Salmos 22:1-31
Directorataki. “Willjtan venadopa”* sat tonorjama. Davidan salmopa.
22 Diosajay, Diosajay, ¿kunatsa apanuktʼasista?+
¿Kunatsa nayar salvirejj jan jutkta?
¿Kunatsa llakisiñat arnaqasitanakajarojj jan istʼkista?+
2 Diosajay, urojj artʼasiskaksmawa, ukampis jumajj janiw jayskistati.+
Arumajj janiw nayajj amuktʼirjamäkti.
3 Ukampis jumajj santo Diosätawa,+taqpach Israelaw jumar jachʼañchtamjja.
4 Awkinakajajj jumaruw confiyapjjayätamjja,+jupanakajj confiyapjjänwa, jumasti jupanakarojj salvaskakiyätawa.+
5 Jupanakajj jumaruw artʼasinipjjäna, salvatäpjjarakïnwa,jumaruw confiyasipjjäna, janiw chuymas pʼakintat uñjasipkänti.*+
6 Ukampis nayajj mä laqʼokïtwa, janiw jaqëkti,jaqenakansa jiskʼachatätwa, markansa uñisitätwa.+
7 Taqe khitinakatï uñjapkitu ukanakajj nayat burlasipjjewa,+jupanakajj jiskʼachasaw uñchʼukipjjetu, burlasisaw pʼeqsa khiwisipjje, akham sapjjewa:+
8 “Jehová Diosarurakis jupajj confiyasejjä, ¡jupay salvpan!
¡Salvpanaya, jupan wali munatarakisä!”+ sasa.
9 Jumaw mamajan purakapat apsusistajja,+mamajan amparapankaskayäta ukhajja, jan kunar ajjsarañatakiw jumajj nayar yanaptʼirïstajja.
10 Nayajj naskayäta ukhatpachaw nayar cuidistajja,mamajan purakapatpachaw jumajj nayan Diosajätajja.
11 Janikiy nayan ukat jayan quedasimti, kuna laykutejj jan waltʼäwejj jakʼankjjewa,+nayajj janiw yaqha yanapirinïkti.+
12 Walja torillonakaw nayarojj muyuntapjjetu,+Basán oraqenkir wali chʼamani toronakaw muyuntapjjetu.+
13 Jupanakajj naya contraw lakanakap wali jachʼa jistʼarapjje,+kunjamtï warartʼasis sarnaqer leonajj yaqha animalar jiskʼa jiskʼa tukjki ukhama.+
14 Nayajj umar uñtat waranukutätwa,taqpach chʼakhanakajajj qhaqsutawa.
Chuymajajj likʼir uñtataw tukuwayjje,+nayat wali manqhanwa umatataraki.+
15 Chʼamajajj ñeqʼe jarrar uñtataw wañsuwayjje,+lajjrajajj lakajaruw lipʼkatjje,+jiwañajatakiw jumajj pʼiyar irpantistajja.+
16 Anunakaw nayar muyuntapjjetu.+
Jan wali lurir jaqenakar uñtasitaw nayarojj jaljjatapjjetu,*+mä leonjamaw amparanakajarusa kayunakajarus atacapjjetu.+
17 Taqpach chʼakhanakajwa nayajj jaktʼirista.+
Jupanakajj* uñjapjjetuwa, wal uñchʼukipjjarakitu.
18 Jupanakasti isinakajwa jupanakkam jalanoqasipjje,isijatsa suertenak willtapjjaraki.+
19 Ukampis jumajj Jehová Dios Tata, janikiy jayan quedasimti.+
Jumaw nayan chʼamajätajja, jankʼakiy yanaptʼita.+
20 Espadat salvakitaya,wali valorani jakäwijarojj anunakan sillunakapat* salvakimaya.+
21 Leonan lakapat salvakitaya,+ salvaje toronakan wajjranakapatsa salvakitaya,jaysakitaya, salvakitaya.
22 Jilanakajaruw nayajj sutimat yatiyäjja,+congregación taypinwa nayajj jachʼañchäma.+
23 ¡Jehová Diosar ajjsaririnaka, jupar jachʼañchapjjam!
¡Jacobun wawanakapa, taqeni jupar jachʼañchapjjam!+
¡Israelan taqe wawanakapa, jupar ajjsaras saytʼasipjjam!
24 Khititejj tʼaqesiyatäki ukan tʼaqesitapjja janiw jupajj jiskʼachkänti, ni uñiskänsa.+
Janirakiw jupatjja ajanup imantaskänti.+
Kunapachatï jupajj yanaptʼayasiñatak artʼaskäna ukhajja, jupajj istʼänwa.+
25 Jachʼa congregacionanwa nayajj jachʼañchäma,+khitinakatï jupar ajjsarapki ukanakan nayraqatapanwa nayajj promesa luratanakaj phoqäjja.
26 Llampʼu chuymaninakaw* manqʼapjjani, sistʼasipjjarakini,+Jehová Diosar thaqerinakaw jupar jachʼañchapjjani.+
Jumanakajj wiñayatak kusisit jakasipjjam.*
27 Oraq thiyankir* taqe jaqenakaw Jehová Diosat amtasipjjani, jupan ukaruw kuttʼapjjarakini.
Markanakankir taqe familianakaw juma nayraqatan altʼasipjjani.+
28 Kuna laykutejj Jehová Diosaruw reyjam apnaqañajj waktʼi,+jupaw markanakarojj apnaqe.
29 Taqe khitinakatï oraqen wali utjirinïpki* ukanakajj manqʼapjjaniwa, altʼasipjjarakiniwa,taqe khitinakatï sepulturar* saraqasipki ukanakajja jupa nayraqatanwa qonqortʼasipjjani,jupanakat janiw khitis jakaskakiñatakejj kunsa lurkaspati.
30 Jutïr wawanakapaw juparojj servipjjani,jutïr wawanakan wawanakapajj Jehová Diosatwa istʼapjjani.
31 Jupanakaw jutasin cheqapar luratanakapat yatiyapjjani.
Jupanakaw janïr naski uka markarojj kuntï jupajj lurki uk yatiyapjjani.
Notanaka
^ Jan ukajja, “tarujapa”. Ukajja, qachu venadotwa parlaski. “Willjtan venadopa” sasinjja, inas mä tonota jan ukajj mä kasta musicat parlaskchi.
^ Jan ukajja, “phenqʼachat uñjasipkänti”.
^ Variante: “chhukjjatapjjetu”.
^ Jan ukajja, “Enemigonakajajj”.
^ Hebreo arunjja, “amparapat”.
^ “Llampʼu chuymanïña” siski uk glosarion liytʼäta.
^ Hebreo arunjja, “Jumanakan chuymanakamajj wiñayatak jakpan”.
^ Variante: “qawayankir”.
^ Hebreo arunjja, “khitinakatï likʼïpki”.
^ Hebreo arunjja, “laqʼa polvor”.
