Salmos 78:1-72
-
Diosajj sum uñjiriwa, Israel markajj janiw Diosar confiykiti
Maskil.* Asaf+ chachan salmopa.
78 Nayan markaja, leyijar istʼam.
Lakajan arunakapar jumanakajj istʼapjjam.*
2 Nayajj uñachtʼäwinakampiw arsöjja.
Kunanakatï nayra tiempon imantatäkäna ukanakatwa nayajj qhanañchäjja.+
3 Kunanaktï jiwasajj istʼktan, yatkaraktan,awk taykasajj yatiyapkarakistu ukanakjja,+
4 janiw wawanakaparojj imtʼkañäniti,jutïr wawanakaruw yatiyañäni,+Jehová Diosan suma luratanakapatsa, chʼamapatsa,+musparkañ luratanakapatsa yatiyañäniwa.+
5 Jupaw Jacob chachan wawanakap taypinjja mä amtäwi usküna,Israel taypinjja mä ley uskurakïna.
Juparakiw nayra awkinakasarojj mä mandato churäna,wawanakapar uka toqenakat yatiyasiñapataki.+
6 Ukhamat jutïr wawanakasa,janïr nasipki uka wawanakas yatipjjañapataki.+
Jupanakasti wawanakaparuw ukanak yatiyapjjarakini.+
7 Ukatjja jupanakajj Diosaruw confiyapjjani,janirakiw Diosan luratanakapsa armasipkaniti,+jan ukasti Diosan mandamientonakapwa phoqapjjani.+
8 Jupanakajj janiw nayra awkinakapjamäpkaniti.
Nayra awkinakapajj jan istʼasiri, kutkatasirïpjjänwa,+uka tiempon jakir jaqenakan chuymanakapajj may may amtirïnwa,+jupanakajj janiw Diosarojj chuymanakapan confiyapkänti.
9 Efraimitanakajj flechtʼañ arconakamp armantatäpjjänwa,ukampis nuwasiñ urunjja jupanakajj escapjjapjjänwa.
10 Jupanakajj janiw Diosan pactop phoqapkänti,+janirakiw Leyiparjamas sarnaqañ munapkänti.+
11 Kuntï Diosajj lurkäna ukjja jupanakajj armasjjapjjänwa,+jupanakar uñachtʼaykäna uka musparkañ luratanakapatsa armasjjapjjänwa.+
12 Jupanakan nayra awkinakap nayraqatanjja Diosajj musparkañanakwa luräna,+Egipto oraqena, mä arunjja Zoan oraqena.+
13 Payaruw qotjja jaljtayäna, ukhamat uka taypnam paskatapjjañapataki,umanaksa perqjamaw saytʼayäna.+
14 Qenayampiw urojj jupanakar irpäna,nina qhanampiw arum paqarajj irparakïna.+
15 Wasaranjja qarqanakwa* partjäna,sistʼasipjjañapkamaw um umtʼayarakïna, manqha umanakatsa umapkaspa ukhama.+
16 Jachʼa qarqatjja* jiskʼa jawiranakwa jalayarakïna,umanaksa jawiranakar uñtataw jalayarakïna.+
17 Ukampis jupanakajj Dios contrajj juchachasisipkakïnwa,Jachʼa Dios contra saytʼasisajj wasaran juchachasisipkakïnwa.+
18 Jupanakajj chuymanakapanwa Diosarojj qallasipjjäna,*+wal munapkäna uka manqʼanak wal mayisaw Diosarojj qallasipjjäna.
19 Dios contraw jupanakajj parlapjjäna,akham sapjjänwa: “¿Diosajj wasaran manqʼañanak churistaspati?”+ sasa.
20 Diosajj mä qarqaruw* jawqʼatatäna,ukhamat umajj jalsuñapataki ukhamarak jiskʼa jawiranakas jilarañapataki.+
Ukhampachas jupanakajj akham sasaw jisktʼapjjäna: “¿Diosajj tʼantʼa churarakistaspati,jan ukajj markapar aycha churaspati?”+ sasa.
21 Kunapachatï Jehová Diosajj ukanak istʼäna ukhajja colerasïnwa,+Jacob contraw mä aqkir nina+ apayanïna,Israel contraw wal colerasirakïna.+
22 Kuna laykutejj jupanakajj janiw Diosar confiyapkänti,*+kuntï Diosajj jupanakar salvañatakejj lurkaspäna ukarojj janiw jupanakajj confiyapkänti.
23 Diosasti qenayrantat alajjpachanakaruw mä orden churäna,ukatjja alajjpachan punkunakapwa jistʼararakïna.
24 Jupanakan manqʼapjjañapatakejj maná tʼantʼa purjjatayaskakïnwa.
Jupasti alajjpachankir manqʼañanakwa jupanakar churäna.+
25 Jaqenakajj chʼamaninakan* tʼantʼapwa manqʼapjjäna,+Diosajj sistʼasipjjañapkamaw jupanakar manqʼayäna.+
26 Jupajj inti jalsu toqenkir thaywa alajjpachanakan onjjtayäna,chʼamapampiw aynach toqenkir* thaya thaytʼayanïna.+
27 Aychjja laqʼa polvor uñtasitwa jupanakjjar purjjatayanïna,jamachʼinakjja lamar qota lakankir chʼallanakar uñtasitwa purjjatayanïna.
