Salmos 56:1-13
Directorataki. “Wali jayankir jan kuns kamsir paloma” siski ukarjama. Davidan salmopa. Miktam.* Kunapachatï filisteonakajj Gat+ markan Davidar katuntapkäna ukhaw jupajj cantäna.
56 Dios Tata, sumakiy uñjita, kuna laykutejj jaqew nayarojj atacaskitu.
Sapüruw jupanakajj naya contra nuwasipjje, tʼaqesiyapjjarakituwa.
2 Naya contra saytʼasirinakajj sapüruw atacapjjetu,waljaniw jachʼa jachʼa tukusajj nayamp nuwasipjje.
3 Kunapachatï ajjsarayaskta ukhajja,+ jumaruw nayajj confiyasta.+
4 Diosaruw nayajj confiyasta, aruparus jachʼañcharaktwa,Diosaruw nayajj confiyasta, janiw ajjsarkti.
¿Aleq jaqejj kamacharakitaspasti?+
5 Sapüruw jupanakajj jan waltʼayapjjetu,nayar jan waltʼayañakwa amtasipki.+
6 Nayar atacañatakiw jupanakajj imantasipjje.
Sapa sartatanakajwa jupanakajj uñchʼukipjje,+nayan jakäwij apaqañwa suyasipki.+
7 Jan wali luratanakap laykojj jupanakar apanukum.
Dios Tata, colerasitam laykojj markanakar castigam.+
8 Kunjamsa mä lugarat yaqha lugarar nayajj sarta uk jumajj uñjasktawa.+
Jachanakajsa lipʼichit lurat wayaqamaruy apthapim.+
Llakinakajsa libromaruw jumajj qellqanttajja.+
9 Kunapachatï nayajj yanap mayiñatak artʼasinkäma uka urunwa enemigonakajajj sarjjapjjani.+
Diosaw nayamp chikäski, janiw nayajj uka toqet payachaskti.+
10 Diosaruw nayajj confiyasta, aruparus jachʼañcharaktwa,Jehová Diosaruw nayajj confiyasta, aruparus jachʼañcharaktwa.
11 Diosaruw nayajj confiyasta, janiw ajjsarkti.+
¿Aleq jaqejj kamacharakitaspasti?+
12 Dios Tata, kuntï arskayäsma uka promesa phoqañwa nayajj munta,+nayajj yuspärañ arunakwa jumar loqtäma.+
13 Kuna laykutejj jumaw jiwañat salvistajja,+kayunakajan jan lanktʼasiñapatakis jumaw jarkʼaqtajja,+ukhamat nayajj jakaskakiñajataki ukhamarak Dios nayraqatan sarnaqaskakiñajataki.+
