Salmos 21:1-13
Directorataki. Davidan salmopa.
21 Jehová Dios Tata, chʼam uñachtʼayatamatjja reyejj wal kusisi.+
¡Salvirïtamatwa jupajj wal kusisi!+
2 Kuntï chuymapajj munki ukwa jumajj jupar churtajja,+kuntï lakapajj mayki ukatjja janiw jarkʼktati. (Sélah).
3 Jumasti juparojj bendistawa, sumanakwa juparojj churaraktajja.
Suma qorit lurat coronampiw pʼeqepar usktajja.+
4 Jupajj jakañwa maytamjja, jumasti jakañwa churtajja,+wiñayans wiñayapatakiw walja tiempo* jakañ churtajja.
5 Jupar salvatamatjja jupajj wali jachʼañchatawa.+
Jumaw honra ukhamarak jachʼañchäwi jupar churtajja.
6 Jumaw wiñayatak bendisitäñapatakejj uttʼaytajja.+
Jupampïtam uñjasajj jupajj wal kusisi.+
7 Reyejj Jehová Diosaruw confiyi.+
Jachʼa Diosan munasiñat jan jaytjasirïtap laykojja, janipuniw jupajj khatatiyatäkaniti.+
8 Amparamajj taqe enemigonakamaruw katjani.
Kupi amparamajj uñisipktam ukanakaruw katjani.
9 Jumajj jutañ amtkäta ukhajja, aqkir hornorus jaqontkasma ukhamwa jupanakarojj tiempopar tukjäta.
Jehová Diosajj colerataw jupanakarojj tukjani, ninasti jupanakarojj qʼal nakhantarakini.+
10 Jupanakat jutiri wawanakaparojj jumajj tukjätawa,jaqenakan yoqanakapan wawanakaparus tukjarakïtawa.
11 Jupanakajj juma contra jan walinak lurañwa munapjjäna,+kuntï jupanakajj amtapki ukajj janiw sumar sarkaniti.+
12 Jumaw jupanakarojj escapayäta,+flechtʼañ arcom* jupanak toqer uñtayasaw jupanakar escapayäta.
13 Jehová Dios Tata, sartasikimaya, chʼamam uñachtʼayam.
Chʼamanïtam laykuw alabanzanak jumar cantapjjäma.*