28 Jupanakan campamentop taypiruw puriyäna,carpanakap taqpach muytpacharuw puriyäna.
29 Jupanakajj sistʼasiñkamaw manqʼapjjäna.
Kuntï munapkäna ukwa Diosajj jupanakar churäna.+
30 Ukampis kuntï munapkäna ukampejj janïraw sistʼasipkänti,manqʼas lakanakapankaskänwa,
31 ukhaw Diosajj jupanak contrajj wal colerasïna.+
Jupanak taypinkir chʼamani chachanakaruw jiwarayäna,+Israelankir waynanakaruw jiwarayäna.
32 Ukhampachas jupanakajj jukʼampiw juchachasipjjäna,+Diosan musparkañ luratanakaparus janiw confiyapkänti.*+
33 Ukatwa Diosajj jupanakan jakañ urunakap tukusiyäna, aleq samsuñäkaspas ukhama.+
Jakañ maranakapsa mä akatjamat pasir jan waltʼañampiw tukusiyäna.
34 Ukampis kunapachatï jupanakat mä qhawqhanir jiwarayäna ukhajja, jupanakajj juparuw thaqtapjjäna,+kuttʼanisaw Diosar thaqtapjjäna,
35 Diosajj jupanakan Qarqapätap* amtasisaw jupar thaqtapjjäna,+Jachʼa Diosajj jupanakan Salviripätap amtasisaw jupar thaqtapjjäna.+
36 Ukampis jupanakajj lakanakapampiw Diosar engañjañ munapjjäna,lajjranakapampejj kʼarinakwa jupar parlapjjäna.
37 Chuymanakapajj janiw Diosatakejj confiykayäkänti,+janirakiw Diosan pactopsa phoqapkänti.+
38 Ukampis jupajj khuyaptʼayänwa,+pantjasitanakapsa perdonänwa,* janirakiw jupanakar tukjkänti.+
Jupajj sapa kutiw colerap apartayasïna,+coleramp atipayasiñat sipansa.
39 Kuna laykutejj jaqenakan jañchikïpjjatapwa Diosajj amtasïna,+kunjamtï thayajj thaytʼasin jan kuttʼankejja* ukar uñtasitakïpjjatapwa amtasïna.
40 ¡Sapa kutiw jupanakajj Dios contra wasaran saytʼasipjjäna!+
¡Sapa kutiw Diosarojj wasaran chuym ustʼayapjjäna!+
41 Sapa kutiw Diosarojj yantʼapjjäna,+Israelan Santo Diosaparojj llakisiyapjjänwa.
42 Diosan chʼamapat* janiw amtasipkänti,jupanak contra saytʼasirinakat salvkäna uka urut janiw amtasipkänti,+
43 Egipto markan uñachtʼaykäna uka señalanakapatsa,+Zoan oraqen uñachtʼaykäna uka milagronakapatsa janiw amtasipkänti,
44 kunjamsa Nilo jawiran canalanakap wilar tukuyäna uksa janiw amtasipkänti,+jaqenakajj janiw uka canalanakapat umtʼirjamäpkänti.
45 Diosajja achusir chhichhillankhanakwa egipcionakar achurañapatakejj apayanïna,+kʼayranakwa jupanakar jan waltʼayañatakejj apayanirakïna.+
46 Jupanakan yapunakapjja qʼal manqʼsuri langostanakaruw* apjjaruyäna,trabajis achuyapkäna uka achunakapsa grup grupo sarnaqer langostanakaruw apjjaruyäna.+
47 Jupanakan uvas yapunakapjja chhijchhimpiw qʼal tukjäna,+sicómoro qoqanakapsa* qala chhijchhimpiw tukjäna.
48 Khumuñ uywanakapsa chhijchhimpiw jiwarayäna,+uywanakapsti rayonakampiw* jiwarayäna.
49 Jupanakatakejj walpun colerasïna,colerasiñampi llakisiñampwa jupanakjjar apayanïna,walja angelanakwa jan waltʼayañatakejj khitanirakïna.
50 Colerasitapatakejj mä thakwa jistʼaräna.
Jiwañatsa janiw jupanakar perdonkänti,jan wali usumpiw* jupanakar jiwarayäna.
51 Ukatjja egipcionakan taqe jilïr yoqall wawanakaparuw jiwarayäna,+Cam oraqenkir carpanakan nayraqat nasipkäna ukanakaruw jiwarayäna.
