluya!”. “Jah” sutejja, Jehová Diosan jiskʼaptayat sutipawa.