52 Ukatsti Egiptotwa markapar irpsüna,+ovejanakarjamaw wasarnam irparakïna.
53 Diosaw jupanakarojj sum jarkʼaqasin irpäna,janirakiw ajjsarayasipkänti,+qotasti enemigonakaparuw chhaqtayäna.+
54 Ukatsti sagrado lugaraparuw jupanakar irpanïna,+jupajj aka qollunak toqeruw irpanïna, ukanaksti kupi amparapampiw jikjjatäna.+
55 Jupanak nayraqatanwa markanakarojj alisnuküna,+mediñ pitampiw jupanakarojj herencia jalanoqäna,+Israelan tribunakaparojja utjäwinakaparjamaw uttʼayäna.+
56 Ukampis jupanakajj Jachʼa Diosarojj qallasisipkakïnwa,* jupa contras saytʼasisipkakïnwa,+amtayäwinakaparus janiw istʼapkänti.+
57 Jupanakasti Diosat jitheqtapjjarakïnwa, nayra awkinakapjam traicioneröpjjänwa.+
Jupanakajj lluchhu flechtʼañ arcor uñtasit jan confiykayäpjjänwa.+
58 Jupanakajj alto lugaranakan falso diosanakar adorasajj* Diosar colerayasipkakïnwa,+idolonakapampiw juparojj wal colerayapjjäna.+
59 Uk uñjasasti Diosajj wal colerasïna,+ukatwa Israel markarojj qʼal apanuküna.
60 Ukatjja Diosajj Siló+ markankir tabernaculjja apanukuwayjjänwa,mä arunjja jupajj jakkäna uka carpjja apanukuwayjjänwa, uka carpanwa jupajj jaqenak taypin jakäna.+
61 Diosajj enemigonakapan arca apasipjjañapatakiw jaytäna,kʼajkir qhanapsti jupa contra saytʼirinakan amparaparuw katuyjjäna.+
62 Markaparojj espadampi jiwayatäñapatakiw apjjaruyäna,+herenciapampisti* wali coleratänwa.
63 Waynanakarojj ninaw qʼal nakhantäna,virgen tawaqonakatakejj janiw kuna casarasiñ cancionanakas cantaskänti.*
64 Sacerdotenakajj espadamp jiwayatäpjjänwa,+viudanakapas janiw jachapkänti.+
65 Ukatjja Jehová Diosajj ikitsa sartkaspa ukhamwa sartäna,+kunjamtï guerran nuwasir mä chachajj+ walja vino umantasajj ikit sartki ukhama.
66 Diosajj jupa contra saytʼirinakarojj qheparuw jittʼayäna,+wiñayatakiw phenqʼachat uñjasiyäna.
67 Jupajj José chachan wawanakaparojj* apanukünwa,Efrainan tribuparojj janiw ajllkänti,
68 jan ukasti Judá+ chachan tribuparuw ajllïna,mä arunjja Sion Qolluruw ajllïna, jupajj munaski ukaru.+
69 Santuariopjja alajjpachanakjam jan tukuskirwa luräna,+kunjamtï oraqjja wiñayatak uttʼayki ukhama.+
70 Jupajj David+ serviriparuw ajllïna,oveja uyunak taypitwa juparojj ajllïna,+
71 qallun ovejanak uñjaskäna uka taypitwa juparojj ajllïna,ukatjja Jacobjjaruw awatirit uttʼayäna, mä arunjja markapjjaruw awatirit uttʼayäna,+Israeljjarusa, mä arunjja herenciapjjarus awatiritwa uttʼayarakïna.+
72 Davidasti taqpach chuymampiw jupanakar awatïna,+yatiñampiw jupanakarojj irparakïna.+
Notanaka
^ Hebreo arunjja, “istʼañatak jiñchunakam altʼayanipjjam”.
^ Variante: “jaqhenakwa”.
^ Variante: “jaqhetjja”.
^ Hebreo arunjja, “yantʼapjjäna”.
^ Variante: “jaqheruw”.
^ Jan ukajja, “janiw Diosar feinïpkänti; janiw Diosar iyawsapkänti”.
^ Jan ukajja, “angelanakan”.
^ Jan ukajja, “sur toqenkir”.
^ Jan ukajja, “janiw feinïpkänti; janiw iyawsapkänti”.
^ Variante: “Jaqhepätap”.
^ Hebreo arunjja, “imjjatänwa”.
^ Ukajja, “kunjamtï espiritojj mistusin jan kuttʼankejja” sasaw jaqokipasirakispa.
^ Hebreo arunjja, “amparapat”.
^ Jan ukajja, “arbolanakapsa”.
^ Ukajja, “calenturampiw” sasaw jaqokipasirakispa.
^ Hebreo arunjja, “epidemiampiw”.
^ Hebreo arunjja, “yantʼasipkakïnwa”.
^ Jan ukajja, “yupaychasajj”.
^ Jan ukajja, “markapampisti”.
^ Hebreo arunjja, “virgen tawaqonakajj janiw jachʼañchatäpkänti”.
^ Hebreo arunjja, “carpaparojj”.
